ទីក្រុងអាថែន ប្រែពណ៌ទឹកក្រូច គួរឲ្យខ្លាច

តាមការចុះផ្សាយរបស់ BBC នៅថ្ងៃពុធទី២៤ខែមេសា រដ្ឋធានីអាថែន នៃប្រទេសក្រិក ត្រូវព្យុះខ្សាច់ពី សាហារ៉ា វាយប្រហារយ៉ាងធ្ងន់ធ្ងរ ដោយបណ្តាលឲ្យទីក្រុងនេះប្រែក្លាយទៅជាពណ៌ទឹកក្រូចគួរឲ្យខ្លាច មើលលែងឃើញប៉ុន្តែអ្នកឧតុនិយម Kostas Lagouvardos បានប្រដូចទិដ្ឋភាពនេះ ទៅភពព្រះអង្គារទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រិកក៏ធ្លាប់រងការវាយប្រហារដូចគ្នានេះដែរ កាលពីចុងខែមីនានិងដើមខែមេសា ប៉ុន្តែលើកនេះ ត្រូវបានគេដឹងថា ជាការវាយប្រហារធ្ងន់ធ្ងរបំផុត ដែលប្រទេសក្រិក មិនធ្លាប់ជួបប្រទះសោះ ចាប់តាំងពីឆ្នាំ២០១៨មក។

ទោះបីជាយ៉ាងណាក៏ដោយ សេវា​អាកាសធាតុ​របស់​ក្រិកបានចេញសេចក្តីប្រកាស​ថា ផ្ទៃមេឃនឹងប្រែជាស្រឡះល្អវិញ នៅថ្ងៃព្រហស្បតិ៍។

ដោយសារតែព្យុះខ្សាច់នេះ គុណភាពខ្យល់បានធ្លាក់ចុះខ្លាំងនៅក្នុងតំបន់ជាច្រើន ហើយនៅព្រឹកថ្ងៃពុធ តំបន់ Acropolis នៃទីក្រុង អាថែន មើលលែងឃើញទៅហើយព្រោះតែធូលីក្រាស់ពេក ខណៈផ្សែងពណ៌ទឹកក្រូច រសាត់​ដល់​ទី​ក្រុង​ Thessaloniki នាភាគខាងជើងឯណោះ។

ស្របពេលជាមួយគ្នានោះដែរ ជនជាតិក្រិកដែលមានបញ្ហាផ្លូវដង្ហើម ត្រូវបានណែនាំកុំចេញទៅខាងក្រៅ តែបើចេញក៏ត្រូវពាក់ម៉ាសដែរ ហើយចៀសវាងការធ្វើលំហាត់ប្រាណទៀតផង។

សូមបញ្ជាក់ថា វាលខ្សាច់សាហារ៉ា តែងបញ្ចេញធូលីពី៦០ទៅ២០០លានតោនក្នុងមួយឆ្នាំៗ ហើយធូលីភាគច្រើន បានធ្លាក់ចុះមកផែនដីយ៉ាងលឿន ប៉ុន្តែភាគល្អិតតូចៗមួយចំនួនអាចធ្វើដំណើរបានចម្ងាយឆ្ងាយ ជួនកាលទៅដល់អឺរ៉ុបឯណោះ៕

អត្ថបទ៖ សុខ សុវណ្ណ

ចុចអាន៖ ព្យុះ​ខ្សាច់ និងខ្យល់​ពុល​ដ៏​គ្រោះថ្នាក់​ វាយប្រហារ​ទីក្រុង​ ប៉េកាំង​