សមាជិកណាតូមួយប្រទេស បន្ទោសអាមេរិក ចំពោះការរារាំងដំណោះស្រាយសន្តិភាពនៅ ហ្គាហ្សា

បន្ទាប់ពីសហរដ្ឋអាមេរិករារាំងសេចក្តីសម្រេច ដែលអំពាវនាវឲ្យមានបទឈប់បាញ់មនុស្សធម៌ភ្លាមៗនៅតំបន់ហ្គាហ្សា ប្រធានាធិបតីតួកគីលោក Recep Tayyip Erdogan បានរិះគន់ក្រុមប្រឹក្សាសន្តិសុខអង្គការសហប្រជាជាតិ (UNSC) ដោយបញ្ជាក់ថា ស្ថាប័ននេះ បានក្លាយអ្នកការពារអ៊ីស្រាអែលព្រោះតែឥទ្ធិពលរបស់ទីក្រុងវ៉ាស៊ីនតោន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Erdogan បានសង្កត់ធ្ងន់ក្នុងសុន្ទរកថានៅឯព្រឹត្តិការណ៍ទិវាសិទ្ធិមនុស្សពិភពលោក ក្នុងទីក្រុងអ៊ីស្តង់ប៊ុលកាលពីថ្ងៃអាទិត្យទី១០ខែធ្នូថា “ដោយសារការវេតូរបស់សហរដ្ឋអាមេរិកនោះហើយ ទើបគ្មានសេចក្តីសម្រេចណាមួយកើតឡើង។ វាជារឿងចាំបាច់ណាស់ សម្រាប់ក្រុមប្រឹក្សាសន្តិសុខអង្គការសហប្រជាជាតិ ដែលត្រូវតែកែទម្រង់។

ដោយសម្តែងការខកចិត្តនៅ UNSC, លោក Erdogan និយាយថា “ថ្វីបើតួកគី ជាសម្ព័ន្ធមិត្តអង្គការណាតូរបស់សហរដ្ឋអាមេរិកក៏ដោយ ប៉ុន្តែយើងបានបាត់បង់ក្តីសង្ឃឹម និងការរំពឹងទុកចំពោះក្រុមប្រឹក្សាសន្តិសុខអង្គការសហប្រជាជាតិ ទៅហើយ”។

លោកអះអាងថា ចាប់តាំងពីថ្ងៃទី៧ខែតុលាមក នៅពេលកងកម្លាំងការពារអ៊ីស្រាអែល (IDF) បើកការវាយប្រហារលើតំបន់ហ្គាហ្សា ដើម្បីសងសឹកទៅនឹងការវាយលុកដោយក្រុមប្រដាប់អាវុធប៉ាឡេស្ទីនហាម៉ាស ដែលបានសម្លាប់មនុស្សយ៉ាងតិច១២០០នាក់, UNSC ដែលធ្លាប់តែមានបេសកកម្មបង្កើតសន្តិភាពពិភពលោកនោះ បែរប្រែក្លាយ​ជា​អ្នក​ការពារ​អ៊ីស្រាអែលទៅវិញ។ រដ្ឋបាលអ៊ីស្រាអែល ដែលមានការគាំទ្រឥតងាករេពីប្រទេសលោកខាងលិច កំពុងប្រព្រឹត្តអំពើឃោរឃៅ និងការសម្លាប់រង្គាលនៅហ្គាហ្សា។

យោងតាមក្រសួងសុខាភិបាលហ្គាហ្សា ចំនួនមនុស្សស្លាប់ដោយសារសកម្មភាពរបស់អ៊ីស្រាអែលក្នុងរយៈពេលពីរខែចុងក្រោយនេះ មានប្រមាណ ១៧,៧០០ នាក់ ខណៈ ៤៨,៨០០ នាក់ផ្សេងទៀតរងរបួស ។

បន្ទាប់ពីការដួលរលំនៃការផ្អាកបាញ់មនុស្សធម៌រយៈពេលមួយសប្តាហ៍ជាមួយក្រុមហាម៉ាស, អ៊ីស្រាអែលបានបន្តការវាយលុកយោធារបស់ខ្លួនជាថ្មី នៅតំបន់ហ្គាហ្សាកាលពីថ្ងៃទី១ខែធ្នូ។

ក្រោយមក សហរដ្ឋអាមេរិកបានវេតូសេចក្តីសម្រេចរបស់ UNSC សម្រាប់បទឈប់បាញ់មនុស្សធម៌ជាបន្ទាន់មួយកាលពីថ្ងៃសុក្រ ធ្វើឲ្យការបោះឆ្នោតនៅក្នុងក្រុមប្រឹក្សាដែលមានសមាជិក ១៥ រូប ទទួលបានសំឡេងគាំទ្រ ១៣ ទល់នឹងសំឡេងប្រឆាំង ១ ចំណែកចក្រភពអង់គ្លេសអនុបវាទ ៕

ប្រែសម្រួល៖ Vann Vann

ប្រភព៖ RT 

ចុចអាន៖ កាតា ថា ឱកាសនៃបទឈប់បាញ់នៅហ្គាហ្សា កាន់តែខើចទៅៗ