ឡាវលើកទឹកចិត្តពលរដ្ឋ តស៊ូជម្នះតម្លៃទំនិញឡើងថ្លៃ ដោយដំឡើងប្រាក់ឈ្នួលអប្បបរមា ២៣%

ប្រភពព័ត៌មានបានឱ្យដឹងថា រដ្ឋាភិបាលឡាវបានប្រកាសដំឡើងប្រាក់ឈ្នួលអប្បបរមាចំនួន ២៣% ពី ១លាន ៣សែនកីបក្នុងមួយខែ ឡើងដល់ ១លាន ៦សែនកីប ចាប់ពីថ្ងៃទី១ ខែតុលា ឆ្នាំ២០២៣នេះ ក្នុងគោលបំណងដើម្បីលើកទឹកប្រជាជនដែលកំពុងប្រឈមមុខនឹងទំនិញឡើងថ្លៃ ពីអត្រាអតិផរណាខ្ពស់ ប៉ុន្តែតម្លៃប្រាក់កីបឡាវធ្លាក់ចុះ។

កាលពីថ្ងៃទី១៧ ខែសីហា ឆ្នាំ២០២៣ លោក អាលុនសៃ សុនណាឡាត នាយកការិយាល័យនាយករដ្ឋមន្ត្រីឡាវបាននិយាយអំពីការកែសម្រួលប្រាក់ឈ្នួលអប្បបរមានៅប្រទេសឡាវដោយបញ្ជាក់ថា កិច្ចប្រជុំសាមញ្ញរបស់រដ្ឋាភិបាលប្រចាំខែកក្កដា រវាងថ្ងៃទី ២៤-២៥ ខែកក្កដា ឆ្នាំ២០២៣ បានឈានដល់ដំណោះស្រាយមួយក្នុងការដំឡើងប្រាក់ឈ្នួលអប្បបរមាពី ១,៣០០,០០០កីបក្នុងមួយខែ ឡើងដល់ ១,៦០០,០០០កីប ស្មើនឹង ២៣% ដែលគិតចាប់ផ្តើមពីថ្ងៃទី១ ខែតុលា ឆ្នាំ២០២៣តទៅ។

ការដំឡើងប្រាក់ឈ្នួលអប្បបរមារបស់រដ្ឋាភិបាលឡាវនេះ គឺជាអត្រាដែលខ្ពស់ជាងរាល់ពេលកន្លងមក ដោយសេចក្តីជូនដំណឹងនេះមិនបានបញ្ជាក់ពីមូលហេតុនោះទេ។ ប៉ុន្តែទោះជាយ៉ាងនេះក្តី មជ្ឈដ្ឋាននានាបានសម្តែងការយល់ឃើញថា ដើម្បីជាការជួយសម្រាលបន្ទុកទំនិញនៅលើទីផ្សារឡើងថ្លៃខ្ពស់ ដល់កម្មករដែលពឹងផ្អែកតែលើប្រាក់ខែនៅប្រទេសឡាវ ដោយសារតែប្រទេសឡាវបានប្រឈមមុខនឹងអតិផរណាខ្ពស់ខ្លាំងជាងពីរឆ្នាំមកនេះ ដែលធ្វើឱ្យតម្លៃប្រាក់កីបធ្លាក់ចុះយ៉ាងខ្លាំង ខណៈដែលទំនិញគ្រប់ប្រភេទនៅលើទីផ្សារឡើងថ្លៃកាន់តែខ្ពស់។

គួរបញ្ជាក់ថា ប្រទេសឡាវទើបតែដំឡើងប្រាក់ឈ្នួលអប្បបរមាពី ១លាន ២សែនកីបក្នុងមួយខែ ឡើងដល់១លាន៣សែនកីប កាលពីថ្ងៃទី១ ខែឧសភា ឆ្នាំ២០២៣។ ក្នុងរយៈពេល៤ឆ្នាំកន្លងមកនេះ ប្រទេសឡាវបានដំឡើងប្រាក់ឈ្នួលអប្បបរមាពី ៩សែនកីបក្នុងមួយខែ ឡើងដល់ ១លាន ២សែនកីបកាលពីថ្ងៃទី១ ខែឧសភា ឆ្នាំ២០២៣ និងបានកើនឡើងដល់១លាន២សែនកីបក្នុងមួយខែនៅថ្ងៃទី១ ខែសីហា ឆ្នាំ២០២២៕

ប្រែសម្រួល៖ គង់ សំអាន

ប្រភព៖ Mgronline