ក្រុមហ៊ុនអាកាសចរណ៍ វៀតណាម បន្តផ្អាកជើងហោះហើរក្នុងស្រុកទៅកាន់កោះ Phu Quoc និង Da Nang

ក្រុមហ៊ុនអាកាសចរណ៍វៀតណាម Bamboo Airways កាលពីថ្ងៃអង្គារ ប្រកាសផ្អាកជើងហោះហើរដែលតភ្ជាប់ពីទីក្រុង Da Nang ទៅទីក្រុងទេសចរណ៍នៃតំបន់ទំនាបកណ្ដាល Da Lat ខណៈពីទីក្រុងហាណូយទៅកាន់កោះ Phu Quoc ក៏ត្រូវបានផ្អាកដូចគ្នា ។

ចំណែកពាក់ព័ន្ធទៅនឹងមូលហេតុដែលក្រុមហ៊ុនអាកាសចរណ៍ប្រកាសផ្អាកការហោះហើរបែបនេះ គឺដោយសារតែចង់ធានាបាន​ធនធាន និងផ្តល់អទិភាពដល់ប្រសិទ្ធភាពនៃប្រតិបត្តិការហោះហើរក្រោយៗទៀត ។

Bamboo Airway ជាក្រុមហ៊ុនអាកាសចរណ៍វៀតណាមតែមួយគត់ដែលដំណើរការផ្លូវតភ្ជាប់ពីទីក្រុង Can Tho និង Phu Quoc ប៉ុន្តែ​ការហោះហើរទាំងនោះក៏ត្រូវបានផ្អាកវិញកាលពីខែមុន ខណៈកាលពី ៣ សប្តាហ៍កន្លងទៅ​ ក្រុមហ៊ុនបានផ្អាកផ្លូវហោះហើរពីហូជីមិញទៅកាន់កោះ Phu Quoc ផងដែរ ។

គួរបញ្ជាក់ថា កាលពីខែមុន ក្រុមហ៊ុនក៏បានផ្អាកជើងហោះហើរអន្តរជាតិជាបន្តបន្ទាប់ទៅកាន់គោលដៅអាស៊ី និងអឺរ៉ុបផងដែរ ខណៈបច្ចុប្បន្ន ក្រុមហ៊ុនអាកាសចរណ៍កំពុងដំណើរការហោះហើរក្នុងស្រុកសរុបចំនួន ៣២ ជើង រួមទាំងផ្លូវដែលតភ្ជាប់ពីទីក្រុងហាណូយ និងទីក្រុងហូជីមិញទៅកាន់ទីក្រុង Con Dao, Da Nang, Quy Nhon, Nha Trang និង Hue ៕

ប្រែសម្រួល៖ នាង រតនៈ

ប្រភព៖​ VN Express