ម្ចាស់ជើងឯកបាល់ទាត់ “ពានអភិបាលខេត្តមណ្ឌលគិរី” បានទៅលើក្រុមស្នងការដ្ឋាននគរបាលខេត្ត

ក្រោយបញ្ចប់ការប្រកួតកីឡាបាល់ទាត់មហាជនដ៏ស្វិតស្វាញរយៈពេល ៦ ថ្ងៃ ក្នុង “ពានរង្វាន់អភិបាលខេត្តមណ្ឌលគិរី” ឆ្នាំ ២០២៥ បានរកឃើញម្ចាស់ជយលាភីលេខ១ដល់លេខ ៣។ ជាលទ្ធផល ម្ចាស់ជើងឯកលេខ១បានទៅក្រុម ស្នងការដ្ឋាននគរបាលខេត្ត ដោយទទួលបានថវិកាពីអភិបាលខេត្តចំនួន ២.៥០០.០០០រៀល និង១០០ដុលារ។ លេខ២ បានទៅលើក្រុមសហភាពសហព័ន្ធយុវជនកម្ពុជា ទទួលបានថវិកាចំនួន២.២០០.០០០ រៀល និង១០០ដុលារ និងលេខ ៣ បានទៅលើក្រុមសមាគមសម្ព័នយុវជនមុស្លិមកម្ពុជា ជាមួយនឹងប្រាក់រង្វាន់ ១.៦៣០.០០០រៀល និង ១០០ដុលារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរជម្រាបថា មន្ទីរអប់រំ យុវជន និងកីឡា ខេត្តមណ្ឌលគិរី បានរៀបចំការប្រកួតកីឡាបាល់ទាត់មហាជនពានរង្វាន់អភិបាលខេត្តរយៈពេល៦ថ្ងៃ ចាប់ពីថ្ងៃទី ២៣-២៨ ខែតុលា ឆ្នាំ២០២៥ ដើម្បីជំរុញឱ្យវិស័យកីឡាបាល់ទាត់ក្នុងខេត្តកាន់តែមានសកម្មភាពផុសផុល។

នាឱកាសបិទបញ្ចប់ការប្រកួត​ នៅល្ងាចថ្ងៃទី ២៨ ខែតុលា អភិបាលខេត្តមណ្ឌលគិរី លោក ថង សាវុន បានវាយតម្លៃខ្ពស់ ចំពោះប្រតិភូកីឡាករទាំងអស់ដែលបានចូលរួមក្នុងការប្រកួតរួមគ្នា គោរពគោលការណ៍ និងបទបញ្ជាបច្ចេកទេសការប្រកួតបានត្រឹមត្រូវ ថែមទាំងមានស្មារតីស្រឡាញ់កីឡាពិតប្រាកដ។ លោកបញ្ជាក់ថា ការរៀបចំប្រកួត​បាល់ទាត់ថ្នាក់ខេត្តនេះ ដើម្បីឆ្លើយតបទៅនឹងយុទ្ធសាស្របញ្ចកោណដំណាក់កាលទី១របស់រាជរដ្ឋាភិបាល នូវអាទិភាពគន្លឹះរួមមាន មនុស្ស ផ្លូវ ទឹក ភ្លើង និងបច្ចេកវិទ្យា។ ក្នុងចំណោមនោះ ការអភិវឌ្ឍវិស័យអប់រំកាយ និងកីឡា គឺជារឿងសំខាន់មួយផងដែរ។

លោកបញ្ជាក់ទៀតថា ការប្រកួតកីឡាមហាជនជ្រើសរើសជើងឯកថ្នាក់ខេត្ត ពានរង្វាន់បាល់ទាត់អភិបាលខេត្តឆ្នាំ២០២៥​ ដែលប្រារព្វឡើងនាពេលនេះ នឹងនាំមកនូវសាមគ្គីភាព មិត្តភាព សេរីភាព ដល់យុវសិស្សយុវជនទាំងអស់ទូទាំងខេត្ត។

លោក លី សាមិ ប្រធានមន្ទីរអប់រំ ខេត្តមណ្ឌលគិរី បានឱ្យដឹងថា ការប្រកួតកីឡាមហាជនជ្រើសរើសជើងឯកថ្នាក់ខេត្ត “ពានរង្វាន់បាល់ទាត់អភិបាលខេត្តមណ្ឌលគិរី” ឆ្នាំ២០២៥នេះ មានកីឡាករចូលរួមប្រកួតសរុប ១២ក្រុមស្មើ នឹង៣០០នាក់ និងគណៈកម្មការរៀបចំប្រកួតសរុបចំនួន៥០នាក់។ ក្រុមមកពីបណ្តាស្រុកក្នុងទាំង ១២ ត្រូវបានបែងចែកជា ៤ ពូល ដែលក្នុងមួយពូលមាន ៣ ក្រុមសម្រាប់ការប្រកួតវគ្គសន្សំពិន្ទុ។ បន្ទាប់មក ក្រុមលេខ១ និងលេខ ២ នៃពូលទាំង ៤ បានឡើងទៅកាន់វគ្គ ៨ ក្រុមចុងក្រោយដើម្បីបន្តការប្រកួតវគ្គខ្វែងរហូតដល់វគ្គផ្តាច់ព្រ័ត្រ។

កម្ពុជានឹងទទួលធ្វើជាម្ចាស់ផ្ទះ រៀបចំការប្រកួតកីឡាយុវជនអាស៊ីនៅពេលខាងមុខនេះ ខណៈថ្នាក់ដឹកនាំខេត្តជំរុញ ទៅដល់ប្អូនៗដែលជាយុវជនងាកមកស្រឡាញ់កីឡាឱ្យបានច្រើន ដើម្បីដុសខាត់សមត្ថភាពកីឡា ហើយត្រូវចៀសឱ្យឆ្ងាយពីគ្រឿងញៀន៕

អត្ថបទ៖ រៀម សុខហេង