ព័ត៌មានអន្ដរជាតិ

អ្នកដំណើរ២៣នាក់ស្លាប់ក្នុងការស្ទាក់ចាប់រថយន្តនៅប៉ាគីស្ថាន

បានផុស

២ years មុន

នៅ

ថ្ងៃចន្ទ ២៦ សីហា ២០២៤

ដោយ

ខ្មាន់កាំភ្លើងបានបាញ់សម្លាប់អ្នកដំណើរចំនួន២៣នាក់ បន្ទាប់ពីចាប់អ្នកដំណើរទាំងនោះចេញពីរថយន្ត ឡានក្រុង និងឡានដឹកទំនិញ ដែលជាការវាយប្រហារដ៏សាហាវបំផុតមួយនៅភាគនិរតីនៃប្រទេសប៉ាគីស្ថាន។ នេះបើយោងតាមការចេ៣ញផ្សាយរបស់ទីភ្នាក់ងារព័ត៌មាន AP នៅថ្ងៃទី២៦ខែសីហានេះ។

មន្ត្រីប៉ូលិសជាន់ខ្ពស់ លោក Ayub Achakzai បានឲ្យដឹងថា ការសម្លាប់នេះបានកើតឡើងពេញមួយយប់នៅស្រុកមួយ Musakhail ក្នុងខេត្ត Baluchistan ដោយក្រុមវាយប្រហារបានដុតរថយន្តយ៉ាងតិច១០គ្រឿង មុនពេលរត់គេចខ្លួនពីកន្លែងកើតហេតុ។

អាជ្ញាធរបានបន្តថា ក៏មានការវាយប្រហារដាច់ដោយឡែកមួយទៀតនៅព្រឹកថ្ងៃចន្ទនេះ ដោយខ្មាន់កាំភ្លើងបានសម្លាប់មនុស្សយ៉ាងតិចប្រាំបួននាក់ រួមទាំងមន្រ្តីប៉ូលិស ៤នាក់ និងអ្នកដំណើរ ៥នាក់នៅក្នុងស្រុក Qalat ក្នុងខេត្ត Baluchistan និងក៏មានសេចក្តីរាយការណ៍អំពីការបាញ់ប្រហារនៅផ្នែកផ្សេងទៀតនៃខេត្តនេះផងដែរ។

លើសពីនេះក្រុមបះបោរបានបំផ្ទុះផ្លូវរថភ្លើងមួយខ្សែក្នុងស្រុក Bolan ក្នុងខេត្តBaluchistan ដោយបង្កការរំខានដល់ចរាចរណ៍តាមផ្លូវដែក។ ខ្មាន់កាំភ្លើងក៏បានវាយប្រហារលើប៉ុស្តិ៍ប៉ូលិសមួយកន្លែងក្នុងសង្កាត់ Mastung ប៉ុន្តែមិនមានការរាយការណ៍ពីមនុស្សស្លាប់នោះទេ។

ពាក់ព័ន្ធបញ្ហានេះប្រធានាធិបតី Asif Ali Zardari និងរដ្ឋមន្ត្រីមហាផ្ទៃ Mohsin Naqvi បានចេញសេចក្តីថ្លែងការណ៍ដាច់ដោយឡែកដោយហៅការវាយប្រហារនៅទីក្រុង Musakhail ថា«ព្រៃផ្សៃ» ហើយបានប្តេជ្ញាតាមរកអ្នកដែលបានប្រព្រឹត្តមកទទួលទោសឲ្យទាល់តែបាន។

កាលពីខែមេសា ក្រុមបះបោរក៏បានសម្លាប់មនុស្ស៩នាក់ បន្ទាប់ពីចាប់ពួកគេចេញពីឡានក្រុងនៅលើផ្លូវហាយវេក្នុងទីក្រុង Baluchistan និងបានសម្លាប់មនុស្ស ២នាក់ និងរបួស៦នាក់នៅក្នុងរថយន្តមួយទៀត បន្ទាប់ពីពួកគេបង្ខំឱ្យឈប់។ អំពើហិង្សានាពេលនោះ ក្រុមប្រដាប់អាវុធBLA បានអះអាងទទួលខុសត្រូវចំពោះការវាយប្រហារនោះ។

ក្រុមបំបែកខ្លួននៅ Baluchistan ជារឿយៗបានសម្លាប់កម្មករ និងអ្នកផ្សេងទៀតមកពីតំបន់ Punjab ភាគខាងកើតរបស់ប្រទេសនេះជាផ្នែកនៃយុទ្ធនាការមួយដើម្បីបង្ខំពួកគេឱ្យចាកចេញពីខេត្តនេះ ដែលអស់រយៈពេលជាច្រើនឆ្នាំបានជួបប្រទះនឹងការបះបោរ ខណៈការសម្លាប់បែបនេះភាគច្រើនត្រូវបានស្តីបន្ទោសទៅលើក្រុមប្រដាប់អាវុធខុសច្បាប់ និងក្រុមផ្សេងទៀតដែលទាមទារឯករាជ្យពីរដ្ឋាភិបាលប៉ាគីស្ថាន។៕