សម្ដេច ហ៊ុន សែន ជំរុញឱ្យប្រទេសជម្លោះសមុទ្រចិនខាងត្បូង សម្រេចឱ្យបាន COC

ដើម្បីឈានទៅសម្រេចបាននូវក្រមប្រតិបត្តិនៅសមុទ្រចិនខាងត្បូង (COC) ឱ្យបានឆាប់ តួនាទីរបស់អាស៊ាន និងបណ្ដាប្រទេសពាក់ព័ន្ធ គឺពិតជាមានសារៈសំខាន់ តាមរយៈកិច្ចសន្ទនាលើតុចរចា។ នេះជាការលើកឡើងរបស់សម្ដេចតេជោ ប្រធានព្រឹទ្ធសភាទៅកាន់មន្ត្រីការទូតហ្វីលីពីន ក្នុងជំនួបកាលពីថ្ងៃទី៨ ខែកក្កដា ឆ្នាំ២០២៤ នៅវិមានព្រឹទ្ធសភា រាជធានីភ្នំពេញ។

សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានគូសបញ្ជាក់ថា នៅពេលដែលក្រមប្រតិបត្តិ COC សម្រេចបានហើយនោះ វានឹងកាត់បន្ថយនូវភាពតានតឹង ហើយបណ្ដាប្រទេសនៅក្នុងតំបន់ នឹងមានជំនឿទុកចិត្តគ្នាទៅវិញទៅមក និងធ្វើឱ្យសមុទ្រចិនខាងត្បូងអាចក្លាយជាច្រកដ៏សំខាន់មួយសម្រាប់ពាណិជ្ជកម្មរវាងបណ្ដាលប្រទេសនៅក្នុងតំបន់ ក៏ដូចជាអន្តរជាតិវិញ។

ជាការកត់សម្គាល់ បញ្ហាសមុទ្រចិនខាងត្បូង គឺជាជម្លោះដែនសមុទ្ររវាងចិន និងប្រទេសជាសមាជិកអាស៊ានចំនួន៤ គឺ វៀតណាម ហ្វីលីពីន ម៉ាឡេស៊ី និង​ព្រុយណេ ដែលត្រូវបានចាត់ទុកថា ជាបញ្ហាជម្លោះដ៏ក្ដៅមួយនៅក្នុងតំបន់អាស៊ាន បន្ទាប់ពីវិបត្តិនៅប្រទេសមីយ៉ាន់ម៉ា ដែលកាន់តែធ្ងន់ធ្ងរ និងអូសបន្លាយ។  

នៅក្នុងជំនួបជាមួយលោកស្រី ផ្លេរីដា អែន ខាំមែល ភីម៉ាយយូ (Flerida Ann Camille P. Mayo) ឯកអគ្គរដ្ឋទូតហ្វីលីពីនប្រចាំកម្ពុជា សម្ដេចតេជោ ហ៊ុន សែន ក៏បង្ហាញនូវការស្វាគមន៍នៃកិច្ចសន្ទនាដែលហ្វីលីពីនកំពុងធ្វើជាមួយនឹងភាគីចិន ក៏ដូចបណ្ដាប្រទេសពាក់ព័ន្ធ មានវៀតណាម ជាដើម ដើម្បីបន្ធូរបន្ថយភាពតានតឹង និងស្វែងរកដំណោះស្រាយដ៏ជាក់លាក់មួយនៅក្នុងការសម្រួលសភាពការណ៍នៅក្នុងតំបន់សមុទ្រចិនខាងត្បូងនេះ។

ប៉ុន្តែយ៉ាងណា សម្ដេចតេជោ បានសង្កត់ធ្ងន់ថា ដើម្បីឈានទៅរកដំណោះស្រាយជាស្ថាពរ គឺភាគីទាំងអស់នៅក្នុងតំបន់សមុទ្រចិនខាងត្បូងត្រូវគោរព និងអនុវត្តឱ្យបានខ្ជាប់ខ្ជួននូវសេចក្តីថ្លែងការណ៍ស្តីពីការប្រតិបត្តិនៃភាគីនានានៅសមុទ្រចិនខាងត្បូង DOC ដែលបានចុះហត្ថលេខានៅរាជធានីភ្នំពេញកាលពីឆ្នាំ២០០២ នៅពេលដែលកម្ពុជាធ្វើជាប្រធានអាស៊ាន ។ សម្ដេចតេជោ ក៏បានស្នើសុំឱ្យភាគីពាក់ព័ន្ធនៅសមុទ្រចិនខាងត្បូងធ្វើការសម្របសម្រួលគ្នា ដើម្បីចៀសវាងជម្លោះណា មួយ ហើយពិភាក្សាប្រកបដោយន័យស្ថាបនា សំដៅបញ្ចៀសភាពតានតឹងនៅក្នុងតំបន់។  

លើកឡើងក្នុងជំនួបនេះដែរ លោកស្រីឯកអគ្គរដ្ឋទូតហ្វីលីពីន បានជម្រាបជូនសម្តេចតេជោ ថា រយៈពេលជាង ៤២ឆ្នាំ ដែលបម្រើការងារនៅក្នុងក្រសួងការបរទេសហ្វីលីពីន លោកស្រីតែងបានតាមដានរាល់ការអភិវឌ្ឍរបស់ប្រទេសកម្ពុជា ក្នុងនោះ លោកស្រីតែងបានកោតសរសើរ និងស្ញប់ស្ញែងចំពោះក្តីស្រឡាញ់ដ៏ស្មោះស្ម័គ្ររបស់សម្តេចតេជោមានចំពោះ សហគមន៍អាស៊ាន។ លោកស្រីឯកអគ្គរដ្ឋទូត ចាត់ទុកថា សម្តេចតេជោ គឺជាកម្លាំងមគ្គុទេសន៍បង្ហាញផ្លូវដល់អាស៊ាន ដែលបានរួមចំណែកយ៉ាងច្រើនដល់ការវិវត្តរបស់អាស៊ាន៕