អាមេរិក មិនគាំទ្រឲ្យ អ៊ុយក្រែន វាយប្រហារលើ រុស្ស៊ី ឡើយ

ទីប្រឹក្សាសន្តិសុខជាតិរបស់សេតវិមានលោក Jake Sullivan បាននិយាយកាលពីថ្ងៃសៅរ៍ថា សហរដ្ឋអាមេរិកមិនគាំទ្រការវាយប្រហាររបស់អ៊ុយក្រែនលើទឹកដីដែលទីក្រុងវ៉ាស៊ីនតោនទទួលស្គាល់ថាជា កម្មសិទ្ធិរុស្ស៊ីនោះទេ ។

ក្នុងអំឡុងពេលធ្វើសន្និសីទសារព័ត៌មាននៅទីក្រុងហ៊ីរ៉ូស៊ីម៉ារបស់ជប៉ុន ដែលជាទីតាំងធ្វើម្ចាស់ផ្ទះរៀបចំកិច្ចប្រជុំកំពូលក្រុមប្រទេស G7, មន្ត្រីអាមេរិករូបនេះលើកឡើងថា រដ្ឋបាលរបស់លោក ចូ បៃដិន នឹងមិនផ្ដល់យន្តហោះចម្បាំង F-16 ឲ្យអ៊ុយក្រែនដើម្បីអនុវត្តប្រតិបត្តិការនៅលើទឹកដីនៃប្រទេសរុស្ស៊ីឡើយ ។

លោក Sullivan បានឲ្យដឹងទៀតថា “សមត្ថភាពអាវុធដែលអាមេរិកផ្ដល់ឲ្យអ៊ុយក្រែននាពេលកន្លងមកនេះ គឺមិនអនុញ្ញាត ឬគាំទ្រឲ្យរដ្ឋាភិបាលទីក្រុងកៀវប្រើសម្រាប់វាយប្រហារលើទឹកដីរុស្ស៊ីនោះទេ” ។

គួរបញ្ជាក់ថា ការអះអាងរបស់ទីប្រឹក្សាសន្តិសុខជាតិរបស់សេតវិមានរូបនេះបានកើតឡើង បន្ទាប់ពីប្រធានាធិបតីអ៊ុយក្រែនលោក Volodymyr Zelensky បានស្នើសុំយន្តហោះចម្បាំង F-16 ក្នុងចំណោមសម្ភារៈទំនើបបំផុតដែលផ្ដល់ដោយលោកខាងលិច ក្នុងអំឡុងពេលកិច្ចប្រជុំកំពូល G7 នៅទីក្រុងហ៊ីរ៉ូស៊ីម៉ា​ ប្រទេសជប៉ុន ៕

ប្រែសម្រួលដោយ ៖ ជីវ័ន្ត

ប្រភព ៖ TASS