កីឡា

កីឡាការិនី៧រូបកំពុងតស៊ូក្នុងអាជីពឈឺខ្លួនដើម្បីគុនខ្មែរ

បានផុស

២ years មុន

នៅ

ថ្ងៃព្រហស្បតិ៍ ១៤ មីនា ២០២៤

ដោយ

កីឡាការិនីប្រដាល់គុនខ្មែរមិនមានច្រើនទេដែលកំពុងឡើងសង្វៀននាពេលបច្ចុប្បន្ន។ កីឡាការិនីខ្លះបានឡើងប្រកួតមួយរយៈពេលក៏បាត់មុខទៅវិញ ខណៈកីឡាការិនីមួយចំនួនកំពុងមានសកម្មភាពលើសង្វៀន។ ថ្វីបើអត្តពលិកភាគច្រើនជាបុរស ប៉ុន្តែគិតជាសមិទ្ធផលសម្រាប់កីឡាជារួមវិញ កីឡាការិនីងាយទទួលបានមេដាយជាងបុរសសម្រាប់ការប្រកួតលើឆាកអន្តរជាតិ នេះបើផ្អែកលើសមិទ្ធផលដែលកម្ពុជាទទួលបានកន្លងមក។

សារព័ត៌មាន«កម្ពុជាថ្មី» សូមលើកយកកីឡាការិនី៧រូបបានលះបង់ភាពស្រស់ស្អាត និងស្រណុកសុខស្រួលមកហាត់ប្រដាល់គុនខ្មែរដែលជាអាជីពឈឺខ្លួន។

កីឡាការិនី ទូច ចាន់វត្តី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាការិនី ទូច ចាន់វត្តិ ជាអ្នកប្រដាល់គុនខ្មែរដ៏លេចធ្លោម្នាក់នាពេលបច្ចុប្បន្ន។ កីឡាការិនីរូបនេះទទួលបានឱកាសឡើងប្រកួតញឹកញាប់ដែលភាគច្រើនគឺជាការប្រកួតអន្តរជាតិ។ កាលពីឆ្នាំ២០២៣ ទូច ចាន់វត្តី បានឈ្នះមេដាយមាសស៊ីហ្គេម បន្ទាប់ពីបានយកឈ្នះកីឡាការិនីវៀតណាម Nguyễn Thị Chiều ក្នុងវគ្គផ្តាច់ព្រ័ត្រទម្ងន់៥៤គីឡូក្រាម។

កីឡាការិនី មឿយ ស៊ឹង

កីឡាការិនីប្រដាល់គុនខ្មែរ មឿយ ស៊ឹង បានតស៊ូក្នុងអាជីពប្រដាល់គុនខ្មែររហូតក្លាយជាកីឡាការិនីម្នាក់ដ៏លេចធ្លោ។ កាលពីឆ្នាំ២០២២ កីឡាការិនីរូបនេះបានឈ្នះខ្សែក្រវាត់ IPCC និងឆ្នាំ២០២៣បានឈ្នះមេដាយមាស១ និងប្រាក់១ពីកីឡាស៊ីហ្គេម ដែលកម្ពុជាធ្វើម្ចាស់ផ្ទះ។

កីឡាការិនី ទូន ស្រីភីន

ទួន ស្រីភីន ជាកីឡាការិនីប្រដាល់ម្នាក់ដែលកំពុងមានសកម្មភាពនៅលើសង្វៀនគុនខ្មែរ។ កីឡាការិនីដើមកំណើតនៅខេត្តកំពតបានឈប់រៀនត្រឹមថ្នាក់ទី៩ដើម្បីមកធ្វើការនៅទីក្រុងភ្នំពេញ។ នៅឆ្នាំ២០២១ នាងបានចាប់ផ្តើមហ្វឹកហាត់ប្រដាល់រហូតបានឡើងប្រកួតជាបន្តបន្ទាប់ និងបានជាប់ជម្រើសជាតិកម្ពុជា។ ឆ្នាំ២០២៣ ស្រីភីន បានឈ្នះមេដាយប្រាក់ស៊ីហ្គេម។ កីឡាការិនីរូបនេះនឹងចេញទៅប្រកួតនៅប្រទេសបារាំងនាខែមិថុនាខាងមុខ។

