ថៃ អនុញ្ញាតឲ្យបើកក្លឹបកម្សាន្ត និងបាររាត្រីរហូតដល់ម៉ោង ៤ ទៀបភ្លឺ

ខុទ្ទកាល័យរបស់នាយករដ្ឋមន្ត្រីថៃបានអនុម័តសេចក្ដីសម្រេចបន្ថែមពេល ២ ម៉ោងទៀតដល់ក្លឹបកម្សាន្ត បាររាត្រី រួមជាមួយខារ៉ាអូខេនៅតំបន់ទេសចរណ៍សំខាន់ៗដូចជា​ បាងកក ភូកេត ប៉ាតាយ៉ា ឈៀងម៉ៃ និងសាមុយ ឲ្យបើកបានរហូតដល់ម៉ោង ៤ ទៀបភ្លឺ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងបញ្ហានេះដែរ លោកនាយករដ្ឋមន្ត្រីថៃ សេដ្ឋា ថាវីស៊ីន បញ្ជាក់ថា ច្បាប់ថ្មីនេះនឹងចូលជាធរមាន​ចាប់ពីថ្ងៃទី ១៥ ខែធ្នូតទៅ ដោយសារតែឧស្សាហកម្មទេសចរណ៍ គឺជាកត្តាជំរុញដ៏សំខាន់នៃសេដ្ឋកិច្ចរបស់ថៃ ស្របពេលបច្ចុប្បន្នប្រទេសមួយនេះកំពុងមានកំណើនយឺតជាងគេ បើប្រៀបធៀបនឹងដៃគូក្នុងតំបន់ ។

ទន្ទឹមនោះ ការសម្រេចចិត្តអនុញ្ញាតឲ្យកន្លែងកម្សាន្តបើកបានយូរជាងមុននេះ គឺជាជំហានចុងក្រោយបង្អស់របស់រដ្ឋាភិបាលក្នុងការជំរុញការមកដល់របស់ជនបរទេស បន្ទាប់កាលពីខែកញ្ញា ថៃបានលើកលែងតម្រូវការទិដ្ឋាការសម្រាប់ភ្ញៀវទេសចរចិន រួមជាមួយប្រទេសមួយចំនួនផ្សេងទៀត ។

ចាប់តាំងពីដើមឆ្នាំ​រហូតមកដល់ពេលនេះ ថៃបានស្វាគមន៍ភ្ញៀវទេសចរណ៍បរទេសចំនួន ២៤.៥ លាននាក់ ខណៈតាមគោលដៅកំណត់មានរហូតដល់ ២៨ លាននាក់សម្រាប់រយៈពេលពេញមួយឆ្នាំ ។

គួរបញ្ចាក់ថា នៅមុនពេលជំងឺរាតត្បាត ប្រទេសថៃបានកត់ត្រាចំនួនភ្ញៀវទេសចរជិត ៤០ លាននាក់ ដោយក្នុងនោះមាន ១១ លាននាក់មកពីប្រទេសចិន ខណៈនៅឆ្នាំនេះ រដ្ឋាភិបាលរំពឹងនឹងមានភ្ញៀវមកពីប្រទេសចិនត្រឹមតែ ៣.៥ លាននាក់ប៉ុណ្ណោះ ៕

ប្រែសម្រួល៖ នាង រតនៈ

ប្រភព៖ MSN