បាត់ឈឹងជាង១០ឆ្នាំ ពេលនេះ ម៉ាឡេស៊ី ប្រកាសចាប់ផ្តើមប្រតិបត្តិការស្វែងរក MH370 សាជាថ្មី

នៅថ្ងៃសុក្រទី២០ខែធ្នូឆ្នាំ២០២៤ ប្រទេសម៉ាឡេស៊ី បានប្រកាសពីប្រតិបត្តិការសាជាថ្មី ដើម្បីស្វែងរកជើងហោះហើរ MH370 ដែលបាត់ខ្លួនកាលពីជាង១០ឆ្នាំមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Reuters, សេចក្តីប្រកាសនេះគឺចេញពីមាត់រដ្ឋមន្ត្រីដឹកជញ្ជូន Anthony Loke ដោយលោកនិយាយថា ប្រទេសម៉ាឡេស៊ី បានយល់ព្រមជាគោលការណ៍ហើយ លើសំណើបន្តការស្វែងរកយន្តហោះក្រុមហ៊ុនអាកាសចរណ៍ម៉ាឡេស៊ី ឡើងវិញ។

តាមការបញ្ជាក់ពីរដ្ឋមន្ត្រី, ក្រុមហ៊ុនរុករក Ocean Infinity បានដាក់សំណើស្វែងរកតំបន់ថ្មីនៅភាគខាងត្បូងមហាសមុទ្រឥណ្ឌា។ ក្រុមហ៊ុននេះក៏ធ្លាប់បើកប្រតិបត្តិការស្វែងយន្តហោះដែរ ប៉ុន្តែក៏សម្រេចចិត្តបញ្ឈប់វិញក្នុងឆ្នាំ២០១៨។

លោក Loke ប្រាប់សន្និសីទកាសែតថា «ក្រុមហ៊ុនមានមូលដ្ឋាននៅអាមេរិកមួយនេះ នឹងទទួលបានប្រាក់៧០លានដុល្លារ បើរកយន្តហោះឃើញ ហើយយើង​សង្ឃឹម​ថា នេះជាពេលវេលាដ៏ល្អបំផុត ដែលអាចរកយន្តហោះឃើញ»។

សូមបញ្ជាក់ថា យន្តហោះ Boeing 777 ដែលដឹកអ្នកដំណើរ២២៧នាក់និងក្រុមអាកាសយានិក​១២នាក់ បានបាត់ចេញពីរ៉ាដានិងស្ងាត់ការទាក់ទងឈឹង ពេលចេញដំណើរពីទីក្រុងគួឡាឡាំពួ នៃប្រទេសម៉ាឡេស៊ី ឆ្ពោះទៅទីក្រុងប៉េកាំង នៃប្រទេសចិន នៅថ្ងៃទី៨ខែមីនាឆ្នាំ២០១៤។

ការបាត់ខ្លួនរបស់ជើងហោះហើរ MH370 បានក្លាយជារឿងអាថ៌កំបាំងបំផុតក្នុងវិស័យអាកាសចរណ៍ ហើយទោះមានអ្នកជំនាញល្បីៗនៅលើពិភពលោក ចេញមុខលើកឡើងពីទ្រឹស្តីក៏ដូចជាចង្អុលទៅទីតាំងដែលយន្តហោះអាចធ្លាក់ឬមានប្រត្តិការស្វែងរកមួយលើកជាពីរលើកក៏ដោយ ក៏គេនៅតែមិនទាន់អាចរកតម្រុយអ្វីបាន។

មិនត្រឹមប៉ុណ្ណឹង ថែមទាំងមានសេចក្តីរាយការណ៍អំពីការរកឃើញបំណែកយន្តហោះដែលអណ្តែតតាមសមុទ្រ មកទើរលើឆ្នេរនៃប្រទេសនានាទៀតផង ប៉ុន្តែបំណែកទាំងនោះសុទ្ធតែត្រូវគេច្រានចោលថាជាមិនមែនរបស់ MH370 ទេ៕

អត្ថបទ៖ សុខ សុវណ្ណ

ចុចអាន៖ ម៉ាឡេស៊ី ត្រៀម​បើក​ប្រតិបត្តិការ​រុករក​យន្តហោះ MH370 សាជាថ្មី