ស្ថានទូតឥណ្ឌា ព្រមានប្រជាជនខ្លួន កុំធ្វើដំណើរទៅ មីយ៉ាន់ម៉ា

បន្ទាប់ពីយោធាកាន់កាប់ប្រទេសមីយ៉ាន់ម៉ា ស្ថានទូតឥណ្ឌាក្នុងទីក្រុងយ៉ាំងហ្គោនបានចេញការព្រមានដល់ប្រជាជនឥណ្ឌា ឲ្យចៀសវាងការធ្វើដំណើរមិនចាំបាច់ទៅកាន់ប្រទេសមីយ៉ាន់ម៉ា។

សេចក្តីរាយការណ៍និយាយថា “ដោយមើលឃើញពីការវិវត្តថ្មីៗនៅក្នុងប្រទេសមីយ៉ាន់ម៉ា ប្រជាជនឥណ្ឌាទាំងអស់ត្រូវមានការប្រុងប្រយ័ត្នខ្ពស់និងចៀសវាងការធ្វើដំណើរដែលមិនចាំបាច់”។

ស្ថានទូតឥណ្ឌាប្រចាំទីក្រុងយ៉ាំងហ្គោនបានបន្ថែមថា ការហោះហើររបស់ក្រុមហ៊ុនអាកាសចរណ៍ Air India ដែលគ្រោងនឹងធ្វើឡើងនៅថ្ងៃទី៤ខែកុម្ភៈរវាងទីក្រុងយ៉ាំងហ្គោននិងញូវដេលី ឥឡូវនេះត្រូវបានលើកពេលទៅថ្ងៃទី១១ខែកុម្ភៈវិញ។

កាលពីថ្ងៃចន្ទ កងទ័ពមីយ៉ាន់ម៉ាបានឃុំខ្លួនមេដឹកនាំគណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) លោកស្រី អ៊ុងសានស៊ូជី និងមេដឹកនាំជាន់ខ្ពស់ដទៃទៀតនៃគណបក្សនេះរួមទាំងប្រធានាធិបតី Win Myint ផងដែរ។

កងទ័ពមីយ៉ាន់ម៉ាបានតែងតាំងអតីតឧត្តមសេនីយ៍ជាប្រធានាធិបតី ហើយបានប្រគល់អំណាចនីតិបញ្ញត្តិ តុលាការនិងប្រតិបត្តិទៅឲ្យមេបញ្ជាការកងទ័ពលោក Min Aung Hlaing ដែលនេះជាសកម្មភាពមួយត្រូវបានរិះគន់ដោយប្រធានាធិបតីអាមេរិកលោក Joe Biden រួមទាំងមេដឹកនាំលោកខាងលិចផ្សេងទៀត៕

ប្រែសម្រួលដោយ៖ Vann Vann

ប្រភព៖ Wionews

ចុចអាន៖ ធ្លាយវីដេអូ សមាជិកសភាមីយ៉ាន់ម៉ាត្រូវកងទ័ពចូលចាប់ដល់ផ្ទះមុនពេលរដ្ឋប្រហារកើតឡើង