អភិបាលខណ្ឌឬស្សីកែវ ព្រមានចាត់វិធានការ​​លើម្ចាស់ដីនៅជាប់ព្រែកអូវែងដែលរំលោភដីចំណីព្រែក

លោក ជិន ប៊ុនធឿន អភិបាលនៃគណអភិបាលខណ្ឌឬស្សី បានព្រមានចាត់វិធានការច្បាប់ដោយមិនលើកលែង លើម្ចាស់កម្មសិទ្ធិដីដែលនៅជាប់ព្រែកអូវែង ដែលចាក់ដីរំលោភដីចំណីព្រែកធ្វើជាកម្មសិទ្ធផ្ទាល់ខ្លួន។ ជាមួយនឹងការព្រមាននេះ លោកអភិបាលខណ្ឌក៏ស្នើឲ្យម្ចាស់ដីទាំងនោះជួយសហការជាមួយអាជ្ញាធរ ដើម្បីផ្ដល់ភាពងាយស្រួល ក្នុងការស្ដារប្រព្រែកឲ្យបានលឿនរហ័ស បញ្ចៀសការជន់លិចនារដូវរស្សារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមាននេះ គឺធ្វើឡើងនៅពេលលោកដឹកនាំមន្ត្រីជំនាញពាក់ព័ន្ធ ដាក់គ្រឿងចក្រស្តាព្រែកអូវែង ត្រង់ចំណុចខាងមុខបូរីរិទ្ធ ស្ថិតក្នុងភូមិ៤ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ នាព្រឹកថ្ងៃទី២៤ ខែកញ្ញា ឆ្នាំ២០២៤នេះ។

លោកអភិបាលខណ្ឌបញ្ជាក់ថា ព្រែកអូវែងត្រូវបានម្ចាស់ដីមួយចំនួនដែលមានក្បាលនៅលើផ្លូវ៥៩៨ និងមានកន្ទុយដីជាប់ព្រែកអូវែង បានចាក់ដីរំលោភយក និងសាងសង់សំណង់រឹងលេីចំណីព្រែក។ លោកបញ្ជាក់ថា ព្រែកអូវែងមានទំហំ ៨០ម៉ែត្រ ដែលក្នុងនោះ តួព្រែកមានទំហំ៣០ម៉ែត្រ និងចំណីព្រែកសងខាងមានទំហំ ២៥ម៉ែត្រ ដោយមានផ្លូវជាប់មាត់ព្រែកសងខាងមានទំហំទទឹង ១០ម៉ែត្រ សម្រាប់សម្រួលចរចារណ៍ និងងាយស្រួលចល័តគ្រឿងចក្រ សម្អាតស្តាព្រែកសម្រួលចរន្តទឹកហូរលឿនបញ្ចៀសការលិចលង់ដោយជំនន់ទឹកភ្លៀងក្នុងមូលដ្ឋានខណ្ឌចំនួន ៥របស់រាជធានីភ្នំពេញ។

លេីសពីនេះទៅទៀត លោកអភិបាលខណ្ឌឫស្សីកែវ បានស្នេីយ៉ាងទទូចអោយម្ចាស់ក្បាលដីខាងលើត្រូវបញ្ឈប់ជាបន្ទាន់នូវរាល់សកម្មភាពចាក់ដីរំលោភយកចំណីព្រែកប្រេីប្រាស់ជាប្រយោជន៍ឯកជន នឹងត្រូវសហការជាមួយអាជ្ញាធរដែនដី មន្ត្រីមានសមត្ថកិច្ចកំណត់ព្រំដីរបស់ខ្លួនជាប់ដីចំណីព្រែក និងត្រូវរុះរេីចេញជាបន្ទាន់រាល់បណ្តាសំណង់ដែលបាន​សាងសង់លេីដីចំណីព្រែកអូវែង បេីមិនដូច្នោះ នឹងត្រូវប្រឈមមុខជាមួយផ្លូវច្បាប់ជាធរមាន៕

អត្ថបទ៖ សុភា