សភាជាតិ ថៃ នឹងបើកសម័យប្រជុំនៅដើមខែក្រោយ បន្ទាប់ពីអនុម័ត​លទ្ធផលបោះឆ្នោតផ្លូវការ

បន្ទាប់ពីគណៈកម្មាធិការរៀបចំការបោះឆ្នោតថៃ (EC) បញ្ជាក់ជាផ្លូវការនូវលទ្ធផលបោះឆ្នោតសកលកាលពីខែមុនមកហើយនោះ សម័យប្រជុំសភាជាតិលើកដំបូងរបស់ថៃ រំពឹងនឹងកោះប្រជុំនៅដើមខែក្រោយនេះ ប៉ុន្តែវាមិនច្បាប់ទេថា រដ្ឋាភិបាលថ្មីនឹងទៅជាយ៉ាងណានោះ ។

គណៈកម្មការរៀបចំការបោះឆ្នោតថៃបានបញ្ជាក់លទ្ធផលបោះឆ្នោតផ្លូវការកាលពីថ្ងៃចន្ទ ហើយបានប្រកាសអនុម័តលទ្ធផលសម្រាប់សមាជិកសភាជាន់ទាបចំនួន ៥០០ រូបផងដែរ ខណៈគណបក្សចលនាឆ្ពោះទៅមុខ ដែលដឹកនាំដោយលោក Pita Limjaroenrat ទទួលបានអាសនៈច្រើនជាងគេគឺ ១៥១ ។

ទន្ទឹមនោះ គណបក្សចលនាឆ្ពោះទៅមុខ ក៏​កំពុង​ពិភាក្សា​ជាមួយក្រុមចម្រុះ​ចំនួន ៧ ​ផ្សេង​ទៀត​ផងដែរ ដើម្បី​បង្កើត​រដ្ឋាភិបាល​ចម្រុះ​ក្នុង​គោល​បំណង​ជ្រើសរើស​លោក Pita ជា​នាយក​រដ្ឋមន្ត្រី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមចចម្រុះបាន​ធានា​អាសនៈជាង ​៣១០ ​នៅ​សភា​ជាន់​ទាប ប៉ុន្តែដើម្បីអាចកាន់អំណាចបាន គណបក្សចលនាឆ្ពោះទៅមុខ នៅតែត្រូវការសំឡេងប្រហែល ៦០ ទៀតពីសមាជិកព្រឹទ្ធសភា ដែលសុទ្ធតែត្រូវបានជ្រើសរើសដោយយោធា បន្ទាប់ពីរដ្ឋប្រហារឆ្នាំ ២០១៤ ។

ស្របពេលជាមួយគ្នានេះ លោក Pita កំពុងមានរឿងអាស្រូវ​ជុំវិញ​ការ​កាន់កាប់ហ៊ុន​នៅ​ក្នុង​ក្រុមហ៊ុន​ប្រព័ន្ធ​ផ្សព្វផ្សាយ ដែល​រដ្ឋធម្មនុញ្ញ​ថៃហាមប្រាម​សម្រាប់​សមាជិក​សភា ខណៈគណៈកម្មការ​រៀបចំ​ការ​បោះឆ្នោតក៏​កំពុង​ស៊ើបអង្កេត​ករណី​នេះផងដែរ ។

ប៉ុន្តែទោះជាយ៉ាងណា លោក Pita បានបដិសេធការចោទប្រកាន់នេះ ហើយលោកបានអះអាងថា លោកបានទទួលភាគហ៊ុននេះ គ្រាន់តែជាផ្នែកមួយនៃទ្រព្យសម្បត្តិរបស់ឪពុករបស់លោកប៉ុណ្ណោះ ខណៈទ្រព្យសម្បត្តិទាំងនោះក៏បានផ្ទេរទៅអ្នកស្នងមរតករួចរាល់ហើយផងដែរ ។ ប៉ុន្តែ​ភាព​ចម្រូងចម្រាសនេះ​បង្ហាញ​ថា​ គណបក្ស​ចម្រុះ​កំពុងស្ថិតលើផ្លូវឃ្លីងឃ្លោងមួយ ​ស្របពេលដែលពួកគេ​ព្យាយាម​បង្កើត​រដ្ឋាភិបាល​ថ្មី ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ តើសំណាកអ្វីខ្លះដែលអាចយកទៅធ្វើតេស្ត DNA បាន ហើយរយៈពេល ប៉ុន្មានទើបដឹងលទ្ធផល?