អាមេរិក ព្រមានកូរ៉េខាងជើង កុំផ្តល់អាវុធទៅឲ្យ រុស្ស៊ី

ទីប្រឹក្សាសន្តិសុខជាតិអាមេរិកលោក Jake Sullivan បានប្រាប់ក្រុមអ្នកយកព័ត៌មាន នៅឯសេតវិមាន កាលពីថ្ងៃអង្គារទី៥ខែកញ្ញាថា ការចរចាអាវុធរវាងរុស្ស៊ីនិងកូរ៉េខាងជើង កំពុងដំណើរការទៅមុខយ៉ាងរលូន ហើយព្រមានមេដឹកនាំគីម ជុងអ៊ុនថា ទីក្រុងព្យុងយ៉ាង នឹងទទួលលទ្ធផលអាក្រក់ បើផ្គត់ផ្គង់អាវុធដល់រុស្ស៊ី សម្រាប់ប្រើប្រាស់នៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Sullivan និយាយថា ការផ្តល់សព្វាវុធដល់រុស្ស៊ី នឹងមិនឆ្លុះបញ្ចាំងឲ្យឃើញពីភាពល្អរបស់កូរ៉េខាងជើងទេ ប៉ុន្តែផ្ទុយទៅវិញ ពួកគេនឹងទទួលផលអាក្រក់ចំពោះបញ្ហានេះ នៅក្នុងសហគមន៍អន្តរជាតិ។

ទោះបីជាយ៉ាងណាក៏ដោយ មុននេះ វិមានក្រឹមឡាំងបានឲ្យដឹងថា ខ្លួនគ្មានអ្វីត្រូវនិយាយទេអំពីសេចក្តីថ្លែងការណ៍របស់មន្ត្រីអាមេរិកដែលថា លោក គីម គ្រោងធ្វើដំណើរទៅកាន់ប្រទេសរុស្ស៊ីក្នុងខែកញ្ញា ដើម្បីជួបជាមួយលោកប្រធានាធិបតី វ្ល៉ាឌីមៀរ ពូទីន និងពិភាក្សាអំពីការផ្គត់ផ្គង់អាវុធដល់ទីក្រុងមូស្គូ។

ប៉ុន្តែបើយោងតាមលោក Sullivan រំពឹងថា លោក គីម នឹងពិភាក្សាអំពីសព្វាវុធ រួមទាំងនៅកម្រិតមេដឹកនាំ និងប្រហែលជាពិភាក្សាជាមួយលោក ពូទីន ដោយផ្ទាល់ទៀតផង។

លោក Sullivan សង្កត់ធ្ងន់ថា “យើងនឹងបន្តអំពាវនាវឲ្យកូរ៉េខាងជើងគោរពតាមការប្តេជ្ញាចិត្តជាសាធារណៈរបស់ខ្លួន ក្នុងការមិនផ្គត់ផ្គង់អាវុធដល់រុស្ស៊ីដែលយកទៅសម្លាប់ជនជាតិអ៊ុយក្រែន”៕

ប្រែសម្រួល៖ Vann Vann

ប្រភព៖ CNA

ចុចអាន៖ មន្ត្រីអាមេរិកអះអាងថា លោក គីម ជុងអ៊ុន នឹងទៅរុស្ស៊ី ជួបលោក ពូទីន ដើម្បីពិភាក្សារឿងផ្តល់អាវុធ