យប់នេះជាឱកាសឡើងទៅវគ្គ៤ក្រុមចុងក្រោយរបស់ Arsenal ក្រោយខកខាន១៥ឆ្នាំ

ក្រុមកាំភ្លើងធំ Arsenal ត្រូវជួបជាក្រុម Bayern Munich ក្នុងការប្រកួតជើងទី២ ក្នុងពានរង្វាន់ UEFA Champions League ម៉ោង២យប់រំលងអធ្រាតឈានចូលថ្ងៃទី១៨ ខែមេសា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមតំណាងឲ្យអង់គ្លេសក្នុងពានរង្វាន់លំដាប់ទី១នៅអឺរ៉ុប Arsenal បានខកខានឡើងទៅវគ្គពាក់កណ្ដាលផ្ដាច់ព្រ័ត្រ UEFA Champions League អស់រយៈពេល១៥ឆ្នាំហើយ។ កាល​ពី​​២០០៩ ជាឆ្នាំចុងក្រោយដែលក្រុម Arsenal ​បាន​ឡើងដល់វគ្គពាក់កណ្ដាលផ្ដាច់ព្រ័ត្រក្នុងពានរង្វាន់ UCL ពេលនោះ Arsenal ស្ថិតនៅ​លេខ​២​ក្នុងពូល G ក្រោយបញ្ចប់ការប្រកួតសន្សំពិន្ទុ។ វគ្គ១៦ក្រុមចុងក្រោយ ពួក​គេ​បានយកឈ្នះ Roma ដោយបាល់ទាត់ពិន័យ១១ម៉ែត្រ ៧-៦ ក្រោយសរុប​ទាំង​ពីរ​ស្មើគ្នា ១-១។ នៅ​វគ្គ៨ក្រុមចុងក្រោយ Arsenal​ បន្ដយកឈ្នះក្រុម Villarreal ក្នុងលទ្ធផល ៤-១ សរុបទាំង២ជើង ប៉ុន្តែ​នៅ​វគ្គពាក់កណ្ដាលផ្ដាច់ព្រ័ត្រ Arsenal​ បានបរាជ័យក្រោមថ្វីជើង​ក្រុម​រួម​លីគ​ Manchester United ក្នុងលទ្ធផល ៤-១ សរុបទាំង២ជើង។ គិតចាប់តាំងពីឆ្នាំ២០០៩ Arsenal មិនដែលឡើងដល់វគ្គពាក់កណ្ដាលផ្ដាច់ព្រ័ត្រក្នុងពានរង្វាន់ UEFA Champions League ទេ។

ការប្រកួតយប់នេះក្នុងកីឡដ្ឋាន Allianz Arena ក្រុម Arsenal ជាក្រុមភ្ញៀវ ហើយត្រូវការជ័យជម្នះជាចាំបាច់ដើម្បីធានាកៅអីឡើងទៅវគ្គពាក់កណ្ដាលផ្ដាច់ព្រ័ត្រពានរង្វាន់លំដាប់ទី១ទ្វីបអឺរ៉ុប។ ​កាល​ពី​ជើងទី១ នៅកីឡដ្ឋាន Emirates ក្នុង​ប្រទេស​អង់គ្លេស​ ក្រុមទាំង២បានត្រឹមស្មើគ្នា ២-២។

ប្រវត្តិជួបគ្នា១៣ ក្រុម Bayern Munich ឈ្នះ៧លើក ស៊ុតបញ្ចូលទី​បាន​២៩គ្រាប់ ខណៈក្រុម Arsenal ឈ្នះ​៣​លើក​ ស៊ុតបញ្ចូលទី​១៥គ្រាប់ និងស្មើគ្នា៣លើក។ ចំពោះប្រវត្តិ​ក្នុង​ពានរង្វាន់ UEFA Champions League ក្រុម Bayern Munich ធ្លាប់​ឈ្នះ​ជើង​ឯក​៦លើក ខណៈក្រុម Arsenal មិន​ធ្លាប់​ឈ្នះ​ជើ​ងឯក​ទេ។

យប់នេះមិនមែនជារឿងងាយស្រួលសម្រាប់ក្រុមមកពីទឹកដីអង់គ្លេស ក្នុងការយកឈ្នះក្រុមខ្លាំងអាល្លឺម៉ង់​ ​ដែល​ពោរ​ពេញ​ដោយ​មានបទពិសោធ​ក្នុងពានរង្វាន់លំដាប់ទី១ទ្វីបអឺរ៉ុប៕

អត្ថបទ៖ ផា រតនា