ព័ត៌មានជាតិ

ខ្យល់កន្ត្រាក់ កើតឡើងទៅលើខេត្តចំនួន ១០ ប៉ះពាល់ផ្ទះជាង ១០០ ខ្នង

បានផុស

២ years មុន

នៅ

ថ្ងៃចន្ទ ៦ ឧសភា ២០២៤

ដោយ

នៅដើមខែឧសភា ឆ្នាំ ២០២៤ នេះ ខ្យល់កន្ត្រាក់បានកើតឡើងទៅលើខេត្តចំនួន ១០ បណ្តាលឱ្យប៉ះពាល់ដល់ផ្ទះសម្បែងប្រជាពលរដ្ឋជាង ១០០ ខ្នង ក្នុងនោះមានជាង ៣០ ខ្នង ត្រូវខូចខាតទាំងស្រុង របើកដំបូលសាលារៀន សាលាឆាន់ និងរបស់របរមួយចំនួនទៀតផងដែរ។

លោក សុទ្ធគឹម កុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ០៦ ឧសភា នេះថា នៅប៉ុន្មានថ្ងៃនេះ មានភ្លៀងធ្លាក់ជាបន្តបន្ទាប់បានបណ្តាលឱ្យមានខ្យល់កន្ត្រាក់ និងផ្គររន្ទះ ប៉ះពាល់ដល់លំនៅឋានប្រជាពលរដ្ឋ ក៏ដូចជាសត្វពាហនៈផងដែរ។ គិតចាប់ពីដើមខែ រហូតមកដល់ល្ងាចថ្ងៃទី ៥ ឧសភា ភ្លៀងធ្លាក់ស្ទើរតែទូទាំងប្រទេស ពីតិចទៅមធ្យម ពីមធ្យមទៅបង្គួរ។

លោកបានបន្តថា ជាមួយនេះ ខ្យល់កន្ត្រាក់បានប៉ះពាល់ដល់លំនៅឋានប្រជាពលរដ្ឋជាង ១០០ ខ្នង ហើយខូចខាតផ្ទះទាំងស្រុងជាង ៣០ ខ្នង នៅខេត្តឧត្តរមានជ័យ មណ្ឌលគិរី កំពង់ធំ ក្រចេះ បាត់ដំបង សៀមរាប រតនគិរី ត្បូងឃ្មុំ តាកែវ និងព្រះវិហារ។ ក្នុងនោះ ខេត្តសៀមរាបរងគ្រោះច្រើនជាងគេមានផ្ទះចំនួន ៥៩ ខ្នង ក្នុងនោះខូចខាតទាំងស្រុង ២ ខ្នង របើកដំបូល ៥៧ ខ្នង និង ខេត្តតាកែវ ប៉ះពាល់ផ្ទះ ២៦ ខ្នង ក្នុងនោះខូចខាតទាំងស្រុង ២ ខ្នង ប៉ះពាល់មធ្យម ៨ ខ្នង និងប៉ះពាល់កម្រិតស្រាល ១៦ ខ្នង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តទៀតថា ក្នុងការជួយសង្គ្រោះដល់ប្រជាពលរដ្ឋរងគ្រោះដោយខ្យល់កន្ត្រាក់នេះដែរ សាខាកាកបាទក្រហមកម្ពុជា បានផ្គត់ផ្គង់សម្ភារៈមួយចំនួន។ ចំណែកអាជ្ញាធរមូលដ្ឋានសហការជាមួយកងកម្លាំងប្រដាប់អាវុធទាំង ៣ ប្រភេទ បានចុះជួយអន្តរាគមន៍ដល់ប្រជាពលរដ្ឋរងគ្រោះទាំងនោះបានទាន់ពេលវេលា។

សម្រាប់រដូវវស្សាឆ្នាំនេះ ក្រសួងធនធានទឹក បានព្យាករថា នឹងមានបាតុភូតផ្គររន្ទះកើតឡើងច្រើនដោយសារបាតុភូត នៃការប្រែប្រួលអាកាសធាតុ ដូចនេះលោកសូមអំពាវនាវដល់ក្រសួង-ស្ថាប័នជំនាញ តាមដានការព្យាករណ៍ស្ថានភាពអាកាសធាតុខ្យល់កន្ត្រាក់ជាប្រចាំ ដើម្បីឱ្យអាជ្ញាធរត្រៀមបង្ការ និងអន្តរាគមន៍ឆ្លើយតបឱ្យបានទាន់ពេលវេលា។ រីឯប្រជាពលរដ្ឋ ក៏ត្រូវតាមដានផងដែរ និងត្រៀមលក្ខណៈគ្រប់គ្រាន់ ដើម្បីកាត់បន្ថយនូវផលប៉ះពាល់ផ្សេងៗ ហើយមុននឹងសាងសង់លំនៅឋាន ត្រូវសិក្សាជាមួយអ្នកជំនាញឱ្យបានច្បាស់លាស់ ដើម្បីធន់ទៅនឹងខ្យល់កន្ត្រាក់ និងអាកាសធាតុ៕

អត្ថបទ ៖ សំអឿន