កីឡាការិនី អេ យ៉ានុត

ថ្វីមានស្វាមី និងមានកូន១ កីឡាការិនី អេ យ៉ានុត កូនស្រីរបស់លោកគ្រូ អេ ភូថង នៅតែសកម្មក្នុងអាជីពប្រដាល់ឈឺខ្លួន។ កាលពីខែមករា ឆ្នាំ២០២៤ យ៉ានុត ទើបតែបានឈ្នះខ្សែក្រវាត់គុនខ្មែរ Cambodia Kun Khmer KKIF បន្ទាប់ពីឈ្នះពិន្ទុកីឡាការិនីថៃ។ នេះជាខ្សែក្រវាត់ទី១ក្នុងអាជីពប្រដាល់របស់នាង និងបានឈ្នះមេដាយសំរិទ្ធស៊ីហ្គេមកាលពីឆ្នាំ២០២១នៅប្រទេសវៀតណាម។

កីឡាការិនី សី វិច្ឆិកា

ផ្តើមចេញពីគ្រួសារខ្វះខាត សី វិច្ឆិកា បានបោះជំហានចូលអាជីពឈឺខ្លួន ដើម្បីរកចំណូលជួយដល់លគ្រួសារ។ ពីដំបូងកីឡាការិនីរូបនេះបានស្រឡាញ់កីឡាគុនចម្រុះ ប៉ុន្តែក្រោយមកក៏ហាត់ប្រដាល់ឃីកបុកស៊ីងរហូតជាប់ជម្រើសជាតិកម្ពុជាកាលពីដើមឆ្នាំ២០២៣។ ក្នុងនាមជាកីឡាការិនីឃីកបុកស៊ីងជម្រើសជាតិកម្ពុជា កីឡាការិនីដើមកំណើតខេត្តកំពង់ធំបានឈ្នះមេដាយសំរិទ្ធកីឡាស៊ីហ្គេមនៅកម្ពុជា។ ក្រោយមកនាងបានប្រកួតគុនខ្មែរដែលរហូតដល់ពេលធ្លាប់ប្រកួតបានជាង២០ដងហើយ។

កីឡាការិនី នៅ ស្រីពៅ

នៅ ស្រីពៅ ជាកីឡាការិនីប្រដាល់ម្នាក់ដែលប្រកួតច្រើនជំនាញដូចជា ប្រដាល់សកល គុនចម្រុះ ឃីកបុកស៊ីង និងគុនខ្មែរ។ នាងបានឃ្លាតឆ្ងាយពីសង្វៀនគុនខ្មែរប្រហែលជាមួយឆ្នាំហើយ ប៉ុន្តែពេលនេះបានវិលត្រឡប់មកកាន់សង្វៀនវិញហើយ។ សមិទ្ធផលសំខាន់របស់នាងគឺឈ្នះខ្សែក្រវាត់គុនខ្មែរអន្តរជាតិ Kun Khmer World Champion ឈ្នះមេដាយមាសប្រដាល់សកលថ្នាក់ជាតិជាច្រើនលើក ឈ្នះមេដាយសំរិទ្ធស៊ីហ្គេម និងជាកីឡាការិនីឆ្នើមប្រចាំឆ្នាំកាលពី២០១៨របស់ក្បាច់គុន Lethwei។

កីឡាការិនីបារាំង រិទ្ធី អេម៉ា

កីឡាការិនីបារាំង រិទ្ធី អេម៉ា កំពុងទទួលបានការកោតសរសើរ និងស្រឡាញ់ពីប្រជាជនកម្ពុជានៅពេលនាងបានលះបង់ពេលវេលាដើម្បីហ្វឹកហាត់គុនខ្មែរ។ កីឡាការិនីរូបនេះជានិស្សិតនៅប្រទេសបារាំង ប៉ុន្តែបានជាប់ចិត្តនឹងគុនខ្មែរកាលពី២ឆ្នាំមុនជាពេលធ្វើដំណើរកម្សាន្តមកប្រទេសកម្ពុជា។ អ្វីដែលពិសេស អេម៉ា គ្រោងសរសេរសៀវភៅស្តីពីការហ្វឹកហាត់គុនខ្មែររបស់នាងជា៥ភាសាដើម្បីជួយផ្សព្វផ្សាយគុនខ្មែរទៅកាន់ពិភពលោក៕