រថយន្តបុករះនៅផ្សារបុណ្យណូអែលអាល្លឺម៉ង់ ស្លាប់និងរបួសមនុស្សច្រើននាក់ សង្ស័យជាអំពើភេរវកម្ម

រថយន្តមួយគ្រឿង បានបុករះមនុស្សនៅឯផ្សារបុណ្យណូអែលក្នុងទីក្រុង Magdeburg នៃប្រទេសអាល្លឺម៉ង់ ដោយបណ្តាលឲ្យមនុស្ស២នាក់បាត់បង់ជីវិត និង៦៨នាក់ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Reuters, ហេតុការណ៍នេះកើតឡើងនៅម៉ោង៧យប់ (ម៉ោងនៅអាល្លឺម៉ង់) ដោយគេឃើញរថយន្តម៉ាក BMW ពណ៌ខ្មៅមួយគ្រឿង បើកបំបុកចូលផ្សារបុកអ្នកទិញទំនិញនិងអ្នកលក់ទាំងកំរោល បង្កភាពចលាចល។

ជនសង្ស័យគឺជាវេជ្ជបណ្ឌិតសញ្ជាតិអារ៉ាប៊ីសាអ៊ូឌីតវ័យ៥០ឆ្នាំ។ បុរសម្នាក់នេះបានមករស់នៅប្រទេសអាល្លឺម៉ង់ ក្នុងឆ្នាំ២០០៦ ហើយថែមទាំងមានប័ណ្ណពលរដ្ឋជាផ្លូវការទៀតផង។

ហេតុការណ៍នេះ ធ្វើឲ្យពិភពលោករន្ធត់ចិត្ត សូម្បីមេដឹកនាំនានា ក៏បានបង្ហាញភាពតក់ស្លុតផងដែរ ហើយវាកើតឡើងប៉ុន្មានថ្ងៃប៉ុណ្ណោះ មុនពិធីបុណ្យណូអែល ចូលមកដល់។ ដូច្នេះហើយទើបគេបារម្ភខ្លាំងចំពោះសន្តិសុខនៅទ្វីបអឺរ៉ុប ក្នុងអំឡុងពិធីបុណ្យដ៏ធំនេះ។

ត្បិតតែប៉ូលិសអាល្លឺម៉ង់ មិនទាន់បញ្ជាក់ថាតើហេតុកាណ៍នេះបណ្តាលមកពីអ្វីក៏ដោយ ប៉ុន្តែមានការសង្ស័យថា វាជាការវាយប្រហារភេរវកម្ម ខណៈការស៊ើបអង្កេតកំពុងបន្ត។

នេះមិនមែនជាលើកដំបូងឡើយដែលប្រទេសអាល្លឺម៉ង់ ជួបហេតុការណ៍រន្ធត់មុនបុណ្យណូអែល។ ជាក់ស្តែងកាលពីថ្ងៃទី១២ខែធ្នូឆ្នាំ២០១៦ រថយន្តធុនធំមួយគ្រឿង ក៏បានបើកបុករះមនុស្សនៅផ្សារបុណ្យណូអែលដែរ ដោយបណ្តាលឲ្យមនុស្ស១២នាក់ បាត់បង់ជីវិតនិង៤៨នាក់រងរបួស។ 

ការវាយប្រហារនោះ កើតឡើងនៅតំបន់ Breitscheidplatz ក្នុងទីក្រុងបែរឡាំង ហើយត្រូវបានគេសន្មត់ថា ជាការវាយប្រហារភេរវកម្ម៕

សូមទស្សនាវីដេអូ៖

អត្ថបទ៖ សុខ សុវណ្ណ

ចុចអាន៖ មនុស្សមួយក្រុមកំពុងចាំឡានក្រុង តែត្រូវរថយន្តបុករះ ស្លាប់៧នាក់នៅរដ្ឋតិចសាស់