ក្រសួង រៀបចំវិធីសាស្រ្តបង្រៀនគណិតវិទ្យាបឋមសិក្សា ប្រធានបទ គ្រប់គ្នាចេះលេខស្ទាត់ជំនាញ

នាថ្ងៃទី២៩ ខែកុម្ភៈ ឆ្នាំ២០២៤ នាយកដ្ឋានបឋមសិក្សា នៃក្រសួងអប់រំ យុវជន និងកីឡា បានសហការជាមួយមជ្ឈមណ្ឌលស្រាវជ្រាវគរុកោសល្យជំនាន់ថ្មីរៀបចំសន្និសីទថ្នាក់ជាតិស្ដីពី “វិធីសាស្រ្តបង្រៀនគណិតវិទ្យានៅកម្រិតបឋមសិក្សា” ក្រោមប្រធានបទ៖ គ្រប់គ្នាចេះលេខស្ទាត់ជំនាញ (Everybody Count: Math Mastery) នៅសាលសម្ដេចអគ្គមហាសេនាបតីតេជោ ហ៊ុន សែន (សាលធំ នៃវិទ្យាស្ថានជាតិអប់រំ)។

សន្និសីទនេះមានការអញ្ជើញចូលរួមពីថ្នាក់ដឹកនាំក្រសួងអប់រំ យុវជន និងកីឡា ថ្នាក់ដឹកនាំ និងមន្ត្រី នៃនាយកដ្ឋានបឋមសិក្សា អង្គការជាតិ អន្តរជាតិ ពាក់ព័ន្ធនឹងបឋមសិក្សា លោក លោកស្រីប្រធាន អនុប្រធានមន្ទីរអប់រំយុវជន និងកីឡា រាជធានី ខេត្តទទួលបន្ទុកបឋមសិក្សា (ការិយាល័យបឋមសិក្សា) លោកនាយក លោកស្រីនាយិកា សាលាបឋមសិក្សាក្នុងរាជធានីភ្នំពេញទាំងអស់ លោកនាយក លោកស្រីនាយិកា សាលាបឋមសិក្សាស្ថិតនៅក្រោមគម្រោងកុមារកម្ពុជារីករាយ នាយកសាលាគរុកោសល្យ និងវិក្រឹតការខេត្ត គ្រូប្រឹក្សាគរុកោសល្យនៃមជ្ឈមណ្ឌលស្រាវជ្រាវគរុកោសល្យជំនាន់ថ្មី នៃវិទ្យាស្ថានជាតិអប់រំ គ្រូបង្គោល គ្រូឧទ្ទេស សរុបចំនួន ៤០០នាក់។

សន្និសីទជាតិ ស្តីពី វិធីសាស្រ្តបង្រៀនគណិតវិទ្យា នៅកម្រិតបឋមសិក្សា ប្រមូលផ្តុំអ្នកអប់រំ អ្នកស្រាវជ្រាវ អ្នកបង្កើតគោលនយោបាយ និងអ្នកជំនាញផ្នែកឧស្សាហកម្ម​ មកពីជុំវិញពិភពលោកដើម្បីឈ្វេងយល់ពីឧត្តមានុវត្តន៍ នៃការអប់រំគណិតវិទ្យានៅកម្រិតបឋមសិក្សានៅកម្ពុជា។

សន្និសីទនេះមានរយៈពេល ១ថ្ងៃ គឺថ្ងៃទី២៩ ខែកុម្ភៈ ឆ្នាំ២០២៤​ និងបន្តដោយសិក្ខាសាលាបង្ហាញគំរូបច្ចេកទេស នៃការបង្រៀនគណិតវិទ្យានៅកម្រិតបឋមសិក្សា​ ជូនដល់លោកគ្រូ អ្នកគ្រូដែលបង្រៀននៅរាជធានីភ្នំពេញ ​និងមន្រ្តីគ្រប់គ្រងកម្មវិធីបឋមសិក្សាពាក់ព័ន្ធចំនួន ១០០នាក់ រយៈពេល ២ថ្ងៃ គឺនៅថ្ងៃទី១-២ ខែមីនា ឆ្នាំ២០២៤ ដោយផ្តោតសំខាន់លើ គ្រប់គ្នាចេះលេខស្ទាត់ជំនាញ ជាកម្មវិធីរៀន និងបង្រៀនគណិតវិទ្យាបង្កើតឡើងដើម្បីលើកកម្ពស់អក្ខរកម្ម និងជំនាញគណិតវិទ្យា​ ក្នុងចំណោម សិស្សានុសិស្សកម្រិតបឋមសិក្សាទាំងអស់។

កម្មវិធីនេះផ្តោតសំខាន់លើការជំរុញការចូលរួមដោះស្រាយលំហាត់គណិតវិទ្យា ដែលអាចឱ្យសិស្សានុសិស្សទាំងអស់ អាចចូលរួមប្រើប្រាស់បានគ្រប់ៗគ្នា តាមរយៈការប្រើឧបករណ៍ឌីជីថល។ កម្មវិធីនេះបានប្រើប្រាស់ វិធីសាស្ត្រអន្តរកម្ម ដោយមានមេរៀនដែលគួរឱ្យចាប់អារម្មណ៍ជាមួយនឹង តួអក្សរ ជីវចលនា ល្បែងសិក្សា និងមាតិកាដែលគួរឱ្យទាក់ទាញ ដើម្បីជំរុញឱ្យសិស្សានុសិស្សចូលរួមរៀនអំពីបញ្ញត្តិគណិតវិទ្យា និងអភិវឌ្ឍបំណិនសិក្សាពេញមួយជីវិត។ មេរៀនទាំងអស់ត្រូវបានរចនាឡើងដើម្បីឱ្យមានភាពស្វាហាប់ ដោយរួមបញ្ចូលនូវសកម្មភាព ហ្គេម និងឧទាហរណ៍ក្នុងពិភពពិតជាក់ស្តែងជាច្រើន ដើម្បីបង្ហាញ ពីភាពពាក់ព័ន្ធគ្នា នៃគណិតវិទ្យាក្នុងជីវភាពប្រចាំថ្ងៃ។ វាជាគោលវិធីបង្រៀនបែប “គិត ដោះស្រាយ សម្រប អនុវត្ត និងអភិវឌ្ឍ” កំណត់ដំណើរការសិក្សាដោយផ្តោតសំខាន់លើជំនាញដែលបានអនុវត្ត និងការដោះស្រាយបញ្ហា។

សរុបមក កម្មវិធីធ្វើឱ្យគ្រប់គ្នាចេះលេខស្ទាត់ជំនាញ មានគោលបំណងជំរុញឱ្យមានការផ្លាស់ប្តូរអាកប្បកិរិយាបែបវិជ្ជមានចំពោះគណិតវិទ្យា ផ្តល់សិទ្ធិអំណាចដល់សិស្សានុសិស្សដើម្បីក្លាយខ្លួនជាអ្នកដោះស្រាយបញ្ហាប្រកបដោយទំនុកចិត្ត និងបំពាក់បំប៉ន នូវជំនាញដែលសិស្សានុសិស្សត្រូវការ ដើម្បីទទួលបានជោគជ័យក្នុងសាលារៀន និងលើសពីនេះ។ តាមរយៈការបង្កើតបរិយាកាសសិក្សា ដែលមានអន្តរកម្ម និងប្រកបដោយបរិយាបន្ន កម្មវិធីនេះ ធានាឱ្យបានថា គ្រប់គ្នាចេះលេខស្ទាត់ជំនាញ​ នៅពេលនិយាយទៅដល់ការអប់រំគណិតវិទ្យា៕