អ៊ុយក្រែនថា ខ្លួន​បានសម្លាប់​​និង​បង្ករបួស​ទាហាន​​កូរ៉េ​ខាង​ជើងមួយចំនួន​ក្នុង​សមរភូមិ

ចារកម្មយោធារបស់អ៊ុយក្រែន និងក្រសួង​ការ​ពារជាតិ​​អាមេរិក បាននិយាយថា ទាហានអ៊ុយក្រែនបានសម្លាប់​និងធ្វើឲ្យរបួសទាហានកូរ៉េខាងជើងមួយចំនួនដែលកំពុងប្រយុទ្ធជាមួយកងកម្លាំងរុស្ស៊ីនៅក្នុងតំបន់ព្រំដែន Kursk របស់រុស្ស៊ី។ នេះបើយោងតាមការចេញផ្សាយរបស់សារព័ត៌មាន ​Al Jazeera នៅថ្ងៃទី១៧ខែធ្នូនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទីភ្នាក់ងារចារកម្មយោធារបស់អ៊ុយក្រែន ដែលត្រូវបានគេស្គាល់ថា ជា GUR បានឲ្យដឹងថា អង្គភាពកងទ័ពកូរ៉េខាងជើងបានរង «ការខាតបង់យ៉ាងដំណំ​ជាមួយនឹងទាហានយ៉ាងហោចណាស់​៣០នាក់» ត្រូវបានសម្លាប់ និងរងរបួសនៅក្នុងតំបន់ Kursk ក្បែរភូមិ Plekhovo, Vorobzha និង Martynovka ។

លើសពីនេះ GUR បានបន្ថែមនៅក្នុងសេចក្តីថ្លែងការណ៍មួយដែលបានបង្ហោះលើបណ្តាញ Telegram របស់ខ្លួនកាលពីថ្ងៃចន្ទថា «នៅភូមិ Kurilovka​ យ៉ាងហោចណាស់ទាហានកូរ៉េខាងជើងបីនាក់ក៏បានបាត់ខ្លួនផងដែរ»។

ថ្លែងទៅកាន់អ្នកសារព័ត៌មានក្នុងទីក្រុងវ៉ាស៊ីនតោន ឌីស៊ី អ្នកនាំពាក្យមន្ទីរបញ្ចកោណ ឧត្តមសេនីយ៍ទោ Pat Ryder បានគាំទ្រការអះអាងរបស់កងទ័ពអ៊ុយក្រែនថា សហរដ្ឋអាមេរិកបានរកឃើញកងទ័ពកូរ៉េខាងជើង ត្រូវបានសម្លាប់ និងរងរបួសនៅក្នុងការប្រយុទ្ធនៅទីក្រុង Kursk ពិតមែន។

យោងតាមទីភ្នាក់ងារស៊ើបការណ៍សម្ងាត់កូរ៉េខាងត្បូង អាមេរិក និងអ៊ុយក្រែន ទាហានកូរ៉េខាងជើងប្រមាណ ១១០០០ នាក់ត្រូវបានបញ្ជូនទៅកាន់ប្រទេសរុស្ស៊ី ដើម្បីប្រយុទ្ធនៅជួរមុខប្រឆាំងនឹងកងកម្លាំងអ៊ុយក្រែន។ ទាហានកូរ៉េខាងជើងទាំងនោះភាគច្រើនត្រូវបានដាក់ពង្រាយទៅកាន់តំបន់ Kursk របស់រុស្ស៊ី ដែលស្ថិតនៅក្រោមការគ្រប់គ្រងដោយផ្នែករបស់អ៊ុយក្រែន ចាប់តាំងពីការលុកលុយរបស់ទីក្រុង គៀវ ចូលទៅក្នុងទឹកដីរុស្ស៊ីកាលពីខែសីហា។

អ្នកវិភាគនិយាយថា ទាហានកូរ៉េខាងជើងប្រឈមមុខនឹងបញ្ហាដែលអាចកើតមាន រួមទាំងកង្វះបទពិសោធន៍ប្រយុទ្ធ និងឧបសគ្គភាសា។ ការដាក់ពង្រាយតាមរបាយការណ៍របស់ពួកគេមិនត្រូវបានទទួលស្គាល់ជាផ្លូវការដោយទីក្រុងព្យុងយ៉ាង ឬទីក្រុងមូស្គូនោះទេ ទោះជាយ៉ាងណាក៏ដោយ ប្រទេសទាំងពីរបានបើកទូលាយទំនាក់ទំនងយោធារបស់ពួកគេឱ្យកាន់តែស៊ីជម្រៅក្នុងរយៈពេលប៉ុន្មានខែថ្មីៗនេះ។

ប្រព័ន្ធផ្សព្វផ្សាយរុស្ស៊ី Mediazona បានរាយការណ៍កាលពីខែកញ្ញាថាទាហានរុស្ស៊ីជាង ៧១០០០នាក់ត្រូវបានគេកំណត់អត្តសញ្ញាណ និងបញ្ជាក់ថាត្រូវបានសម្លាប់នៅក្នុងប្រទេសអ៊ុយក្រែន។ អគ្គសេនាធិការរបស់អ៊ុយក្រែនបានអះអាងថា គិតត្រឹមថ្ងៃទី ១ ខែតុលា កងទ័ពរុស្ស៊ីជាង ៦៥៤០០០ នាក់ត្រូវបានសម្លាប់ក្នុងសង្គ្រាម។ ចំណែកក្រសួងការពារជាតិរុស្ស៊ីប៉ាន់ប្រមាណថាទីក្រុង គៀវ បានបាត់បង់ទាហានជិតកន្លះលាននាក់ នេះបើយោងតាមរបាយការណ៍ដែលបានចេញផ្សាយនៅក្នុងខែកញ្ញាដោយគេហទំព័រព័ត៌មាន RT ។

គួរបញ្ជាក់ថាទាំងរុស្ស៊ី និងអ៊ុយក្រែន កម្រផ្តល់ព័ត៌មានលម្អិតជាក់លាក់អំពីចំនួនទាហានរបស់ពួកគេផ្ទាល់ ដែលត្រូវបានសម្លាប់ ឬរងរបួសនៅក្នុងសង្រ្គាមណាស់ ចាប់តាំងពីការឈ្លានពានរបស់រុស្ស៊ីមកលើអ៊ុយក្រែននៅថ្ងៃទី ២៤ ខែកុម្ភៈ ឆ្នាំ ២០២២៕

អត្ថបទ៖ ប៊ុន សុភាព