អាជ្ញាធរ Kherson ចេញការប៉ាន់ស្មាន អំពីទំហំខូចខាតហិរញ្ញវត្ថុ ដោយសារបាក់ទំនប់ 

អាជ្ញាធរក្នុងតំបន់ Kherson ដែលគ្រប់គ្រងដោយរុស្ស៊ី បានចេញការប៉ាន់ស្មានដំបូង អំពីទំហំខូចខាត ដែលបណ្តាលមកពីការបំផ្លិចបំផ្លាញទំនប់ Kakhovka កាលពីថ្ងៃអង្គារទី៦ខែមិថុនា។

ឧបទ្ទវហេតុនោះដែលទីក្រុងកៀវ និងមូស្គូ កំពុងស្តីបន្ទោសគ្នាទៅវិញទៅមក គឺបណ្តាលឲ្យមានទឹកជំនន់យ៉ាងធ្ងន់ធ្ងរនៅតាមដងទន្លេ Dnipro។

នៅក្នុងការបង្ហោះលើបណ្តាញ Telegram របស់ខ្លួនកាលពីថ្ងៃសៅរ៍ទី១០ខែមិថុនា ប្រធានរដ្ឋាភិបាលក្នុងតំបន់ លោក Andrey Alekseenko បានសរសេរថា តាមការគណនាបឋម, ការខូចខាតបានឈានដល់ប្រហែល ១៣៨លានដុល្លារអាមេរិក។

ទោះបីជាយ៉ាងណាក៏ដោយ លោកបានគូសបញ្ជាក់ថា “តួលេខចុងក្រោយ អាចខ្ពស់ជាងនេះឆ្ងាយណាស់”។ លោកបន្ថែមថា បច្ចុប្បន្នក្រុមអ្នកអង្កេតពិសេស កំពុងចុះពិនិត្យគ្រួសារនានា ដើម្បីប៉ាន់ស្មានការខូចខាតក្នុងករណីបុគ្គលនីមួយៗ ដើម្បីឲ្យអាជ្ញាធរមូលដ្ឋាន ងាយស្រួលផ្តល់សំណង។

លោក Alekseenko ក៏បានកត់សម្គាល់ផងដែរថា សេវាសង្គ្រោះបន្ទាន់រុស្ស៊ី កំពុងធ្វើការយ៉ាងសកម្មនៅក្នុងតំបន់ ដើម្បីជួយសង្គ្រោះអ្នករស់រានមានជីវិត និងសម្លាប់មេរោគនៅតំបន់ដែលទឹកជំនន់បានស្រក។

ដោយឡែក កាលពីថ្ងៃព្រហស្បតិ៍ទី៨ខែមិថុនា លោក Vladimir Leontyev អភិបាលក្រុង Novaya Kakhovka បានរាយការណ៍ថា មនុស្សចំនួន៥នាក់ ត្រូវបាត់បង់ជីវិតបន្ទាប់ពីឧប្បត្តិហេតុនេះ ហើយមនុស្ស៤១នាក់ទៀត រងរបួស។

គួរបញ្ជាក់ថា ក្រុង Novaya Kakhovka គឺស្ថិតនៅលើច្រាំងខាងឆ្វេងនៃទន្លេ Dnipro ហើយត្រូវបានគ្រប់គ្រងដោយរុស្ស៊ី ខណៈអ៊ុយក្រែនកាន់កាប់ផ្នែកម្ខាងនៃតំបន់ Kherson៕

ប្រែសម្រួល៖ Vann Vann

ប្រភព៖ RT

ចុចអាន៖ ការផ្ទុះទំនប់អ៊ុយក្រែន គឺជាគ្រោះមហន្តរាយបរិស្ថានអាក្រក់បំផុតរបស់អឺរ៉ុប ចាប់តាំងពីហេតុការណ៍ Chernobyl