ក្រុមបាល់ទាត់កម្ពុជា គ្រោងប្រកួតកម្ដៅសាច់ដុំជាមួយ បង់ក្លាដេស អំឡុងថ្ងៃប្រកួត FIFA Day

ក្រុមបាល់ទាត់ជម្រើសជាតិកម្ពុជា បានប្រកាសជាផ្លូវការថានឹងមានការប្រកួតមិត្តភាពអន្តរជាតិកម្ដៅសាច់ដុំទល់នឹងជម្រើសជាតិបង់ក្លាដេស ក្នុងអំឡុងថ្ងៃប្រកួត FIFA Day ខាងមុខ។ ការប្រកាសបែបនេះ បន្ទាប់ពីសហព័ន្ធបានយល់ព្រមទទួលសំណើររបស់សហព័ន្ធកីឡាបាល់ទាត់បង់ក្លាដេស ដែលបានស្នើប្រកួតជាមួយកម្ពុជា យូរមកហើយ ហើយគេបានប្រកាសនៅលើវិបសាយផ្លូវការរបស់ខ្លួន bff.com.bd កាលពីពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតជាផ្លូវការនឹងធ្វើឡើងនៅថ្ងៃទី១៥ ខែមិថុនា ឆ្នាំ២០២៣ នៅពហុកីឡដ្ឋានជាតិអូឡាំពិក ខណៈអាចយល់បានថា ពហុកីឡដ្ឋានជាតិមរតកតេជោ មិនអាចដំណើរការប្រកួតបាន ដោយសារស្មៅស្ថិតក្នុងលក្ខខណ្ឌមិនអំណោយផល ក្រោយរៀបចំការសម្ដែងបើកបិទ ព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ដែលគ្រោងបញ្ចប់នៅថ្ងៃទី៩ ខែមិថុនា។

គួររំលឹកថា ក្រុមទាំងពីរទើបតែជួបគ្នាកាលពីខែកញ្ញា ឆ្នាំ២០២២ នៅពហុកីឡដ្ឋានជាតិមរតកតេជោ កាលនោះបង់ក្លាដេស បានយកឈ្នះ កម្ពុជា ១-០ ខណៈកាលពីឆ្នាំ២០១៩ គេក៏បានយកឈ្នះកម្ពុជា ០-១ ដូចគ្នានេះ នៅពហុកីឡដ្ឋានជាតិអូឡាំពិក។

សូមបញ្ជាក់ជាថ្មីថា នេះជាការប្រកួតដកស្រង់ដើម្បីវាស់ស្ទង់សមត្ថភាពក្រុមរៀងៗខ្លួន ក៏ដូចជារកចំណាត់ថ្នាក់ក្នុង FIFA World Ranking ជាពិសេសដើម្បីត្រៀមសម្រាប់ការប្រកួតជម្រុះបាល់ទាត់ពិភពលោក ឆ្នាំ២០២៦ នៅអំឡុងខែតុលាខាងមុខ៕

អត្ថបទ៖ មន្នីរ័ត្ន