ថៃ ក្តៅសឹងឆេះ ខណៈសីតុណ្ហភាព ហក់ឡើងខ្ពស់បំផុត ក្នុងប្រវត្តិសាស្រ្ត ៧៣ឆ្នាំ

ព្រះអាទិត្យបានបញ្ចេញកម្តៅដូចដុតភ្លើង បណ្តាលឲ្យប្រទេសថៃ ត្រូវរងគ្រោះដោយអាកាសធាតុក្តៅ ខណៈសីតុណ្ហភាពហក់ឡើងដល់កម្រិតខ្ពស់បំផុតមិនធ្លាប់ជួបប្រទះសោះ ក្នុងប្រវត្តិសាស្រ្តរយៈពេល៧៣ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកដ្ឋានឧតុនិយមថៃ (TMD) បានឲ្យដឹងនៅថ្ងៃអាទិត្យទី១៧ខែមីនាថា ខេត្ត Mae Hong Son, Uttaradit, Sukhothai, Tak និង Udon Thani នឹងក្លាយជាខេត្តក្តៅបំផុតចំនួន៥ក្នុងឆ្នាំ២០២៤ ពោលគឺសីតុណ្ហភាពនឹងឡើងដល់ ៤៤អង្សាសេឬខ្ពស់ជាងនេះទៅទៀត។

លោក Seree Supratid នាយកមជ្ឈមណ្ឌលបម្រែបម្រួលអាកាសធាតុនិងគ្រោះមហន្តរាយ នៃសាកលវិទ្យាល័យ Rangsit ប្រាប់ទៅ Bangkok Post ថា ទីតាំងក្តៅបំផុត គឺជាតំបន់ខ្ពង់រាប Mae Hong Son, Tak និង Lampang ដែលជាកន្លែងមានការកាប់បំផ្លាញព្រៃឈើធំធេង ដោយសីតុណ្ហភាពនៅទីនោះនឹងឈានដល់ចន្លោះ ៤៤.៦  ទៅ ៤៤.៩ អង្សាសេ។

ស្របពេលជាមួយគ្នានោះដែរ បើយោងតាមមន្ត្រីជាន់ខ្ពស់ TMD, អាកាសធាតុដ៏ក្ដៅគគុកនៅឆ្នាំនេះ គឺបណ្តាលមកពីឥទ្ធិពល El Nino ដែលកំពុងវាយប្រហារពាសពេញពិភពលោក ដោយបង្កឲ្យមានគ្រោះរាំងស្ងួត ភ្លៀងធ្លាក់ខ្លាំង និងសីតុណ្ហភាពខ្ពស់ក្នុងកំណត់ត្រាថ្មីៗ។

កាលពីខែមុន អ្នកជំនាញបរិស្ថានសមុទ្រ លោក Thon Thamrongnawasawat ក៏បានព្រមានដែរថា ឆ្នាំនេះ ប្រទេសថៃ ក៏ដូចជាតំបន់អាស៊ីអាគ្នេយ៍ នឹងជួបប្រទះអាកាសធាតុក្តៅខ្លាំងបំផុតមិនធ្លាប់មានសោះក្នុងប្រវត្តិសាស្រ្ត ដោយសារបាតុភូត El Nino។

សូមបញ្ជាក់ El Nino គឺត្រូវបានបង្កឡើងដោយការកើនឡើងនៃសីតុណ្ហភាពលើផ្ទៃមហាសមុទ្រប៉ាស៊ីហ្វិកភាគខាងកើត ដែលនាំទៅដល់ដំណាក់កាលនៃការឡើងកម្តៅផែនដី។

បាតុភូតធម្មជាតិនេះ តែងតែកើតឡើងរៀងរាល់២ទៅ៧ឆ្នាំម្តង ហើយទាញបន្ថយកម្រិតភ្លៀងធ្លាក់នៅតំបន់អាស៊ីអាគ្នេយ៍ និងភាគខាងត្បូងប្រទេសអូស្ត្រាលី។ ផលប៉ះពាល់របស់វាត្រូវបានគេចាត់ទុកថាធ្ងន់ធ្ងរគួរសម ពោលគឺវាចោទជាបញ្ហាដល់វិស័យកសិកម្ម ការនាំចេញ និងទេសចរណ៍ ព្រមទាំងវិស័យផ្សេងៗទៀត៕

អត្ថបទ៖ សុខ សុវណ្ណ

ចុចអាន៖ ថៃក្តៅខ្លាំង! សប្តាហ៍នេះ សីតុណ្ហភាព នឹងកើនលើស ៥០អង្សាសេ