ព័ត៌មានអន្ដរជាតិ

លោក គីម ជុងអ៊ុន ចុះពិនិត្យរថក្រោះប្រយុទ្ធថ្មី ក្រោយ កូរ៉េខាងជើង គំរាមសម្លាប់

បានផុស

២ years មុន

នៅ

ថ្ងៃព្រហស្បតិ៍ ១៤ មីនា ២០២៤

ដោយ

យោងតាមសារពត៌មាន KCNA បានរាយការណ៍នៅថ្ងៃព្រហស្បតិ៍នេះថា មេដឹកនាំកូរ៉េខាងជើង លោក គីម ជុងអ៊ុន បានចុះដឹកនាំផ្ទាល់ក្នុងព្រឹត្តិការណ៍បង្ហាញរថក្រោះប្រយុទ្ធប្រភេទថ្មី ខណៈកូរ៉េខាងត្បូង និងសហរដ្ឋអាមេរិកបានបិទបញ្ចប់សមយុទ្ធរួមគ្នា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

KCNA បានផ្សាយទៀតថា ក្នុងព្រឹត្តិការណ៍នោះលោក គីម ក៏បានសម្តែងការពេញចិត្តពេញថ្លើមជាខ្លាំងផងដែរចំពោះការបង្ហាញរថក្រោះប្រយុទ្ធប្រភេទថ្មីដ៏មានរិទ្ធិអំណាចមួយនេះ ។ រថក្រោះនេះបានធ្វើការហាត់សមសាកល្បងដើម្បីពិនិត្យមើលសមត្ថភាពប្រយុទ្ធរបស់កងរថក្រោះ និងបន្ស៊ាំទៅនឹងសកម្មភាពប្រយុទ្ធលើបេសកកម្មយុទ្ធសាស្ត្រផ្សេងៗគ្នា ។

ព្រឹត្តិការណ៍នេះត្រូវបានចូលរួមដោយមន្ត្រីជាន់ខ្ពស់ រួមទាំងរដ្ឋមន្ត្រីការពារជាតិលោក Kang Sun Nam ផងដែរ ខណៈនៅក្នុងរូបថតដែលចេញផ្សាយដោយ KCNA បង្ហាញឲ្យឃើញលោក គីម ពាក់អាវស្បែកអមដំណើរដោយទាហាន ព្រមទាំងរថក្រោះដែលមានទង់ជាតិកូរ៉េខាងជើង នៅទីវាលមួយកន្លែង ។

ស្របពេលជាមួយគ្នានោះ ព្រឹត្តិការណ៍នេះកើតឡើងនៅថ្ងៃតែមួយដែលរដ្ឋមន្ត្រីក្រសួងការពារជាតិកូរ៉េខាងត្បូង លោក Shin Won-sik បានចេញបញ្ជាឲ្យសម្លាប់មេដឹកនាំកូរ៉េខាងជើងលោក គីម ជុងអ៊ុន មុនគេ និងមន្ត្រីកំពូលៗរបស់ទីក្រុងព្យុងយ៉ាងដទៃទៀត ក្នុងករណីដែលសង្រ្គាមផ្ទុះឡើងជាថ្មីនៅឧបទ្វីបកូរ៉េ ខណៈដែលសមយុទ្ធប្រចាំឆ្នាំ Freedom Shield រួមគ្នាដែលមានការចូលរួមពីកូរ៉េខាងត្បូង និងសហរដ្ឋអាមេរិកត្រូវបញ្ចប់នៅថ្ងៃព្រហស្បតិ៍នេះផងដែរ ។

គួរបញ្ជាក់ថា កូរ៉េខាងជើងបានថ្កោលទោសជាយូរមកហើយនូវសមយុទ្ធយោធាបែបនេះជាការហាត់សមសម្រាប់សង្គ្រាម ខណៈក្រុងសេអ៊ូលបានចាត់ទុកសមយុទ្ធនេះជាការការពារសុទ្ធសាធ ។ លោក គីម ក៏ធ្លាប់អះអាងដែរថា ក្នុងករណីមានសង្គ្រាម កូរ៉េខាងជើង នឹងមិនស្ទាក់ស្ទើរឡើយក្នុងការប្រើគ្រប់មធ្យបាយ និងកម្លាំងទាំងអស់កម្ចាត់កូរ៉េខាងត្បូង ៕