កីឡា

ថ្ងៃអាទិត្យនេះ ព្រះខ័នរាជស្វាយរៀង ធ្វើការធ្ងន់ប៉ះ បឹងកេត កំពុងឡើងជើង

បានផុស

១ year មុន

នៅ

ថ្ងៃសុក្រ ១០ មករា ២០២៥

ដោយ

ក្លិបបាល់ទាត់ព្រះខ័នរាជស្វាយរៀង ត្រូវបើកទ្វារកីឡដ្ឋានរបស់ខ្លួនទទួលក្រុមភ្ញៀវល្អកំពុងឡើងជើង បឹងកេត ក្នុងការប្រកួតសប្ដាហ៍ទី១៧ ពារង្វាន់ខេមបូឌានព្រីមៀលីគរដូវកាលឆ្នាំ២០២៤-២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោមការដឹកនាំរបស់លោក Conor Nester ប៉ុន្មានប្រកួតចុងក្រោយនេះ បឹងកេត ធ្វើបានយ៉ាងល្អដោយភាគច្រើនរកបានគ្រាប់បាល់ច្រើនគ្រាប់លើដៃគូប្រកួត។ ខ្សែប្រយុទ្ធ សៀង ចន្ធា កំពុងក្លាយជាតួសំខាន់ក្នុងការរកបានគ្រាប់ដែលបូកបន្ថែមជាមួយសមាជិកថ្មីថែមទៀតគឺរឹតតែគ្រោះថ្នាក់។

សមាជិកថ្មី៣រូបរបស់បឹងកេត គួរឲ្យចាប់អារម្មណ៍គឺ ខ្សែការពារអូស្ត្រាលី Alexander Kevin Baker អាយុ២៣ឆ្នាំ, ខ្សែបម្រើការពារជម្រើសជាតិហ្វីលីពីន Scott Woods អាយុ២៤ឆ្នាំ និងខ្សែបម្រើអង់គ្លេស Charlie Thomas Scott អាយុ២៧ឆ្នាំ ដែលជាអតីតយុវជនរបស់ក្លិបបិសាចក្រហម Manchester United។

ចំណែក ក្រុមការពារតំណែងជើងឯក ព្រះខ័នរាជស្វាយរៀង កំពុងជួបបញ្ហាកីឡាកររបួសច្រើន។ ពួកគេបានចាញ់ក្រុមរបស់ឥណ្ឌូណេសុី PSM Makassar ដោយលទ្ធផល ០-១ ក្នុងពានរង្វាន់ ASEAN Club Championship ឆ្នាំ២០២៤-២៥។ ការប្រកួតសប្ដាហ៍នេះក្រុមម្ចាស់ផ្ទះព្រះខ័នរាជស្វាយរៀងត្រូវធ្វើការងារធ្ងន់មែនទែន។

កីឡាកររបួសរបស់ព្រះខ័នរាជស្វាយរៀងស្ទើរជាងពាក់កណ្តាលតារាងគឺ ខ្សែការពារ មីហ្សូនុ ហ៊ីការុ, ខ្សែបម្រើការពារ សេត រ៉សីប, ខ្សែប្រយុទ្ធ Pablo Agusto, ខ្សែបម្រើប្រយុទ្ធ ញាន សុស៊ីដាន, ខ្សែប្រយុទ្ធ សុវណ្ណ ដូណា, ខ្សែបម្រើការពារ សួន សុវណ្ណ និងខ្សែបម្រើកណ្តាល Ryo Fujii។

ប្រវត្តិជួបគ្នា១៤លើកចុងក្រោយ ព្រះខ័នរាជស្វាយរៀងឈ្នះ៧ ស្មើ៤ និងចាញ់៣។ ការប្រកួតក្រៅដី២លើកចុងក្រោយរបស់បឹងកេត ពួកគេធ្វើបានយ៉ាងល្អ បន្ទាប់ពីយកឈ្នះក្រុមណាហ្គាវើលដ៍ ៥-១ និងឈ្នះឡាយហ្វខេត្តព្រះសីហនុ ៤-១។ ចំណែក២ប្រកួតចុងក្រោយរបស់ព្រះខ័នរាជស្វាយរៀង បានឈ្នះ ណាហ្គាវើលដ៍ ២-១ និងចាញ់ PSM Makassar ០-១។ ជួបគ្នាកាលពីជុំទី១ ក្រុមព្រះខ័នរាជស្វាយរៀង បានយកឈ្នះ បឹងកេត ក្នុងលទ្ធផល ២-១៕