គន្លឹះខ្លះៗ ក្នុងការជ្រើសរើសអាហារដ៏ត្រឹមត្រូវសម្រាប់កូនតូច

ក្នុងនាមជាឪពុកម្តាយ ការធានាអាហារមានជីវជាតិ និងសុវត្ថិភាពសម្រាប់កូន គឺជារឿងអាទិភាពចម្បង។ ការផ្តល់អាហារត្រឹមត្រូវ ពិតជាមានសារៈសំខាន់ណាស់ ជាពិសេស ក្នុងអំឡុងពេលបីឆ្នាំដំបូងនៃជីវិត នៅពេលដែលកូនរបស់អ្នកលូតលាស់យ៉ាងឆាប់រហ័ស ហើយត្រូវការថាមពល និងសារធាតុចិញ្ចឹមច្រើន។

សម្រាប់កុមារអាយុចន្លោះពី ៦ខែដល់ ៣ឆ្នាំ ផ្លែឈើ និងបន្លែស្រស់ គ្រាប់ធញ្ញជាតិ សាច់ឆ្អិនទន់ ត្រី និងស៊ុត គឺជាជម្រើសដ៏ល្អ។ យ៉ាងណាមិញ ថ្មីៗនេះ យូនីសេហ្វ បានប្រាប់ពីគន្លឹះខ្លះៗ ដែលអាចជួយជ្រើសរើសអាហារដំបូងបានត្រឹមត្រូវសម្រាប់កូនរបស់អ្នកដែលមានអាយុក្រោម ៣ឆ្នាំ។

១.ផ្តល់អាហារសម្បូរជីវជាតិច្រើនប្រភេទ

ប្រសិនបើកូនរបស់អ្នកមានអាយុក្រោម ២ឆ្នាំ សូមបន្តបៅដោះតាមដែលកូនចង់បាន។ លើសពីនេះ ផ្តល់អាហារបន្ថែមជាច្រើនមុខជារៀងរាល់ថ្ងៃ ដើម្បីផ្តល់ឱ្យកូនរបស់អ្នកនូវឱកាសដ៏ល្អបំផុតក្នុងការទទួលបានសារធាតុចិញ្ចឹមទាំងអស់ដែលគេត្រូវការ។ ជាពិសេស ការផ្តល់ឱ្យនូវផ្លែឈើ និងបន្លែជាច្រើនប្រភេទ ដោយធានាថា កូនតូចរបស់អ្នកទទួលបានវីតាមីន សារធាតុរ៉ែ ជាតិសរសៃ និងសារធាតុប្រឆាំងអុកស៊ីតកម្មដែលគេត្រូវការ។ ត្រូវប្រាកដថា បានរួមបញ្ចូលផងដែរនូវប្រូតេអ៊ីន (ទឹកដោះគោ ស៊ុត សាច់ ត្រី ឬ ដូចជា តៅហ៊ូ សណ្តែក) ក្នុងអាហាររបស់កូនអ្នក ក៏ដូចជាប្រេង ឬខ្លាញ់តិចតួចសម្រាប់ថាមពល។

២.ជ្រើសរើសអាហារក្នុងស្រុក  

អ្វីដែលស្រស់ អាចរកបានក្នុងស្រុក និងត្រូវបានចម្អិន និងបរិភោគតាមប្រពៃណីក្នុងគ្រួសារ ឬវប្បធម៌របស់អ្នក គឺជាជម្រើសដែលមានសុខភាពល្អសម្រាប់កូនរបស់អ្នក។ ត្រូវចងចាំថា នៅពេលអ្នកណែនាំកូនរបស់អ្នកឱ្យស្គាល់អាហារដំបូងដែលមានសុខភាពល្អដំបូងក្នុងជីវិត នោះអ្នកកំពុងបង្កើតទម្លាប់ញ៉ាំអាហារដែលមានសុខភាពល្អដល់ពួកគេបានពេញមួយជីវិត។

៣.ជៀសវាងអាហារដំបូងដែលមានជាតិស្ករ និងអំបិលខ្ពស់ 

ប្រសិនបើអ្នកសម្រេចចិត្តទិញអាហារវេចខ្ចប់សម្រាប់កូនតូចរបស់អ្នក វាជារឿងសំខាន់ក្នុងការអានស្លាកសញ្ញាអាហារូបត្ថម្ភនៅខាងក្រោយផលិតផលមុននឹងទិញអ្វីទាំងអស់ ត្រូវពិនិត្យមើលជាតិស្ករ និងអំបិល។ ​ការ​ទទួលទាន​ជាតិ​ស្ករ​ខ្ពស់ ពិសេស​នៅ​អាយុ​ក្មេង អាច​នាំ​ឱ្យ​មាន​ការឡើង​ទម្ងន់ និងជាទម្លាប់​ញ៉ាំ​មិនល្អ​ក្នុង​ជីវិត​​។ ចំណែក របបអាហារដែលមានជាតិប្រៃអាចបង្កើនសម្ពាធឈាម សូម្បីតែចំពោះកុមារតូចៗ ហើយក៏ប៉ះពាល់ដល់សុខភាព និងចំណង់ចំណូលចិត្តរយៈពេលវែងរបស់កូនអ្នកផងដែរ។​

 ៤. រៀបចំផែនការដោយប្រុងប្រយ័ត្ន និងការជ្រើសរើសអាហារសម្រន់ 

អាហារសម្រន់ដែលមានសុខភាពល្អអាចបន្ថែមទៅលើការទទួលទានសារធាតុចិញ្ចឹមរបស់កុមារ។ នំបុ័ង  ឈីស ឬផ្លែឈើ សុទ្ធតែជាអាហារដែលងាយស្រួលញ៉ាំ និងមានជីវជាតិសម្រាប់កុមារ។ ប្រសិនបើអ្នកជ្រើសរើសទិញអាហារសម្រន់ដែលបានវេចខ្ចប់ និងអាហារដ៏ទៃទៀត ត្រូវប្រាកដថា បានអានដោយប្រុងប្រយ័ត្ននូវបញ្ជីគ្រឿងផ្សំ ព្រោះអាហារទាំងនេះច្រើនតែអាចកែច្នៃបានខ្ពស់។ នៅអាស៊ីអាគ្នេយ៍ ៧២ភាគរយនៃអាហារសម្រន់ទាំងនេះ មានបន្ថែមជាតិស្ករ។ 

ការបន្ថែមតម្លៃអាហារូបត្ថម្ភទៅក្នុងរបបអាហាររបស់កូនអ្នក អាចជួយបង្កើតទម្លាប់ទទួលទានអាហារដែលមានសុខភាពល្អនៅដំណាក់កាលដំបូង៕