កៀកថ្ងៃប្រកួត! មូលនិធិសប្បុរសជន “យើងរួមគ្នាលើកស្ទួយជួយគុនខ្មែរ” ទទួលបានថវិកា ៣០០ លានរៀល

នេះជារឿងដ៏មោទនភាពនិងសប្បាយរីករាយ ខណ:ដែលឃើញទឹកចិត្តនៃការចូលរួមលើកស្ទួយ ក្នុងនាមខ្មែរស្រលាញ់ខ្មែរដែលមូលនិធិសប្បុរសជន នៃការប្រកួតបាល់ទាត់សប្បុរសធម៌ក្រោមប្រធានបទ “យើងរួមគ្នាលើកស្ទួយជួយគុនខ្មែរ” ទទួលបានថវិកា ៣០០លានរៀល។

លោកខេមដែលជាតារាចម្រៀង និងប្រធានក្រុមបាល់ទាត់តារា​កម្ពុជា បានបញ្ជាក់ឲ្យដឹងថា មកដល់ថ្ងៃនេះ មូលនិធិសប្បុរសជន “យើងរួមគ្នាលើកស្ទួយជួយគុនខ្មែរ” ទទួលបានថវិកា ៣០០លានរៀល រួចទៅហើយ ទោះបីមិនទាន់ដល់ថ្ងៃប្រកួតក៏ពិតមែន។ លោកថា “សូមអបអរគុនខ្មែរមកដល់ពេលនេះ មិនទាន់ដល់ថ្ងៃប្រកួតផង យើងប្រមូលមូលនិធិពីសប្បុរសជន ៣០០លានរៀល រួចបាត់ទៅហើយ។

តារាចម្រៀងខេម បន្តទៀតថា នេះសបញ្ជាក់ឲ្យឃើញ អំពីការស្រលាញ់និង ការចូលរួមជួយនៅក្នុងវិស័យគុនខ្មែរក្នុងនាមយើងជាតារាចម្រៀងតារាសម្ដែងតារាម៉ូដែលជាកូនខ្មែរ សូមចូលរួមក្នុងការជួយទៅដល់វិស័យគុនខ្មែរអស់ពីកម្លាំងកាយចិត្ត។

លោក ខេម បន្ថែមទៀតថា “ចុងបញ្ចប់ យើងចង់ឃើញស្នាមញញឹមគុនខ្មែរ សង្ឃឹមពុកម៉ែបងប្អូននិងចូលរួមជាមួយនឹងគ្នាឲ្យបានច្រើនកុះករ ក្រោមប្រធានបទ «យើងរួមគ្នាលើកស្ទួយជួយគុនខ្មែរ»”។

សូមបញ្ជាក់ថា តារាចម្រៀងសំឡេងស្អកលោកខេម ថ្មីៗនេះ បានប្រកាសត្រៀមរៀបចំការប្រកួតបាល់ទាត់សប្បុរសធម៌ក្រោមប្រធានបទ “យើងរួមគ្នាលើកស្ទួយជួយគុនខ្មែរ” ក្នុងគោលបំណងដើម្បីរកមូលនិធិជួយដល់តាមបណ្តាក្លិបដែលមានការខ្វះខាត។

សម្រាប់ការប្រកួតបាល់ទាត់រវាងក្រុមបាល់ទាត់​តារា​កម្ពុជា និងគុនខ្មែរអលស្តារ ធ្វើឡើងនៅថ្ងៃទី២៩ ខែតុលា ឆ្នាំ២០២៤ ទីតាំងស្តាតចាស់ចាប់ពីម៉ោង ២រសៀលតទៅ និងមានផ្សាយបន្តផ្ទាល់នៅ BTV ។ មហាជននិងអ្នកគាំទ្រវិស័យកីឡាទាល់ទាត់និងគុនខ្មែរអាចចូលរួមទស្សនាដោយសេរី ហើយអាចចូលរួមបរិច្ចាគថវិកាផ្ទាល់ខ្លួន ទៅតាមលទ្ធភាពរៀងៗខ្លួន៕ អត្ថបទ៖ ចាន់រ៉ា