អូស្ត្រាលី រកឃើញជំងឺគ្រុនផ្ដាសាយបក្សីប្រភេទ H7

ប្រទេសអូស្រ្តាលីនៅថ្ងៃពុធនេះបានរកឃើញជំងឺគ្រុនផ្តាសាយបក្សីប្រភេទ H7 នៅកសិដ្ឋានចិញ្ចឹមមាន់មួយកន្លែងនៅជិតទីក្រុង Melbourne ប៉ុន្តែវាមិនមែនជាប្រភេទជំងឺដូចគ្នាដែលកំពុងរីករាលដាលនៅទូទាំងពិភពលោក និងមានហានិភ័យខ្លាំងចម្លងដល់មនុស្សនោះទេ ។ ​នេះបើយោងតាមការចេញផ្សាយរបស់ទីភ្នាក់ងារសារព័ត៌មាន​​ Reuters នៅថ្ងៃទី៥ ខែមិថុនា ។

រដ្ឋាភិបាលអូស្ត្រាលីបានឲ្យដឹងថា មុននឹងរកឃើញជំងឺគ្រុនផ្តាសាយបក្សីប្រភេទ H7 នៅកសិដ្ឋានចិញ្ជឹមមាន់យកពងសត្វស្លាបរាប់ពាន់ក្បាលត្រូវបានសម្លាប់រួចហើយ ហើយបន្ទាប់ពីការរកឃើញហើយ កសិដ្ឋានត្រូវបានដាក់ឲ្យនៅដាច់ពីគេ រួមជាមួយនឹងការបន្តឹងការធ្វើដំណើរនៅក្នុងតំបន់ជុំវិញនោះផងដែរ ។

ប្រធានមន្ត្រីពេទ្យសត្វរដ្ឋ Victoria ក៏បានឲ្យដឹងដែរថា ការរកឃើញជំងឺគ្រុនផ្តាសាយបក្សីប្រភេទនេះ គឺជារឿងមិននឹកស្មានដល់នោះទេ ទោះបីជាយ៉ាងណាការផ្ទុះឡើងនេះមិនបង្កគ្រោះថ្នាក់ដល់អ្នកប្រើប្រាស់ស៊ុត និងផលិតផលបសុបក្សីក៏ដោយ ។

យ៉ាងណាករណីរកឃើញជំងឺគ្រុនផ្តាសាយបក្សីនេះមានតាំងពីឆ្នាំ ១៩៧៦ មកម្ល៉េះដែលប្រទេសអូស្ត្រាលីបានរកឃើញការផ្ទុះឡើងជំងឺគ្រុនផ្តាសាយបក្សីដែលមានអការៈធ្ងន់ធ្ងរ (HPAI) ចំនួន ៩ ករណី ប៉ុន្តែករណីទាំងអស់ត្រូវបានទប់ស្កាត់ និងបញ្ឈប់ទាន់ពេលវេលា ។

គួរបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ ជំងឺគ្រុនផ្តាសាយបក្សីប្រភេទផ្សេងៗគ្នាដូចជា H5N1 បានរាលដាលពាសពេញពិភពលោក ដោយបានសម្លាប់សត្វបក្សីមួយចំនួនធំ និងក៏បានរីករាលដាលដល់ប្រភេទថនិកសត្វរាប់សិបប្រភេទ ដូចជា ហ្វូងគោក្របី និងបានឆ្លងដល់មនុស្ស ៣ នាក់នៅសហរដ្ឋអាមេរិក និងម្នាក់នៅអូស្ត្រាលី ៕

អត្ថបទ៖ ប៊ុន សុភាព