ព័ត៌មានអន្ដរជាតិ

ភាពសោកសៅកើតឡើងនៅវគ្គផ្ដាច់ព្រ័ត្រ Nations League រវាង អេស្ប៉ាញ និងព័រទុយហ្គាល់

បានផុស

២ ខែ មុន

នៅ

ថ្ងៃអង្គារ ១០ មិថុនា ២០២៥

ដោយ

បណ្តាញព័ត៌មាន AP បានរាយការណ៍នៅថ្ងៃទី១០ខែមិថុនានេះឱ្យដឹងថា ឧបទ្ទវហេតុដ៏សោកសៅមួយបានកើតឡើងអំឡុងពេលការប្រកួតវគ្គផ្តាច់ព្រ័ត្រ Nations League រវាងប្រទេសអេស្ប៉ាញ និងព័រទុយហ្គាល់ កាលពីថ្ងៃអាទិត្យ នៅពេលដែលអ្នកគាំទ្របាល់ទាត់ម្នាក់បានធ្លាក់ពីលើកន្លែងអង្គុយផ្នែកកណ្តាលនៃកីឡដ្ឋានរបស់ទីក្រុង Munich ទៅលើជណ្តើរមួយនៅជិតផ្នែកប្រព័ន្ធផ្សព្វផ្សាយ។

ក្រុមជួយសង្គ្រោះប្រមូលផ្តុំនៅកន្លែងជនរងគ្រោះ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសរងគ្រោះនោះ មកពីទីក្រុង Garmisch-Partenkirchen ប្រទេសអាល្លឺម៉ង់បានស្លាប់នៅកន្លែងកើតហេតុ បើទោះបីជា មានការជួយសង្គ្រោះភ្លាមៗក៏ដោយ។

ហេតុការណ៍នេះបានកើតឡើងក្នុងអំឡុងពេលម៉ោងបន្ថែម ដោយសារភាពតានតឹងក្នុងការប្រកួតបានកើនឡើងខ្ពស់។ សាក្សីបានស្រែករកជំនួយ ហើយក្រុមសង្គ្រោះបន្ទាន់បានបិទតំបន់នោះយ៉ាងលឿន។ ប៉ូលិសទីក្រុង Munich បានបើកការស៊ើបអង្កេតមួយ ប៉ុន្តែបច្ចុប្បន្នមិនឃើញមានសញ្ញាធ្វើឃាតនោះទេ ដោយហៅវាថាជាឧបទ្ទវហេតុដ៏សោកសៅ។

ពាក់ព័ន្ធនឹងឧបទ្ទវហេតុនេះគ្រូបង្វឹកក្រុមទាំងពីរបានសម្ដែងការរំលែកទុក្ខក្នុងការបញ្ចេញមតិក្រោយការប្រកួត។ លោក Luis de la Fuente គ្រូបង្វឹកក្រុមអេស្ប៉ាញ និង លោក Roberto Martínez គ្រូបង្វឹកក្រុមព័រទុយហ្គាល់ ក៏បានរំលែកទុក្ខដល់គ្រួសារជនរងគ្រោះផងដែរ៕