លោក ប៉ែន បូណា ៖ សេរីភាពនៃការប្រើប្រាស់អ៊ីនធើណេតនៅកម្ពុជា មាន​ភាពទូលំទូ​លាយ លើកលែងតែអ្នកបំពានច្បាប់ប៉ុណ្ណោះ

មន្ត្រីជាន់ខ្ពស់រាជរដ្ឋាភិបាល បានបញ្ជាក់ថា សេរីភាពនៃការប្រើប្រាស់អ៊ីនធើណេត និងសេរីភាពនៃការបញ្ចេញមតិនៅកម្ពុជា មាន​ភាពទូលំទូ​លាយមែនទែន លើកលែងតែអ្នកបំពានច្បាប់ប៉ុណ្ណោះ ដែលត្រូវទទួលខុសត្រូវចំពោះមុខច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបញ្ជាក់នេះ បន្ទាប់ពីអង្គការ​ Freedom House ​កាលពីពេលថ្មីៗនេះ បានចេញរបាយការណ៍មួយ ដោយបានលើកឡើងថា សេរី​ភាពអ៊ីនធើណេតនៅ​កម្ពុជា ​នៅ​ដែល​បន្ត​ធ្លាក់​ចុះ ​និង​មានការ​រឹត​ត្បិត​នៅ​ឡើយ​ ជាពិសេស​នៅ​មុន ​និង​ក្រោយ​ពេល​ការ​បោះឆ្នោតជ្រើសតាំង តំណាងរាស្រ្ដ នីតិកាលទី ៧។

លោក ប៉ែន បូណា អ្នកនាំពាក្យរាជរដ្ឋាភិបាល មានប្រសាសន៍ប្រាប់កម្ពុជាថ្មីថា ប្រសិនបើមានអ្នកណាថា សេរីភាពនៃការប្រើប្រាស់អ៊ីនធើណេត នៅក្នុងប្រទេសកម្ពុជា ត្រូវបានរឹតត្បិត ហើយមានការធ្លាក់ចុះនោះ គឺជារឿងដែលមិនពិតឡើយ។ មិនពិត ដោយសារប្រជាពលរដ្ឋខ្មែរ ដែលប្រើប្រាស់អ៊ីនធើណេតមានចំនួនច្រើន ហើយលោកកត់សម្គាល់ថា នៅតាមផ្ទះរបស់ប្រជាពលរដ្ឋនៅទីប្រជុំជន និងទីក្រុង ដែលមានសេវាអ៊ីនធើណេតទៅដល់។ ប្រសិនបើមិនមានការតភ្ជាប់សេវាអ៊ីនធើណេតរបស់ក្រុមហ៊ុនទេ គឺប្រជាពលរដ្ឋមួយចំនួនទៀតប្រើប្រាស់សេវាអ៊ីនធើណេត តាមប្រព័ន្ធទូរស័ព្ទដែលពួកគាត់ប្រើប្រាស់។

អ្នកនាំពាក្យរាជរដ្ឋាភិបាល លើកឡើងថា «ដូច្នេះបើនិយាយពីចំនួនអ្នកប្រើអ៊ីនធើណេតហ្នឹង វាច្រើនមែនទែននៅក្នុងប្រទេសកម្ពុជាយើង អ្នកណាក៏អាចប្រើបានមិនថាក្មេង មិនថាចាស់ មិនថាប្រុស មិនថាស្រី គឺសុទ្ធតែប្រើ ឥឡូវអ្វីៗសុទ្ធតែអនឡាញនៅក្នុងដៃដែរ ដូច្នេះច្រើនមែនទែនសម្រាប់អ្នកប្រើប្រាស់អ៊ីនធើណេត ឥឡូវនេះអ្នកណាក៏ប្រើអ៊ីនធើណេតដែរ»។

