កម្ពុជារកចំណូលបានជាង $៣ ពាន់លាន ពីការនាំចេញកសិផល ៨,៥ លានតោន

នៅក្នុងរយៈពេល ៩ ខែ ឆ្នាំ ២០២៤ កម្ពុជានាំចេញកសិផលទៅក្រៅប្រទេសចំនួនប្រមាណ ៨,៥ លានតោន មានការកើនឡើង ៥៣% បើធៀបរយៈពេលដូចគ្នា នៅឆ្នាំ ២០២៣។

កសិផលចម្បងៗដែលត្រូវបាននាំចេញរួមមានស្រូវ អង្ករ ដំឡូងមី គ្រាប់ស្វាយចន្ទី ចេក ស្វាយ ផ្លែមៀន ម្រេច និងកសិផលផ្សេងៗទៀត។

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និង​នេសាទ មានប្រសាសន៍ថា នៅក្នុងរយៈពេល ៩ ខែ ឆ្នាំ ២០២៤ កំណើននៃការនាំចេញ​កសិផល​បាន​កើនឡើងដល់ ៨,៥ លានតោន កើន ៥៣% ធៀបរយៈពេលដូចគ្នានៅឆ្នាំ ២០២៣ គិតជាទឹកប្រាក់ប្រមាណ ៣ ពាន់លាន​ដុល្លារ។

លោក ឃឹម ហ្វីណង់ បានថ្លែងថា កំណើននៃការនាំចេញនេះ ជាលទ្ធផលដែលកើត​ចេញពី​ការ​បើកទីផ្សារថ្មី ការបង្កើនសមត្ថភាពប្រកួតប្រជែង ដែលអនុញ្ញាតឱ្យកសិផលកម្ពុជា​ដល់ចំ​ណាត់​​​​​ថ្នាក់​អាចនាំចេញបាន ហើយកសិផលកម្ពុជាភាគច្រើន​នាំ​ចេ​ញ​​ជា​ផ្លូវ​ការ ដែលជាសញ្ញាល្អ។

លោក ឃឹម ហ្វីណង់ បញ្ជាក់ថា៖ «ចន្ទីជាសិផលមួយទាក់ទាញ ថ្មីៗនេះ យើងបានក្លាយជាអ្នក​ផលិត​​ចន្ទីធំជាងគេមួយក្នុងពិភពលោក ហើយយើងមានឱកាសក្លាយ​ជាប្រទេស​អធិរាជស្វាយ​ចន្ទី​ពិត​ប្រាកដក្នុងអាណត្តិនេះ»។

យោងតាមក្រសួងកសិកម្ម រុក្ខាប្រមាញ់ និងនេសាទ នៅឆ្នាំ ២០២៣ កម្ពុជានាំចេញកសិផលជាង ៨,៤ លានតោន ទៅទីផ្សារអន្តរជាតិ គិតជាទឹកប្រាក់ជាង ៤ ពាន់លានដុល្លារអាមេរិកធ្លាក់ចុះ ២% បើធៀបឆ្នាំ ២០២២។

ទីផ្សារសំខាន់ៗ ដែលកម្ពុជាបាននាំចេញទំនិញទៅរួមមាន៖ ប្រទេសចិន សហរដ្ឋអាមេរិក វៀតណាម ជប៉ុន ថៃរួមនឹងទីផ្សារ​សំខាន់ៗមួយចំនួនទៀត៕