ខេត្តសៀមរាប ទទួលជោគជ័យដោយពលរដ្ឋ​យល់ដឹងអំពីតម្លៃនៃសន្លឹកឆ្នោត

ឆ្លងកាត់តាមព្រឹត្តិការណ៍ថ្មីក្នុងរយៈពេល ២១ថ្ងៃ នៃយុទ្ធនាការឃោសនាបោះឆ្នោត ជ្រើសតាំងតំណាងរាស្ត្រ នីតិកាលទី៧នេះ  បានប្រព្រឹត្តិទៅដោយរលូនគ្រប់គណបក្សនយោបាយ ប្រកបដោយបរិយាកាសរីករាយ គ្មានអំពើហិង្សាអ្វីឡើយ។

ប្រជាពលរដ្ឋខេត្តសៀមរាប  បានអញ្ជើញទៅបំពេញកាតព្វកិច្ចរបស់ខ្លួនក្នុងការបញ្ចេញនូវសិទ្ធិលទ្ធិប្រជាធិបតេយ្យ សេរី  ពហុបក្ស គោរពសិទ្ធិមនុស្ស ក្នុងការបោះឆ្នោតជ្រើសរើសអ្នកដឹកនាំរបស់ខ្លួន។ ក្នុងព្រឹត្តិការណ៍  នៃការបោះឆ្នោតនេះ បានដំណើរការទៅដោយរលូន  ទោះបីមានភ្លៀងធ្លាក់ខ្លាំងយ៉ាងណា ក៏ប្រជាពលរដ្ឋ ក្នុងស្មារតីមនសិកាសេ្នហាជាតិ  បានពុះពារមកបោះឆ្នោតក្រោមដំណក់ទឹកភ្លៀង ប្រកបទៅដោយទឹកមុខសប្បាយរីករាយ។

លោក ទៀ សីហា អភិបាលនៃគណៈអភិបាលខេត្ត បានគូសបញ្ជាក់ថា  ពីមួយអាណត្តិ ទៅមួយអាណត្តិ ប្រជាពលរដ្ឋ បានអញ្ជើញមកចូលរួមបោះឆ្នោតយ៉ាងច្រើន ដោយពួកគាត់ពេញចិត្តក្នុងការបញ្ចេញនូវសិទ្ធិ លទ្ធិប្រជាធិបតេយ្យ សេរី ពហុបក្ស គោរពសិទ្ធិមនុស្ស តាមរយៈការបោះឆ្នោតនេះ ក្នុងការជ្រើសរើសអ្នកដឹកនាំដែលខ្លួនពេញចិត្ត សម្រាប់​ការអភិវឌ្ឍប្រទេសជាតិ ។ លោកបានលើកឡើងអំពីផែនការការពារក្នុងពេលបោះឆ្នោតរបស់គណៈបញ្ជាការ​ឯកភាពរដ្ឋបាលខេត្ត នៅក្នុងឱកាស​ដែលប្រជាពលរដ្ឋ អញ្ជើញទៅចូលរួមបោះឆ្នោត ដោយអាជ្ញាធរខេត្តបានរៀប​ចំជាស្រេច  ក្នុងការធានាសន្តិសុខ សុវត្ថិភាព ជូនប្រជាពលរដ្ឋនៅ​តាមការិយាល័យ​បោះឆ្នោត ទាំង ១៥២១ការិយាល័យ ។ 

​

ឆ្លងតាមរយៈការបោះឆ្នោតថ្ងៃនេះ លោក នឹម វ៉ាន់សំ  ប្រធានគណៈកម្មការរៀបចំការបោះឆ្នោតខេត្ត បានឲ្យដឹងថា  ខេត្តសៀមរាប មានមន្ត្រីការិយាល័យបោះឆ្នោត សរុបចំនួន ៩១២៦ នាក់ សម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧។ លោកថា អ្នកមានឈ្មោះក្នុងបញ្ជីបោះឆ្នោតចំនួន ៦១៨៨៣៥នាក់  មានការិយាល័យបោះឆ្នោត ចំនួន ១៥២១ការិយាល័យ មានអ្នកសង្កេតការណ៍ជាតិ ,សមាគម និងអង្គការ សរុប ៦ពាន់៦៧៨នាក់ ស្រីចំនួន ៥១៤នាក់  និងមានគណបក្សនយោបាយឈរឈ្មោះចំនួន១៤ មានបេក្ខជនសរុប ១៦៨នាក់ ស្រី ៧១នាក់ និងកម្លាំងសន្តិសុខ មានចំនួនសរុប ៤ពាន់នាក់ ទាំងនគរបាល និង ប្រជាការពារ ។   លោកក៏បានបញ្ជាក់ ក្នុងព្រឹត្តិការណ៍នៃការបោះ​ឆ្នោតជ្រើសតាំងតំណាងរាស្ត្រ  នីតិកាលទី៧ ឆ្នាំ២០២៣  បានចាប់ដំណើរការពីម៉ោង៧,០០នាទី មកដល់ម៉ោង​១៥,០០នាទី បានដំណើរការទៅដោយរលូន នៅតាមការិយាល័យនិមួយៗ  ដែលមានប្រជាពលរដ្ឋទូទាំងខេត្ត បានអញ្ជើញមកចូលរួមធ្វើការបោះឆ្នោតស្មើ ៧៩,៧០ %  មកដល់ពេលបញ្ចប់ការបោះ​ឆ្នោតនៅ​តាមការិយាល័យ​ទូទាំងខេត្ត ៕