សមាជិកណាតូ ចាប់ផ្តើមពិភាក្សាគ្នា ដាក់ពង្រាយក្បាលគ្រាប់នុយក្លេអ៊ែរ ត្រៀមធ្វើសង្គ្រាម

អគ្គលេខាធិការណាតូ លោក Jens Stoltenberg បានប្រាប់ទៅសារព័ត៌មានអង់គ្លេស ​Telegraph កាលពីថ្ងៃអាទិត្យទី១៦ខែមិថុនាថា រដ្ឋជាសមាជិកអង្គការនេះ បានចាប់ផ្តើមការពិគ្រោះយោបល់គ្នាហើយ ទាក់ទងនឹងតម្រូវការ ដាក់ក្បាលគ្រាប់នុយក្លេអ៊ែរ ក្នុងស្ថានភាពប្រុងជើងការ ត្រៀមធ្វើសង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា ភ្លាមៗយើងមិនទាន់ពិភាក្សាអំពីថាតើនឹងមានក្បាលគ្រាប់ចំនួនប៉ុន្មាន ដែលនឹងដាក់ឲ្យប្រុងជើងការឬនៅក្នុងការឃ្លាំងទេ ប៉ុន្តែបញ្ហាទាំងនេះ តម្រូវឲ្យមានការពិគ្រោះយោបល់គ្នាជាមុនសិន ហើយតម្លាភាពលើបញ្ហានេះ ទៀតសោត នឹងជួយបង្ហាញជាសារច្បាស់ៗថា ណាតូនៅតែជា សម្ព័ន្ធមិត្តនុយក្លេអ៊ែរ។

ស្របពេលជាមួយគ្នានោះ លោកបានសង្កត់ធ្ងន់ថា “ត្បិតតែគោលដៅចុងក្រោយរបស់ណាតូ គឺជាពិភពលោកដែលគ្មានអាវុធនុយក្លេអ៊ែរក៏ពិតមែន ប៉ុន្តែដរាបណាអាវុធនុយក្លេអ៊ែរនៅតែមាន យើងនឹងរក្សាសមត្ថភាពនុយក្លេអ៊ែររបស់យើង។ បើណាតូគ្មាននុយក្លេអ៊ែរ, ពិភពលោកក្នុងដៃរុស្ស៊ី ចិន និងកូរ៉េខាងជើងដែលមានអាវុធនុយក្លេអ៊ែរ ពិតជាគ្រោះថ្នាក់ជាក់ជាមិនខាន”។

លើសពីនេះ លោកព្រមានថា ប្រទេសចិន កំពុងវិនិយោគខ្លាំងណាស់ លើសព្វាវុធទំនើបៗ រួមទាំងឃ្លាំងអាវុធនុយក្លេអ៊ែររបស់ខ្លួន ដែលនឹងកើនឡើងដល់ ១ ០០០ក្បាលគ្រាប់ នៅដើមឆ្នាំ ២០៣០ផងដែរ។

ការព្រមានរបស់លោក Stoltenberg ធ្វើឡើងបន្ទាប់ពី G7 រិះគន់ចិននិងរុស្ស៊ីយ៉ាងចាស់ដៃ នៅក្នុងសេចក្តីថ្លែងការណ៍មួយកាលពីសប្តាហ៍មុន ហើយអំពាវនាវឲ្យទីក្រុងប៉េកាំង បញ្ឈប់ការផ្គត់ផ្គង់បច្ចេកវិទ្យាសព្វាវុធដល់ទីក្រុងមូស្គូ និងប្រឆាំងយោធូបនីយកម្មរបស់ចិននៅក្នុងតំបន់ប៉ាស៊ីហ្វិកទៀតផង។

សូមបញ្ជាក់ថា តួលេខអំពីអាវុធនុយក្លេអ៊ែរប្រតិបតិ្តការលើសកលលោក នៅតែជាអាថ៌កំបាំងដ៏កំពូល ប៉ុន្តែក្រុមអ្នកជំនាញអះអាងថា សហរដ្ឋអាមេរិកមានអាវុធនុយក្លេអ៊ែរប្រតិបតិ្តការប្រហែល ១ ៧០០គ្រាប់ក្នុងចំណោមគ្រាប់ទាំង ៣ ៧០០របស់ខ្លួន៕

អត្ថបទ៖ សុខ សុវណ្ណ

ចុចអាន៖ អាមេរិកបារម្ភថា ចិន​ ទំនង​ជា​មាន​ក្បាល​គ្រាប់​នុយក្លេអ៊ែរ​ ១៥០០​គ្រាប់ ត្រឹម​ឆ្នាំ ​២០៣៥