ក្រសួងសុខាភិបាល ពង្រឹងកិច្ចសម្របសម្រួល អំពីការងារអប់រំសុខភាព

ក្រសួងសុខាភិបាល នៅថ្ងៃទី១៤ ខែវិច្ឆកា ឆ្នាំ២០២៣នេះ បានចូលរួមកិច្ចប្រជុំ ស្ដីពី ការអប់រំសុខភាព លើកកម្ពស់សុខភាព នៅ មជ្ឃមណ្ឌលជាតិលើកកម្ពស់សុខភាព ក្រោមអធិបតីភាព វេជ្ជបណ្ឌិត ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានក្រុមការងារអភិវឌ្ឍ និងគ្រប់គ្រងក្របខ័ណ្ឌអនុវត្តការជំរុញបង្កើនការងារថែទាំសុខភាពបឋម (ក.ជ.ថ.ស.ប)។

គោលបំណងនៃកិច្ចប្រជុំនេះមានដូចជា៖

•  ពង្រឹងកិច្ចសម្របសម្រួល អំពីការងារអប់រំសុខភាព លើកកម្ពស់សុខភាពទាក់ទងនឹងជំងឺឆ្លង មិនឆ្លង សុខភាពមាតាទារក អាហាររូបត្ថម្ភ និងសុខភាពសាធារណផ្សេងទៀត ដើម្បី ពង្រឹងគុណភាពនៃការផលិតសម្ភារ ការអនុវត្តយុទ្ធនាការនានា ការអប់រំសុខភាព ការចែកចាយសម្ភារៈដែលបានផលិត (one stop service សម្រាប់ការពិនិត្យគុណភាព និង resource center for IEC/BCC) ។

•  រៀបចំផែនការសម្រាប់ការផលិត និងការអប់រំសុខភាព តាមតម្រូវការសុខភាព។

•  និង កំណត់យន្តការសហការគាំទ្រគ្នាដើម្បីជំរុញការងារអប់រំសុខភាព លើកកម្ពស់សុខភាព។

កិច្ចប្រជុំ មានសមាសភាពចំនួន ២៤ រូប មកពីបណ្ដានាយកដ្ឋានផ្សេងៗដូចជា នាយកដ្ឋានប្រយុទ្ធនឹងជំងឺឆ្លង នាយកដ្ឋានការពារសុខភាព នាយកដ្ឋានសុខភាពផ្លូវចិត្ត រួមទាំងមជ្ឈមណ្ឌលជាតិនានា ដែលមានដូចជាមជ្ឈមណ្ឌលជាតិលើកកម្ពស់សុខភាព មជ្ឈមណ្ឌលជាតិគាំពារមាតា និងទារក មជ្ឈមណ្ឌលជាតិប្រយុទ្ធនឹងជំងឺអេដស៍ សើរស្បែក និងកាមរោគ មជ្ឈមណ្ឌលជាតិផ្ដល់ឈាម មជ្ឈមណ្ឌលជាតិកំចាត់រោគរបេង និងហង់សិន មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត៕