ជីវិតកម្សាន្ដ

ផលិតករភាពយន្ត ៖ «ចង់បានរឿងក្នុងស្រុកមានគុណភាពល្អ ទាល់តែអ្នកក្នុងស្រុកគាំទ្រច្រើន»

បានផុស

២ years មុន

នៅ

ថ្ងៃសៅរ៍ ២៨ តុលា ២០២៣

ដោយ

កន្លងទៅគេចាំបានថា លោក លៀក លីដា ដែលជាផលិតករភាពយន្ត និងម្ចាស់ផលិតកម្ម LD ធ្លាប់លើកឡើងអំពីក្តីព្រួយបារម្ភលើវិស័យភាពយន្តជាតិ អាចនឹងដួលសាជាថ្មី ខណៈមើលឃើញថា ចំនួន នៃភាពយន្តបរទេសបានសម្រុកហូរចូលច្រើន។ ក្នុងនោះ លោកក៏បានស្នើដល់ក្រសួង ស្ថាប័នពាក់ព័ន្ធ គួរចេញវិធានការទប់ស្កាត់ ឬកាត់បន្ថយផងដែរ។

យ៉ាងណា ថ្មីៗនេះ លោក លៀក លីដា ដែលជាផលិតករភាពយន្តល្បីឈ្មោះក៏បានចេញមកបញ្ជាក់ទៀតថា បើចង់បានរឿងក្នុងស្រុកមានគុណភាពល្អ ទាល់តែអ្នកក្នុងស្រុកគាំទ្រច្រើន។ជាមួយនោះ លោក លៀក លីដា បានទទូចឲ្យមានការចូលរួមគាំទ្រ និងលើកកម្ពស់វិស័យភាពយន្តជាតិកាន់តែផុសផុល។

លោក លៀក លីដា បានលើកឡើងថា «ព្រោះតែស្រលាញ់វិស័យនេះ ព្រោះតែចង់រត់ឲ្យទាន់ប្រទេសជិតខាង ព្រោះតែចង់ឲ្យបងប្អូនបានសប្បាយ ខ្ញុំដាក់ទុនច្រើនណាស់ រឿងនឹងជួយគាំទ្រផង»។ លោកបន្តថា «បងប្អូនជួយៗ ទៅ ដើម្បីឲ្យបានដើមមកវិញខ្លះ (ចង់បានរឿងក្នុងស្រុកមានគុណភាពល្អ ទាល់តែអ្នកក្នុងស្រុកគាំទ្រច្រើន)»។

ប្រាកដណាស់ បច្ចុប្បន្នគេសង្កេតឃើញមានផលិតករភាពយន្តមួយចំនួនបានប្រកាសពីការក្ស័យធនរហូតបិទទ្វារផលិតកម្ម និងខ្លះបានដកឃ្លាពីការផលិតរឿងដោយយកពេលទៅរកជំនួញផ្សេងៗ គ្នា ដើម្បីទ្រទ្រង់សេដ្ឋកិច្ចគ្រួសារ។ ហើយចំពោះការប្រកាសក្ស័យធន ឬឈានដល់ការបិទទ្វារផលិតកម្មនេះ មានការលើកឡើងថា ដោយសារកត្តាខ្វះការគាំទ្រពីសំណាក់មជ្ឈដ្ឋានពលរដ្ឋខ្មែរ ខណៈភាពយន្តខ្លះត្រូវចំណាយទុនរហូតខ្ទង់រាប់សែនដុល្លារក្នុងការផលិត ប៉ុន្តែនៅពេលចាក់បញ្ចាំងតាមរោងកុនគឺទទួលបានផលមិនស្មើដើមវិញទេ។ នេះជាហេតុដែលធ្វើឲ្យផលិតករខ្លះប្រកាសបិទទ្វារតែម្ដង៕

អត្ថបទ ៖ ចាន់រ៉ា