រុស្ស៊ី ប្រកាសថា អ៊ុយក្រែន ចាញ់ហើយ!

រដ្ឋមន្ត្រីការពារជាតិរុស្ស៊ី លោក Sergey Shoigu និយាយថា ការប៉ុនប៉ងរបស់ទីក្រុង កៀវ ដើម្បីវាយលុកទៅខ្សែត្រៀមជួរមុខ នៅតែមិនទទួលបានផ្លែផ្កាអ្វីសោះ ហើយពួកគេកំពុងចាញ់ និងធ្វើឲ្យកងទ័ពអ៊ុយក្រែនបាក់ស្បាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីរូបនេះបាននិយាយក្នុងអំឡុងកិច្ចប្រជុំរដ្ឋាភិបាល កាលពីថ្ងៃពុធទី១ខែវិច្ឆិកាថា “ទោះបីជាអង្គការណាតូ ផ្គត់ផ្គង់អាវុធប្រភេទថ្មីដល់អ៊ុយក្រែនក៏ដោយ ក៏ទីក្រុងកៀវ នៅតែចាញ់ដែរ។ កងកម្លាំងរុស្ស៊ី បានបន្តធ្វើកិច្ចការពារយ៉ាងសកម្ម ដោយបង្កការខូចខាតដល់សត្រូវយ៉ាងមានប្រសិទ្ធភាព”។

ទន្ទឹមនោះ លោក Shoigu បានគូសបញ្ជាក់យ៉ាងពិសេស អំពីជោគជ័យរបស់កងទ័ពការពារដែនអាកាសរុស្ស៊ី ដោយបានសរសើរពួកគេ សម្រាប់ការស្ទាក់ចាប់សព្វាវុធអ៊ុយក្រែនសរុប ១៤០០។ ក្នុងនោះក៏មានទាំង​យន្តហោះ ៣៧គ្រឿង និង​មីស៊ីល​យុទ្ធសាស្ត្រ ATACMS ៦គ្រាប់ផងដែរ។

រដ្ឋាភិបាលលោកខាងលិច បានប្តេជ្ញាថានឹងគាំទ្រអ៊ុយក្រែនជារៀងរហូត ដើម្បីកម្ចាត់រុស្ស៊ីនៅលើសមរភូមិ ប៉ុន្តែមកទល់ពេលនេះ នៅតែមានមន្ទិលសង្ស័យ ថាតើពួកគេអាចមានសមត្ថភាពជួយអ៊ុយក្រែន ដូចដែលសន្យាដែរឬទេ។

ជម្លោះនៅមជ្ឈិមបូព៌ា ដែលបានផ្ទុះឡើងកាលពីខែមុន និងបណ្តាលអ៊ីស្រាអែល មានតម្រូវការអាវុធកាន់តែខ្ពស់នោះ បានធ្វើឲ្យបណ្តាប្រទេសលោកខាងលិចមួយចំនួន កាត់បន្ថយការផ្តល់ជំនួយដល់អ៊ុយក្រែន៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ថា លោកខាងលិច មានបំណងពង្រីកជម្លោះយោធាបច្ចុប្បន្ន មកកាន់តំបន់អាស៊ីប៉ាស៊ីហ្វិក