មហាសេដ្ឋីមានជាងគេនៅអាស៊ី ពាក់នាឡិកាតម្លៃធូរថ្លៃ តែបែររស់នៅផ្ទះថ្លៃជាងគេបំផុតក្នុងលោក

មហាសេដ្ឋីឥណ្ឌា Mukesh Ambani មានទ្រព្យសម្បត្តិសុទ្ធចំនួន៨៣៤ ពាន់លានដុល្លារអាមេរិក បច្ចុប្បន្ន​គឺ​ជា​អ្នកមាន​បំផុត​នៅ​អាស៊ី ដែល​ជាប់​ចំណាត់ថ្នាក់ទី ៩ ក្នុង​បញ្ជី​មហាសេដ្ឋី​ពិភពលោក។

ថ្វីបើមាន​ទ្រព្យសម្បត្តិ​ក៏ដោយ ក៏មហាសេដ្ឋីជំនួញវ័យ៦៥ ឆ្នាំរូបនេះមិនដែល​បោះបង់​ចោល​នូវ​រូបភាព​ដែល​ឆ្នៃប្រឌិតយ៉ាងយកចិត្តទុកដាក់ពីបុរស​សាមញ្ញ​ម្នាក់ ដែលបង្ហាញឲ្យ​ឃើញ​នៅ​ក្នុង​ស្ទីល​នៃការ​ស្លៀកពាក់​​របស់គាត់។ លោក Ambani ជាធម្មតាពាក់អាវដៃខ្លី​ពណ៌ស​សាមញ្ញ និង​ខោខ្មៅជើងធំ​ទូលាយ ដែលជា​ជម្រើសដែលបំផុសគំនិតដោយឪពុករបស់គាត់គឺ Dhirubhai Ambani ដែលបានបង្កើតក្រុមហ៊ុន Reliance Industries ក្នុងឆ្នាំ ១៩៥៨ ។

យោងតា​មទំព័រមួយបាន​បញ្ជាក់​ថា លោក Mukesh Ambani តាមពិតលោកអាចទិញនាឡិកា​ថ្លៃបំផុតដែលមិនធ្លាប់ផលិតរាប់មិនអស់ ប៉ុន្តែលោកបែរជ្រើសរើសរក្សារូបរាង​សាមញ្ញ​និងពាក់នាឡិកាដែលមិនមាន​ភាពលេចធ្លោនោះទេ។

រូបថត​ដែល​មិន​ទាន់​មាន​កាលបរិច្ឆេទ​ត្រូវ​បាន​គេ​ចែក​ចាយ​ដោយ​បណ្ដាញ​សង្គម​ The Indian Horology ហើយ​បាន​និយាយ​ថា​វា​ជា​ Rolex Cellini 6621/8S ពាក់​ដោយ​បុរស​មាន​បំផុត​នៅ​អាស៊ី។ Rolex Cellini គឺជាម៉ូដែលដែលឈប់ផលិត។ បច្ចុប្បន្ននេះវាលក់ក្នុងតម្លៃប្រហែល៨,៥០០ដុល្លារ នៅលើ​វេទិកានាឡិកាដែលប្រើរួច ដែលធ្វើឲ្យវាក្លាយជានាឡិកា Rolex ដែលមានតម្លៃ​សមរម្យ​បំផុត។ នាឡិកា Rolex Cellini 6621/8S គឺសម្រាប់ស្ត្រី ហើយវាជាជម្រើសដ៏ចម្លែករបស់លោក Ambani ។

នាឡិកា​នេះ​មាន​ស្រោម​មាស 18k ខ្សែ​ពណ៌​ត្នោត​មាន​លំនាំ​រាង​ពងក្រពើ និង​ប្រើ​ថ្ម។ Rolex រូបរាងធម្មតានេះគឺផ្ទុយស្រឡះពីនាឡិកាដ៏កម្រមានតម្លៃ៩លានដុល្លារ Patek Philippe Grandmaster Chime 6300G ដែល​ពាក់ដោយកូនប្រុសរបស់លោក Mukesh Ambani លោក Anant Ambani នៅក្នុងព្រឹត្តិការណ៍មួយ​កាលពីពេលថ្មីៗនេះ។ Grandmaster Chime 6300G គឺជានាឡិកាដ៏ស្មុគស្មាញ​បំផុតដែលមិនធ្លាប់ផលិតដោយ Patek Philippe។

ទោះជាយ៉ាងណាក៏ដោយ យោងទៅតាមអ្នកសង្កេតការណ៍បានបញ្ចាក់ច្បាស់ៗថា កុំចាញ់បោកភាពសាមញ្ញនៃជម្រើសសំលៀកបំពាក់ និងនាឡិការបស់បុរសមានបំផុតនៅអាស៊ីនេះឲ្យសោះ។ តាមពិតទៅ មហាសេដ្ឋីរូបនេះ និង​គ្រួសារបានជួបនឹងជីវិតដ៏ប្រណិត​ដែលមិនធ្លាប់មានពីមុនមក។ គ្រួសាររបស់លោក Ambani កំពុងរស់នៅក្នុងផ្ទះដែលមានតម្លៃថ្លៃជាងគេបំផុតក្នុងពិភពលោក។ វា​ជា​អគារ​ខ្ពស់​២៧​ជាន់​ក្នុង​ទីក្រុង Mumbai ដែល​មាន​តម្លៃ​សាងសង់​រហូត​ដល់​ទៅ ១ ពាន់​លាន​ដុល្លារ។ ការចំណាយបែបនេះធ្វើឲ្យ​វាក្លាយជាផ្ទះឯកជនថ្លៃបំផុតនៅលើពិភពលោក។

ក្នុងនាមជាអ្នកមានបំផុតម្នាក់ មហាសេដ្ឋីឥណ្ឌា Mukesh Ambani ក៏មានយន្តហោះឯកជនចំនួន៣ ដែរគឺ Falcon 900EX, Airbus A319 និង Boeing Business Jet ដែលមិនតិចជាង​សណ្ឋាគារលំដាប់ផ្កាយ៧ ដែលកំពុងហោះហើរនោះទេ៕

ប្រែសម្រួល៖ សាង ស្រីល័ក្ខ

ចុចអាន៖នាឡិកាដៃរបស់អធិរាជចុងក្រោយប្រទេស ចិន បំបែកកំណត់ត្រាដេញថ្លៃខ្ពស់បំផុត