ជនចំណាកស្រុកជាង១ម៉ឺននាក់បានស្លាប់ក្នុងឆ្នាំ​២០២៤ ដោយសារ​ការ​ឆ្លង​សមុទ្រ​ទៅ​អេស៉្បាញ

អង្គការក្រៅរដ្ឋាភិបាលមួយ បានឲ្យដឹងថា យ៉ាងហោចណាស់ជនចំណាកស្រុកចំនួន​១០៤៥៧នាក់បានស្លាប់ ឬបាត់ខ្លួន ខណៈពេលដែលពួកគេ​ព្យាយាមទៅ​​ធ្វើ​ដំណើរ​តាមផ្លូវ​ទឹក​ទៅ​កាន់​អេស្ប៉ាញ​ក្នុងឆ្នាំ​២០២៤ ដែលជិត​៦០% ច្រើនជាងឆ្នាំមុន និងច្រើនជាងគេចាប់តាំងពីឆ្នាំ​២០០៧។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការសិទ្ធិជនចំណាកស្រុក Caminando Fronteras ឬ Walking Borders បាននិយាយនៅក្នុងរបាយការណ៍ដែលគ្របដណ្តប់រយៈពេលពីថ្ងៃទី ១​ខែមករា ដល់ថ្ងៃទី ៥ខែធ្នូ ឆ្នាំ ២០២៤ ថាមានការកើនឡើងនៃការស្លាប់របស់ជនចំណាកស្រុកដែលមាន ៥៨% រួមមានកុមារ ១៥៣៨ នាក់ និងស្ត្រី ៤២១នាក់។ វាមានចំនួនជាមធ្យមមនុស្សស្លាប់ ៣០នាក់ក្នុងមួយថ្ងៃ កើនឡើងពីឆ្នាំ២០២៣ ដែលមានត្រឹមតែ១៨នាក់។

ក្រុមនេះចងក្រងទិន្នន័យរបស់ខ្លួនពីបណ្តាញទូរស័ព្ទទាន់ហេតុការណ៍ដែលបង្កើតឡើងសម្រាប់ជនចំណាកស្រុកនៅលើទូកដែលមានបញ្ហាដើម្បីអំពាវនាវរកជំនួយ ពីក្រុមគ្រួសារជនចំណាកស្រុកដែលបានបាត់ខ្លួន និងពីស្ថិតិសង្គ្រោះផ្លូវការ។ តួលេខទាំងនេះគឺជាភស្តុតាងនៃការបរាជ័យយ៉ាងខ្លាំងលើប្រព័ន្ធជួយសង្គ្រោះ និងការការពារ ដោយមនុស្សជាង ១០៤០០ ​នាក់បានស្លាប់ ឬបាត់ខ្លួនក្នុងរយៈពេលតែ១ឆ្នាំ។

ជន​រង​គ្រោះ​មក​ពី​២៨​ប្រទេស ដែល​ភាគ​ច្រើន​នៅ​អាហ្វ្រិក ប៉ុន្តែ​ក៏​មក​ពី​អ៊ីរ៉ាក់ និង​ប៉ាគីស្ថាន​ផងដែរ។ ភាគច្រើននៃអ្នកស្លាប់ បានកើតឡើងនៅលើផ្លូវធ្វើចំណាកស្រុកអាត្លង់ទិកពីទ្វីបអាហ្រ្វិកទៅកាន់កោះ Canary របស់អេស្ប៉ាញ ខណៈអេស៉្បាញបានទទួលចំនួនជនចំណាកស្រុកជាកំណត់ត្រាពីរឆ្នាំជាប់ៗគ្នា។ ផ្លូវទឹកអាត្លង់ទិកគឺមានគ្រោះថ្នាក់ជាពិសេសទូកដែលផ្ទុកមនុស្សច្រើនមិនអាចទប់ទល់នឹងចរន្តទឹកសមុទ្រដ៏ខ្លាំងបាន។

ពាក់ព័ន្ធបញ្ហានេះនាយករដ្ឋមន្ត្រីអេស្បាញលោក Pedro Sanchez កាលពីខែសីហាបានទៅទស្សនកិច្ចប្រទេសនៅអាហ្វ្រិកខាងលិចក្នុងគោលបំណងជំរុញកិច្ចខិតខំប្រឹងប្រែងក្នុងស្រុកដើម្បីទប់ស្កាត់ការធ្វើចំណាកស្រុកខុសច្បាប់ពីប្រទេស ម៉ូរីតានី សេណេហ្គាល់ និងហ្គាំប៊ី ដែលជាចំណុចចេញដំណើរដ៏សំខាន់សម្រាប់ទូកជនចំណាកស្រុកឆ្ពោះទៅកោះCanary ។

យោងតាមក្រសួងមហាផ្ទៃ ជនចំណាកស្រុកចំនួន ៦០២១៦ នាក់បានចូលប្រទេសអេស៉្បាញមិនទៀងទាត់នៅចន្លោះថ្ងៃទី ១ ខែមករាដល់ថ្ងៃទី ១៥ ខែធ្នូ ដែលជាការកើនឡើង ១៤.៥% ធៀបនឹងរយៈពេលដូចគ្នាកាលពីឆ្នាំមុន ខណៈភាគច្រើនមានជាង ៧០% បានចុះចតនៅកោះCanary។

គួរបញ្ជាក់ថាប្រទេសអេស៉្បាញ ប្រទេសអ៊ីតាលី និងក្រិក គឺជាច្រកទ្វារមួយក្នុងចំណោមច្រកទ្វារអឺរ៉ុបសំខាន់ៗចំនួនបីសម្រាប់ការមកដល់របស់ជនចំណាកស្រុក។

អង្គការអន្តរជាតិសម្រាប់ការធ្វើចំណាកស្រុកបានប៉ាន់ប្រមាណថា ចាប់តាំងពីឆ្នាំ ២០១៤ មក ជនចំណាកស្រុកជាង ១៦៤០០ នាក់បានស្លាប់ដោយសារព្យាយាមចូលទៅកាន់ទ្វីបអឺរ៉ុបពីទ្វីបអាហ្រ្វិក រាប់បញ្ចូលទាំងអ្នកដែលធ្វើដំណើរទៅកាន់កោះCanary៕

អត្ថបទ៖ ប៊ុន សុភាព