អាស៊ាន ចាប់ផ្ដើមសមយុទ្ធយោធារួមគ្នាលើកដំបូងនៅ ឥណ្ឌូណេស៊ី ខណៈ មីយ៉ាន់ម៉ា ត្រឹមជាអ្នកសង្កេតការណ៍

យោធាមកពីបណ្តាប្រទេសអាស៊ានទាំង ១០ បានចាប់ផ្តើមសមយុទ្ធយោធារួមគ្នាលើកដំបូងមិនធ្លាប់មាននៅក្នុងសមុទ្រ South Natuna របស់ប្រទសឥណ្ឌូណេស៊ី ។

ទន្ទឹមនោះ សមយុទ្ធយោធារួមគ្នាដែលមានឈ្មោះថា ASEX-01 ក៏មានការចូលរួមពីសំណាក់ប្រទេសទីម័រខាងកើតផងដែរ ប៉ុន្តែសម្រាប់មីយ៉ាន់ម៉ាវិញគឺចូលរួមក្នុងនាមជាអ្នកសង្កេតការណ៍ប៉ុណ្ណោះ ។

យោធាឥណ្ឌូណេស៊ីបាននិយាយនៅក្នុងសេចក្តីថ្លែងការណ៍មួយថា សមយុទ្ធយោធារួមគ្នានេះនឹងមានរយៈពេល ៥ ថ្ងៃ ហើយមិនផ្ដោតលើការប្រយុទ្ធឡើយ ដោយសមយុទ្ធនេះគឺផ្ដោតសំខាន់លើការអភិវឌ្ឍជំនាញយោធា រួមទាំងសន្តិសុខដែនសមុទ្រ និងប្រតិបត្តិការល្បាត រួមទាំងការជួយផ្នែកមនុស្សធម៌ និងការសង្គ្រោះគ្រោះមហន្តរាយផងដែរ ។

លោក Yudo Margono ប្រមុខយោធាឥណ្ឌូណេស៊ី បានប្រាប់អ្នកសារព័ត៌មាន បន្ទាប់ពីពិធីបើកសមយុទ្ធលើកោះ Batam នៅថ្ងៃអង្គារនេះថា “សមយុទ្ធយោធារួមគ្នានេះមិនមែនជាប្រតិបត្តិការប្រយុទ្ធនោះទេ ពីព្រោះអាស៊ានផ្តោតសំខាន់តែលើផ្នែកសេដ្ឋកិច្ចប៉ុណ្ណោះ” ។

គួរបញ្ជាក់ថា សមយុទ្ធយោធារួមគ្នានេះមានការចូលរួមពីកងទ័ពរាប់រយនាក់ ក៏ដូចជានាវាចម្បាំងចំនួន ៥ គ្រឿងមកពីប្រទេសឥណ្ឌូណេស៊ី ព្រុយណេ ម៉ាឡេស៊ី និងសិង្ហបុរី ហើយនឹងប្រព្រឹត្តទៅរហូតដល់ថ្ងៃសៅរ៍ ទី២៣ ខែកញ្ញាខាងមុខ ៕

ប្រែសម្រួលដោយ ៖ ជីវ័ន្ត

ប្រភព ៖ Reuters

ចុចអាន ៖ តើលោក ពូទីន ធ្លាប់អញ្ជើញទៅ កូរ៉េខាងជើង ដែរឬទេ?