លោក ប៉ែន បូណា បានបញ្ជាក់ថា សេរីភាពនៃការប្រើប្រាស់អ៊ីនធើណេតនៅកម្ពុជា មាន​ភាពទូលំទូ​លាយមែនទែន លើកលែងតែអ្នកបំពានច្បាប់ អ្នកដែលបំពានក្រមសីលធម៌ ឬក៏បំពានសិទ្ធិអ្នកដទៃ ទើបអាចមានបញ្ហាដែលច្បាប់បានហាមឃាត់។ បើក្រៅពីនោះ គឺគ្មានបញ្ហាអ្វីទាំងអស់ សម្រាប់អ្នកប្រើប្រាស់អ៊ីនធើណេតនៅកម្ពុជា។

ម្យ៉ាងទៀត សេរីភាពបញ្ចេញមតិនៅកម្ពុជា ក៏មានចំនួនច្រើនផងដែរ ដោយប្រជាពលរដ្ឋបានប្រើប្រាស់បណ្ដាញសង្គមនានា ដើម្បីបញ្ចេញមតិ និងបញ្ចេញអារម្មណ៍របស់ខ្លួន ហើយនៅពេលមានរឿងអ្វីមួយកើតឡើង គឺមានការបញ្ចេញមតិផ្សេងៗគ្នា។ ចំណែក​ឯសារព័ត៌មានវិញ ក៏ត្រូវបានផ្លាស់ប្ដូរទៅជាអនឡាញ ស្ទើរតែគ្រប់អង្កភាព-ស្ថាប័នដែរ។

លោកបញ្ជាក់ទៀតថា «អញ្ចឹងបើយើងសរុបមកវិញ អ្នកដែលអះអាងថា សេរីភាពអ៊ីនធើណេតនៅកម្ពុជាហ្នឹង មានការរឹតត្បិត មានការធ្លាក់ចុះ ​មានតែអ្នកនោះ គឺជាអ្នកទាមទារសេរីភាពតាមទំនើងចិត្ត ដែលបំពានគេបំពានឯង បំពានច្បាប់ ធ្វើឲ្យប៉ះពាល់អ្នកដទៃ អាហ្នឹងគាត់គិតថា គេរឹតត្បិតហើយ ពីព្រោះច្បាប់ហាមឃាត់​ណា៎ នេះគឺជាភាពច្បាស់លាស់ដែលយើងត្រូវតែយល់ទាំងអស់គ្នា»។

មន្ត្រីជាន់ខ្ពស់រាជរដ្ឋាភិបាល ក៏បានលើកឡើងដែរថា សូម្បីតែហ្វេសប៊ុកដែលបង្កើតឡើងមក ក៏ត្រូវបានគេដាក់កម្រិតឲ្យប្រើប្រាស់ដែរ ដែលវាមាន Restriction មិនឲ្យមានការរំលោភកម្មសិទ្ធិបញ្ញា មិនឲ្យមានការប្រើពាក្យពេចន៍ជេរប្រមាថ ពាក្យពេចន៍រើសអើងជាដើម។ ការដាក់កម្រិតនេះ ដោយសារហ្វេសប៊ុកយល់ថា បើមនុស្សទាំងអស់គ្នាយកបណ្ដាញសង្គមនេះ ទៅប្រើប្រាស់តាមទំនើងចិត្តនោះ នឹងអាចមានបញ្ហាកើតឡើងមួយចំនួន មិនខានឡើយ។

បើតាមលោក ប៉ែន បូណា អ្វីក៏ដោយ ក៏ត្រូវមានខ្សែបន្ទាត់ដែរ ហើយសម្រាប់ប្រទេសមួយបង្កើតច្បាប់នានាឡើង គឺដើម្បីឲ្យមនុស្សប្រព្រឹត្តទង្វើដែលត្រឹមត្រូវ មានសណ្ដាប់ធ្នាប់ ​និងចេះគោរពគ្នាទៅវិញទៅមក។ ដូច្នេះហើយ ប្រសិនបើមានអ្នកណាថា ការដាក់កម្រិតនេះ ជាការរឹតត្បិតសេរីភាព មានន័យថា អ្នកទាំងនោះ គឺជាអ្នកដែលមានចេតនាចង់បំពានអ្នកដទៃហើយ៕