វគ្គ១៦ក្រុមជើងឯក World Cup U17 ចាប់ផ្តើមប្រកួតនៅថ្ងៃនេះ

នៅថ្ងៃទី២០ ខែវិច្ឆិកា ឆ្នាំ២០២៣ ការប្រកូតពានរង្វាន់បាល់ទាត់ពិភពលោកឆ្នាំ២០២៣ យុវជនអាយក្រោម១៧ឆ្នាំ បានឈានដល់វគ្គ១៦ក្រុមចុងក្រោយ ​ដែល​ថ្ងៃនេះ២គូ​ត្រូវ​ប្រជែង​កៅអី​វគ្គ​៨​ក្រុម​ចុង​ក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅវេលាម៉ោង ៣:៣០ នាទីថ្ងៃត្រង់ ក្រុមជម្រើសជាតិប្រេស៊ីល ត្រូវជួបក្រុមជម្រើសជាតិអេក្វាឌ័រ ក្នុងវគ្គ១៦ក្រុមចុងក្រោយ នៅកីឡដ្ឋាន Stadion Manahan ប្រទេសឥណ្ឌូណេស៊ី។​ កាល​វគ្គសន្សំពិន្ទុក្នុងពូល ប្រេស៊ីល ឈរ​លេខ​២ក្នុងពូល C ដោយប្រកួត៣លើក ឈ្នះ២ ចាញ់១ មាន៦ពិន្ទុ។ ការប្រកូតចុងក្រោយរបស់ក្រុមប្រេស៊ីលគឺយកឈ្នះក្រុមអង់គ្លេស ក្នុងលទ្ធផល ២-១ កាលពីថ្ងៃទី១៧ ខែវិច្ឆិកា ឆ្នាំ២០២៣ ។

ក្រុមអេក្វាឌ័របានឡើងមកវគ្គ១៦ចុងក្រុមចុងក្រោយ ក្នុងនាមជាក្រុមឈរនៅលេខ២ ក្នុងពូល A ប្រកួត៣លើកឈ្នះ១ ស្មើ២ មាន៥ពិន្ទុ។ ការប្រកួតចុងក្រោយរបស់ក្រុមអេក្វាឌ័រ កាលពីថ្ងៃទី១៦ ខែវិច្ឆិកា ឆ្នាំ២០២៣ បានត្រឹមស្មើគ្នា ១-១ ជាមួយក្រុមប៉ាណាម៉ា ។

នៅវេលាម៉ោង៧យប់ ក្រុមជម្រើសជាតិជប៉ុនត្រូវជួបជាមួយក្រុមជម្រើសជាតិអេស្ប៉ាញ ក្នុងវគ្គ១៦ក្រុមចុងក្រោយ ដែលការប្រកួតធ្វើនៅកីឡដ្ឋាន Stadion Manahan។ ក្រុម​យុវជន​ជប៉ុនបានឡើងមកវគ្គនេះក្នុងនាមជាក្រុមលេខ៣ល្អក្នុងពូល ដោយប្រកួត៣លើក ឈ្នះ២ ចាញ់១ មាន៦ពិន្ទុ។ ការប្រកួតចុងក្រោយរបស់ ជប៉ុន បានយកឈ្នះ សេណេហ្គាល់ ២-០ កាលពីថ្ងៃទី១៧​ ខែវិច្ឆិកា ឆ្នាំ២០២៣។

ក្រុមយុវជន​អេស្ប៉ាញបានឡើងមកវគ្គ១៦ក្រុមចុងក្រោយក្នុងនាមជាក្រុមលេខ១ ក្នុងពូល B ដោយប្រកួត៣លើក ឈ្នះ២ ស្មើ១ មាន៧ពិន្ទុ។ ការប្រកួតចុងរបស់​អេស្ប៉ាញបានត្រឹមស្មើគ្នា ២-២ ជាមួយ​អ៊ូបេគីស្ថាន​ កាលពីថ្ងៃទី១៦ ខែវិច្ឆិកា ឆ្នាំ២០២៣។

ការប្រកួតវគ្គ១៦ ក្រុមចុងក្រោយក្នុងពានរង្វាន់ World Cup U17 គឺមានរយៈពេល២ថ្ងៃគឺចាប់ពីថ្ងៃទី២០ ខែវិច្ឆិកា និងបញ្ចប់នៅថ្ងៃទី២២ ខែវិច្ឆិកា ឆ្នាំ២០២៣៕

អត្ថបទ៖ ផា រតនា