មន្ទីរសុខាភិបាលខេត្តសៀមរាប ជំរុញពលរដ្ឋប្រុងប្រយ័ត្ន ពីជំងឺរលាកផ្លូវដង្ហើម ខណៈជំងឺនេះកើតឡើងញឹកញាប់នៅរដូវវស្សានេះ

មន្ត្រីជំនាញនៃមន្ទីរសុខាភិបាលខេត្តសៀមរាប បានបង្ហាញថា ជំងឺរលាកផ្លូវដង្ហើម ជាជំងឺមួយប្រភេទក្នុងចំណោមជំងឺជាច្រើនទៀត ដែលភាគច្រើនងាយកើតបំផុតលើប្រជាពលរដ្ឋនៅក្នុងរដូវវស្សានេះ ហើយការចម្លងភាគច្រើនបង្កឡើងពីវីរុស និងអាចបណ្ដាលមកពីបាក់តេរី។ ខណៈជំងឺនេះមានការកើតឡើងញឹកញាប់នៅរដូវវស្សានេះ មន្ទីរសុខាភិបាលខេត្ត បានជំរុញឱ្យប្រជាពលរដ្ឋបង្កើនការប្រុងប្រយ័ត្ន ដើម្បីការពារខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវេជ្ជបណ្ឌិត សូ សុទ្ធី ប្រធានការិយាល័យបង្ការ និងគ្រប់គ្រងជំងឺ នៃមន្ទីរសុខាភិបាលខេត្តសៀមរាប បានបញ្ជាក់ថា វិធានការដើម្បីការពារពីជំងឺរលាកផ្លូវដង្ហើម និងជំងឺឆ្លងផ្សេងៗដែលពាក់ព័ន្ធនឹងផ្លូវដង្ហើម នោះគឺទាមទារឱ្យមានការពាក់ម៉ាស់ និងលាងដៃឱ្យបានញឹកញាប់ជាមួយសាប៊ូ ឬអាល់កុល ដើម្បីជួយការពារខ្លួនកុំឱ្យឆ្លងជំងឺនេះពីអ្នកដទៃ ក្នុងរយៈពេលដែលជំងឺនេះកំពុងមានការកើតឡើងច្រើន។

លោកថា ជំងឺឆ្លងទាំងនេះ ភាគច្រើនកើតឡើងដោយមានការរួមផ្សំទៅនឹងការខ្វះអនាម័យ ឆ្លងតាមរយៈទឹកភ្លៀង ដែលកត្តានេះទាមទារឱ្យប្រជាពលរដ្ឋត្រូវមានអនាម័យក្នុងការរស់នៅប្រចាំថ្ងៃ ជាពិសេសនៅរដូវវស្សានេះ ងាយប្រឈមនឹងកើតមានជំងឺផ្សេងៗជាច្រើនទៀត។ ដូច្នេះ ប្រជាពលរដ្ឋត្រូវទៅពិនិត្យសុខភាពឱ្យបានទៀងទាត់ និងចូលរួមទៅចាក់វ៉ាក់សាំងការពារនៅតាមមណ្ឌលសុខភាពឱ្យបានគ្រប់ៗគ្នា ដើម្បីការពារពីការចម្លងជំងឺផ្សេងៗ។

ជាមួយគ្នានេះ លោកក៏បានឱ្យដឹងដែរថា រដូវវស្សាក្នុងឆ្នាំ២០២៤ នេះ ចំពោះជំងឺផ្តាសាយដែលអាចប៉ះពាល់ដល់ផ្លូវដង្ហើម ក៏មានវ៉ាក់សាំងសម្រាប់ការពារផងដែរ ដោយរាជរដ្ឋាភិបាលបានប្តូរដាក់វ៉ាក់សាំងកូវីដ ទៅជាវ៉ាក់សាំងផ្តាសាយវិញ និងបានកំណត់ឱ្យប្រជាពលរដ្ឋទូទៅចាក់មួយដងក្នុងមួយឆ្នាំដែលអាចទប់ស្កាត់លើមេរោគជាច្រើន ហើយក្នុងនោះមេរោគកូវីដ១៩ បច្ចុប្បន្នក៏នៅមានតិចតួចផងដែរ ដែលទាមទារឱ្យពលរដ្ឋគ្រប់រូបត្រូវបន្តការពារ និងមានអនាម័យ៕

អត្ថបទ៖ គឿន វេត