UN អំពាវនាវសុំទឹកប្រាក់ជាបន្ទាន់ យកទៅជួយជនរងគ្រោះ ដោយទឹកជំនន់នៅ លីប៊ី

កាលពីថ្ងៃព្រហស្បតិ៍ទី១៤ខែកញ្ញា អង្គការមនុស្សធម៌និងដៃគូរបស់អង្គការសហប្រជាជាតិ បានចេញការអំពាវនាវ សុំទឹកប្រាក់៧១.៤លានដុល្លារអាមេរិក ដើម្បីបំពេញតម្រូវការបន្ទាន់របស់ប្រជាជនលីប៊ី ដែលរងគ្រោះដោយសារទឹកជំនន់ដ៏បំផ្លិចបំផ្លាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យអង្គការសហប្រជាជាតិទទួលបន្ទុកសម្របសម្រួលកិច្ចការមនុស្សធម៌ (OCHA) និយាយថា មូលនិធិនេះគឺកំណត់គោលដៅសម្រាប់មនុស្ស ២៥០០០០នាក់ ក្នុងចំណោម៨៨៤០០០នាក់ដែលគេប៉ាន់ស្មានថា មានតម្រូវការក្នុងរយៈពេលបីខែខាងមុខ។

OCHA បន្តថា តំបន់ដែលរងគ្រោះខ្លាំងជាងគេរួមមាន Derna, Albayda, Soussa, Al-Marj, Shahat, Taknis, Battah, Tolmeita, Bersis, Tokra និង Al-Abyar។

យោងតាមក្រុមមនុស្សធម៌, មន្ទីរពេទ្យ Albayda ដែលបម្រើដល់តំបន់ភ្នំបៃតងទាំងមូល គឺត្រូវបានជន់លិច ជាហេតុបង្ខំឲ្យមានការជម្លៀសអ្នកជំងឺក្នុងបន្ទប់សង្គ្រោះបន្ទាន់ ទៅកាន់មន្ទីរពេទ្យ និងគ្លីនិកឯកជនផ្សេងៗ។

ស្របពេលជាមួយគ្នានោះ អគ្គលេខាធិការរងអង្គការសហប្រជាជាតិ ទទួលបន្ទុកកិច្ចការមនុស្សធម៌ លោក Martin Griffiths បាននិយាយថា ទំហំនៃគ្រោះមហន្តរាយទឹកជំនន់នេះ គឺពិតជាគួរឲ្យភ្ញាក់ផ្អើលមែនទែន ព្រោះសង្កាត់ទាំងមូលត្រូវបាត់ចេញពីផែនទី បណ្តាលឲ្យមនុស្សរាប់ម៉ឺននាក់ បាត់បង់ជីវិត៕

ប្រែសម្រួល៖ Vann Vann

ប្រភព៖ Xinhua

ចុចអាន៖ សោកនាដកម្មគ្រោះធម្មជាតិ ឆក់យកជីវិតមនុស្សជាង ២ម៉ឺននាក់ ត្រឹមប៉ុន្មានថ្ងៃ នៅប្រទេស២ ក្នុងទ្វីបតែមួយ