មិនបាច់ទៅចាក់បង្គា ចាប់សត្វសមុទ្រឯណាឆ្ងាយទេ តែជាង ១០គ.ម ពីក្រុងកែប កម្សាន្តបានពេញមួយរាត្រី

កន្លងមក សម្រាប់ដំណើរកម្សាន្តបែបមាត់សមុទ្រ ចាក់បង្គា ចាក់មឹក ទេសចរច្រើននិយមឆ្លងទៅតំបន់កោះ និងត្រូវធ្វើដំណើររាប់រយគីឡូ ប៉ុន្តែឥឡូវនេះ ចំណាយពេលត្រឹមតែប្រហែល ២ម៉ោង ឆ្ពោះទៅកាន់ខេត្តកែប ក៏អាចលំហែកាយបែបនេះបាន និងថែមទាំងមិនបាច់ឆ្លងទៅតំបន់កោះថែមទៀត។

កម្ពុជាថ្មី សូមណែនាំកន្លែងទេសចរណ៍ឆ្នេរសមុទ្រមួយកន្លែង ដែលជាឆ្នេរធម្មជាតិថ្មីមួយលើទឹកដីនៃ ភូមិអង្កោល ឃុំអង្កោល ស្រុកដំណាក់ចង្អើរ ខេត្តកែប កំពុងជាទីចាប់អារម្មណ៍ខ្លាំង សម្រាប់ដំណើរកម្សាន្តរៀងរាល់ចុងសប្តាហ៍ គឺ «ឆ្នេរអង្គោល» ។

ឆ្នេរអង្កោល ជាឆ្នេរធម្មជាតិថ្មីមួយ មានទេសភាពស្រស់ត្រកាល មិនចាញ់តំបន់ឆ្នេរផ្សេងប៉ុន្មានឡើយ មានឆ្នេរដ៏វែង ជាមួយនឹងកញ្ចុះជាច្រើន ទេសចរអាចមកសម្រាកកម្សាន្តជាមួយមិត្តភក្តិ និងក្រុមគ្រួសារបានដោយរីករាយ។

បើតាមអ្នកប្រកបអាជីវកម្មនៅតំបន់ទេសចរណ៍មួយនេះ បញ្ជាក់ថា ទេសចរ ច្រើនមកលេងកម្សាន្តនាពេលល្ងាច គយគន់ថ្ងៃលិច លេងទឹក និងធ្វើសកម្មភាពកម្សាន្តផ្សេងទៀត ពិសេសគឺចាប់សត្វសមុទ្រនៅពេលយប់។

សម្រាប់ការកម្សាន្តនៅតំបន់ឆ្នេរនេះ ទេសចរអាចកុម្ម៉ង់ម្ហូបទទួលទានបាន និងអាចស្វែងរកការសម្រាកនៅផ្ទះលំហែក្បែរនោះ ឬបោះតង់នៅមាត់ឆ្នេរតែម្តងបាន៕