ថៃ ប្រាប់ឲ្យកសិករដាំដំណាំផ្សេងជំនួសស្រូវ ដោយសារតែខ្វះទឹក

អាជ្ញាធរថៃប្រាប់ឲ្យកសិករ​កាត់បន្ថយការធ្វើស្រែ​ ដោយងាកមកដាំដំណាំផ្សេងជំនួសវិញ ដើម្បីកាត់បន្ថយការប្រើប្រាស់ទឹក ខណៈឆ្នាំនេះថៃនឹងជួបប្រទះភ្លៀងធ្លាក់តិច ។

លោក Surasri Kidtimonton អគ្គលេខាធិការនៃការិយាល័យធនធានទឹកជាតិ (ONWR) បញ្ជាក់ថា ឆ្នាំ​នេះ ថៃនឹងជួបប្រទះភ្លៀងធ្លាក់តិច រហូតដល់ ៤០ ភាគរយនៅក្រោមកម្រិតធម្មតា ដោយសារតែបាតុភូតអាកាសធាតុ El Nino ។

លោក Surasri អះអាងថា ប៉ុន្តែទោះជាយ៉ាងណា ផ្ទៃដីកសិកម្មប្រមាណជាង ១១ លានរ៉ៃ ត្រូវបានកសិករដាំដុះរួចរាល់ទៅហើយ ខណៈសម្រាប់ផ្ទៃដី​ដែលនៅសល់មិនទាន់បានដាំដុះ​ កសិករថៃគួរតែងាកមកដាំដំណាំផ្សេង​ដែលត្រូវការប្រើប្រាស់ទឹកតិចវិញ ។

បច្ចុប្បន្ន ថៃជាប្រទេសដែលនាំចេញអង្ករធំលំដាប់លេខ ២ ពិភពលោក​ ហើយគេរំពឹងថា ថៃរួមជាមួយវៀតណាម នឹងក្លាយជាអ្នកផ្គត់ផ្គង់អង្ករដ៏សំខាន់​ បន្ទាប់ពីឥណ្ឌាផ្អាកការនាំចេញ ដូច្នេះប្រសិនបើថៃកាត់បន្ថយការធ្វើស្រែ នោះវាអាចក្លាយជាឱកាសមួយសម្រាប់វៀតណាមក្នុងការនាំចេញអង្ករដ៏សំខាន់មួយនេះ ។

គួរបញ្ជាក់ថា បន្ទាប់ពីឥណ្ឌា​ផ្អាកការនាំចេញ, តម្លៃអង្ករលើពិភពលោកបានឡើងថ្លៃជាង ៨០ ដុល្លារក្នុងមួយតោន ។ ចំពោះអង្ករថៃបានឡើងដល់ ៥ ភាគរយ មានតម្លៃ ៦២៥ ដុល្លារក្នុងមួយតោន ហើយបើ​ធៀបនឹងតម្លៃមុន លក់ត្រឹមតែ ៥៤៥ ដុល្លារប៉ុណ្ណោះ ខណៈវៀតណាមវិញឡើងដល់ ៥៩០ ដុល្លារក្នុងមួយតោន ដោយតម្លៃកាលពីពេលមុនគឺ ៥១៥ ទៅ ៥២៥ ដុល្លារក្នុងមួយតោន ៕

ប្រែសម្រួល ៖ នាង រតនៈ

ប្រភព៖ Bangkok Post

ចុចអាន ៖ ថៃ និងវៀតណាម នាំគ្នាសម្រុកប្រមូលទិញស្រូវពីប្រជាកសិករ