លោក ថាក់ស៊ីន ក្លាយជា ឥស្សរជននយោបាយមានឥទ្ធិពលបំផុតនៅប្រទេស ថៃ

ក្រោយការស្ទង់មតិលើមនុស្សអាយុ១៨ឆ្នាំឡើងចំនួន១៣១០នាក់ នៅគ្រប់តំបន់នៃប្រទេសថៃ, វិទ្យាស្ថានជាតិគ្រប់គ្រងការអភិវឌ្ឍ (NIDA) បានបង្ហាញលទ្ធផលថា អតីតនាយករដ្ឋមន្ត្រី ថាក់ស៊ីន ស៊ីណាវ៉ាត្រា បានជាប់ឈ្មោះជាឥស្សរជននយោបាយដ៏មានឥទ្ធិពលបំផុតនៅក្នុងប្រទេស ខណៈអ្នកខាងបក្សប្រឆាំងគឺលោក Pita Limjaroenrat ទទួលបានការអាណិតអាសូរពីសាធារណជនខ្លាំងជាងគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Bangkok Post បានចុះផ្សាយថា ការស្ទង់មតិជាសាធារណៈនេះ ធ្វើឡើងចាប់ពីថ្ងៃទី២៧ដល់ ២៩ ខែកុម្ភៈឆ្នាំ២០២៤ លើប្រជាជននៅគ្រប់កម្រិតអប់រំ មុខរបរ និងអ្នកមានប្រាក់ចំណូលទូទាំងប្រទេស។

នៅពេលសួរមតិថាតើអ្នកណា ដែលគេចាត់ទុកថាជាឥស្សរជននយោបាយមានឥទ្ធិពលបំផុត, លទ្ធផលបង្ហាញថា លោក ថាក់ស៊ីន ទទួលបានសំឡេងគាំទ្រ ៤២,៩០%, លោកនាយករដ្ឋមន្ត្រីសេដ្ឋាថាវីស៊ីន ទទួលបាន២១,៩១% និងអតីតមេដឹកនាំគណបក្សចលនាឆ្ពោះទៅមុខលោក Pita Limjaroenrat ទទួលបាន១៧,៤០%។ 

ស្របពេលជាមួយគ្នានោះដែរ នៅពេលសួរថា តើអ្នកណាជាឥស្សរជននយោបាយទាំងបី ដែលសាធារណជនអាណិតអាសូជាងគេនោះ លទ្ធផលបង្ហាញថា លោក Pita ទទួលបានសំឡេង៤៦,៧៩% ខណៈ១៧,៨៦%និយាយថា ពួកគេគ្មានអាណិតអ្នកនយោបាយរូបណាទាំងអស់ និង១១,៤៥% ជ្រើសរើសយកអតីតមេដឹកនាំគណបក្សអនាគតឆ្ពោះទៅមុខលោក Thanathorn Juangroongruangkit។

សូមបញ្ជាក់ជាថ្មី លោក ថាក់ស៊ីន ដែលឡើងកាន់តំណែងលើកដំបូងជានាយករដ្ឋមន្ត្រីរបស់ថៃនៅថ្ងៃទី៩ ខែកុម្ភៈ ឆ្នាំ២០០១ និងលើកទី២នៅថ្ងៃទី១១ខែមីនាឆ្នាំ២០០៥ គឺត្រូវបានដោះលែងឲ្យមានសេរីភាព ហើយវិលត្រលប់ទៅផ្ទះរស់ជុំគ្រួសារវិញកាលពីថ្ងៃអាទិត្យទី១៨ខែកុម្ភៈ។ លោក បាន​វិល​ចូលស្រុកនៅ​ថ្ងៃ​ទី២២ ខែ​សីហា ឆ្នាំ២០២៣ បន្ទាប់​ពីរស់នៅ​និរទេសអស់រយៈពេល ១៥ ឆ្នាំ​ ហើយនៅ​ថ្ងៃ​ដដែល​នោះ តុលាការ​កំពូល​ក៏បាន​កាត់ទោសអតីតនាយករដ្ឋមន្ត្រីរូបនេះ ឲ្យជាប់ពន្ធនាគាររយៈពេល ៨ ឆ្នាំក្នុងសំណុំរឿងក្ដីក្ដាំចំនួន ៣ ករណី។

ប៉ុន្តែភ្លាមៗនោះ​ លោក ថាក់ស៊ីន ត្រូវគេបញ្ជូនចេញពីពន្ធនាគារក្រុងបាងកកទៅកាន់មន្ទីរពេទ្យប៉ូលិសទាំងកណ្ដាលអធ្រាត្រ ដោយសារលោកមានអាការតឹងទ្រូង និងគេងមិនលក់ ហើយក្រោយការពិនិត្យរូច មន្ត្រីពេទ្យបានរកឃើញថា លោក ថាក់ស៊ីន មានជំងឺលើសឈាម ដោយតម្រូវឲ្យមន្ត្រីពន្ធនាគារធ្វើការតាមដានសុខភាពរបស់លោកយ៉ាងដិតដល់ ក្នុងអំឡុងពេលសម្រាកព្យាបាល ។

ទោះយ៉ាងណា ក្រោយមក លោក ថាក់ស៊ីន ត្រូវបានព្រះមហាក្សត្រ មហាវជ្ជរ៉ា ឡុងកន សម្រេចព្រះទ័យបន្ថូរបន្ថយទោសជាប់ពន្ធនាគារពី ៨ ឆ្នាំមកនៅត្រឹម ១ ឆ្នាំកាលពីថ្ងៃទី១ ខែកញ្ញា ឆ្នាំ២០២៣ ដោយសារតែទ្រង់មានព្រះរាជតម្រិះពិចារណាលើអង្គហេតុ ក៏ដូចជាកត្តាមួយចំនួនដូចជា មហាសេដ្ឋីរូបនេះមានភក្ដីភាពចំពោះរាជានិយម នៅពេលលោកកាន់តំណែងជានាយករដ្ឋមន្ត្រី និងនាំប្រទេសជាតិ និងប្រជានុរាស្ត្រទទួលបានផលប្រយោជន៍ជាច្រើន៕

អត្ថបទ៖ សុខ សុវណ្ណ

ចុចអាន៖ ដំណើរជីវិត និងការចាប់កំណើតអាជីពនយោបាយលោក ថាក់ស៊ីន