ចិញ្ចើមផ្លូវជាប់របងវិទ្យាល័យព្រះយុគន្ធរ ក្លាយជាកន្លែងលក់ដូរ និងចំណតរថយន្ដយ៉ាងអនាធិបតេយ្យ

ក្រុមអាជីវករមួយចំនួនបានយកចិញ្ចើមផ្លូវជាប់របងសាលាវិទ្យាល័យ ព្រះយុគន្ធរ លក់ដូរចាប់ផ្លូវពី១០៥ ដល់ផ្លូវ ២៨៨ និងរហូតទៅដល់កែង មហាវិថីព្រះមុន្នីវង្ស បានធ្វើការដាក់លក់ដូរម្ហូបអាហារ នំចំណី យ៉ាងអនាធិបតេយ្យ បង្កផលលំបាកដល់សិស្សានុសិស្សដើរថ្មើរជើងដែលងាយរងគ្រោះជាយថាហេតុ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រជាពលរដ្ឋដែលរស់នៅក្បែរវិទ្យាល័យ ព្រះយុគន្ធរ ក៏បានលើកឡើងថា ពួកគាត់សង្កេតឃើញថា អាជីវករជាអ្នកលក់ដូរ​ទាំងនោះ នៅពេលមានភ្ញៀវទិញអីវ៉ាន់ម្តងៗ គឺឈប់ពេញផ្លូវ ដោយធ្វើឲ្យមានការកកស្ទះចរាចរណ៍ចំណុចផ្លូវ ១០៥ (ស្តុបវិទ្យាល័យ ព្រះយុគន្ធរ) តែម្តង។ ប្រជាពលរដ្ឋបន្តលើកឡើងទៀតថា ចំពោះអាជីវករមួយចំនួនទៀត ក្រោយពីលក់ដូររួច មិនបានប្រមូលសំរាមទុកដាក់អោយត្រឹមត្រូវនោះឡើយ គឺមានអាជីវករមួយចំនួនតូចចាក់ចោលពាសវាល ពាសកាល ដែលធ្វើអោយបាត់បង់នូវសោភណ្ឌភាពបរិស្ថាន និងអនាម័យសារធារណៈ។

ពាក់ព័ន្ធបញ្ហានេះ លោក សុខ សម្បត្តិ អភិបាលនៃគណអភិបាលខណ្ឌបឹងកេងកង បានប្រាប់ កម្ពុជាថ្មី នៅរសៀលថ្ងៃទី២៨មិថុនានេះថា ទីតាំងលក់ដូរជុំវិញសាលានោះ​ មានលក់តាំងពីយូរឆ្នាំមកហើយ ដោយកាលពីមុនស្ថិតក្នុងមូលដ្ឋានខណ្ឌចំការមន មកម្ល៉េះ ហើយអាជ្ញាធរខណ្ឌបឹងកេងកង តែងតែយោគយល់ដល់អាជីវករ ដែលលក់ដូរចិញ្ចឹមក្រពះ។ ហើយអាជ្ញាធរតែងយកចិត្តទុកដាក់ ក្នុងការចុះរៀបចំសណ្ដាប់ធ្នាប់ជុំវិញបរិវេណវិទ្យាល័យ ព្រះយុគន្ធរ ជាញឹកញាប់ និងពន្យល់ណែនាំដល់អាជីវករ ពាក់ព័ន្ធនឹងសណ្តាប់ធ្នាប់សារធារណៈ និងអនាម័យផងដែរ។

ជាមួយគ្នានេះ សិស្សានុសិស្ស ក៏ដូចជាប្រជាពលរដ្ឋបានសំណូមពរដល់អាជ្ញាធរមានសមត្ថកិច្ច សូមជួយចុះរៀបចំសណ្តាប់ធ្នាប់នៅជុំវិញបរិវេណសាលាផង ព្រោះថា នៅពេលសិស្សានុសិស្សដល់ម៉ោងចេញទៅផ្ទះ គឺមិនមានចិញ្ចើមផ្លូវសម្រាប់ដើរនោះទេ ភាគច្រើនដើរនៅលើផ្លូវ ដែលមានម៉ូតូ រថយន្តធ្វើដំណើរយ៉ាងមមាញឹក ឆ្លងកាត់ចំណុចផ្លូវនោះ ដែលងាយបង្កគ្រោះថ្នាក់ជាយថាហេតុ៕

អត្ថបទ៖ ហេង អុឹងម៉េង រូបភាព រដ្ឋា