ជាងភ្លេីង ២នាក់ មិនពាក់ឧបករណ៍សុវត្ថិភាព ​រអិលធ្លាក់ពីលេីអគារកំពុងសាងសង់

ជាងភ្លេីងចំនួន ២នាក់​ បានរងរបួសធ្ងន់ ត្រូវបានបញ្ជូនទៅសង្គ្រោះ បន្ទាប់ពីឡើងតបណ្ដាញភ្លើង បានរអិលធ្លាក់ពីលើរន្ទា ពីលើអគារការដ្ឋានកំពុងសាងសង់ឃ្លាំងភេសជ្ជៈ អេរ៉ាហ្គោល ខមភើរេសិន ស្ថិតនៅផ្លូវសាលាកសិកម្មចម្ការដូង ភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍គ្រោះថ្នាក់នេះ បានកើតឡើង នៅវេលាម៉ោង ៩ និង ២០ នាទីព្រឹក ថ្ងៃទី០៣ ខែកុម្ភៈ ឆ្នាំ២០២៤។ ជនរងគ្រោះទាំង ២ នាក់ រួមមាន​៖ ទី១ ឈ្មោះ ស៊ាង វឌ្ឍនៈ ភេទប្រុស អាយុ ២៥ ឆ្នាំ មុខរបរកម្មករ និងទី២ ឈ្មោះ ប៉េង អរ ភេទប្រុស អាយុ ១៩ ឆ្នាំ មុខរបរកម្មករ។

​

បេីតាមប្រភពព័ត៌មាននៅកន្លែងកើតហេតុបានឱ្យដឹងថា ជាងមួយក្រុមបានឡើងរន្ទាតបណ្ដាញប្រព័ន្ធភ្លើងអគារកំពុងសាងសង់ក្នុងបរិវេណឃ្លាំងស្តុកភេសជ្ជៈ ដោយមិនពាក់ឧបករណ៍សុវត្ថិភាពនោះទេ ក្រោយមកស្រាប់តែឃើញធ្លាក់ពីលើរន្ទា បណ្ដាលឱ្យកម្មករជាងភ្លើង ២ នាក់របួសធ្ងន់ ត្រូវបានរថយន្តសង្គ្រោះរបស់មន្ទីរពេទ្យបង្អែកដង្កោ ដឹកបញ្ជូនទៅជួយសង្រ្គោះ។

​

បច្ចុប្បន្ន​ ជនរងគ្រោះទាំងពីរនាក់ខាងលើកំពុងសម្រាកព្យាបាលនៅមន្ទីរពេទ្យមិត្តភាពខ្មែរសូវៀត តាមការស្នើសុំពីមេការជនរងគ្រោះ រីឯម្ចាស់ទីតាំង នៅពេលកម្លាំងសមត្ថកិច្ចមូលដ្ឋានចុះទៅពិនិត្យកន្លែងកើតហេតុមិនព្រមសហការនោះទេ ព្យាយាមលាក់បាំងសមត្ថកិច្ចទៅវិញ៕

អត្ថបទ៖ ​សុខា