ទោះមានសង្គ្រាម អ៊ីស្រាអែលនឹងចូលរួម​កីឡាអូឡាំពិក២០២៤នៅបារាំង១០០%

ប្រធានគណៈកម្មាធិការអូឡាំពិកអ៉ីស្រាអែល លោក Yaël Arad បានធានាកាលពីថ្ងៃព្រហស្បតិ៍បាន​បញ្ជាក់​ពី​អ៉ីស្រាអែល នឹងមានវត្តមាន​១០០% ​ក្នុងព្រឹត្តិការណ៍កីឡាអូឡាំពិក ទីក្រុងប៉ារីស នៅឆ្នាំ២០២៤ ត្រឹមតែជាងពីរខែ បន្ទាប់ពីការផ្ទុះជម្លោះជាមួយក្រុមហាម៉ាស់។

អតីតកីឡាករយូដូ​រូបនេះបាននិយាយថា ៖«យើងខិតជិតដល់ព្រឹត្តិការណ៍កីឡាអូឡាំពិកជាមួយនឹងទំនុកចិត្តថាយើងនឹងទៅទីនោះ១០០ភាគរយ។ យើងនឹងអាចចូលរួមបានដូចប្រទេសដទៃទៀត»។

ការវាយប្រហារថ្ងៃទី៧ ខែតុលា ដែលមិនធ្លាប់មានពីមុនមកដោយចលនាអ៉ីស្លាម​ហាម៉ាស់បានសម្លាប់មនុស្ស​​១១៤០​នាក់​ ក្នុង​ប្រទេសអ៉ីស្រាអែល​ដែលភាគច្រើនជាជនស៊ីវិល។ នេះបើយោងតាមការបូកសរុបដោយ AFP ដោយផ្អែកលើតួ​លេខ​ផ្លូវការចុងក្រោយរបស់អ៉ីស្រាអែល។

អ៉ីស្រាអែល​បានឆ្លើយតបដោយការវាយប្រហារតាមអាកាសលើតំបន់ហ្គាហ្សា បន្ទាប់មក​វាយ​ប្រហារផ្លូវ​គោក។

ក្រុម​ហាម៉ាស់បាននិយាយកាលពីថ្ងៃពុធថា ប្រតិបត្តិការយោធាអ៉ីស្រាអែល​បានសម្លាប់មនុស្ស ២០ ០០០នាក់នៅក្នុងតំបន់ហ្គាហ្សា ចាប់តាំងពីសង្រ្គាមបានចាប់ផ្តើម ក្នុង​នោះ​មាន​កុមារយ៉ាងហោចណាស់ ៨០០០នាក់ និងស្ត្រី ៦២០០នាក់។

លោក Yaël Arad បាននិយាយថា ៖«យើងនៅតែ​ភ្ញាក់ផ្អើលចំពោះ​ថ្ងៃទី៧ ខែតុលា។ វាពិបាកក្នុងការដេកលក់ហើយភ្ញាក់ឡើង មនុស្សគ្រប់គ្នាបានបាត់បង់នរណាម្នាក់ដែលនៅជិតពួកគេ»។

នៅក្នុងគំនិតរបស់លោក ៖«វាជាការលំបាកសម្រាប់អត្តពលិកក្នុងការស្រមៃថា ការហ្វឹកហាត់ក្នុងកាលៈទេសៈបែបនេះដើម្បីធ្វើអ្វីមួយក្រៅពីជួយជនរួមជាតិរបស់ពួកគេ។ ប៉ុន្តែគណៈកម្មាធិការអូឡាំពិកអ៉ីស្រាអែល​បានស្នើឲ្យពួកគេ​លើក​ទង់ជាតិរបស់ប្រទេសឲ្យខ្ពស់នៅព្រឹត្តិការណ៍អូឡាំពិក»៕

ប្រែសម្រួល៖ មន្នីរ័ត្ន
ប្រភព៖ Inside The Games