«ឆ្នេរ​តេជោសន្តិភាព​កែប» នឹង​បើកការដ្ឋាន​សាងសង់​នៅ​សប្តាហ៍ក្រោយ​នេះ

បើគ្មាន​ការប្រែប្រួល​ទេនោះ គម្រោង​សាងសង់​រមណីយដ្ឋាន​ឆ្នេរ​ខ្សាច់កម្សាន្ត​សាធារណៈ​កម្រិត​ខ្ពស់ «ឆ្នេរ​តេជោសន្តិភាព​កែប» នឹង​បើក​បើកការដ្ឋាន​សាងសង់ជា​ផ្លូវការនៅសប្តាហ៍ក្រោយ​នេះ ក្រោម​វត្តមានលោក សាយ សំអាល់ ឧបនាយករដ្ឋមន្រ្តី រដ្ឋមន្រ្តីក្រសួង​រៀបចំដែនដី នគរូបនីយកម្ម និង​សំណង់ និង​ជា​ប្រធាន​គណៈកម្មាធិការជាតិគ្រប់គ្រង និងអភិវឌ្ឍតំបន់​ឆ្នេរសមុទ្រកម្ពុជា។

ទីតាំង​ប្រាព្វ​ពិធីបើកការដ្ឋាន​ នឹង​ធ្វើ​ឡើងនៅ​​រង្វង់មូលគយគន់ទេសភាពទី ២ នៅក្បែរផ្សារក្តាម ក្រុង​កែប។

កាលពី​ថ្ងៃទី១៧ ខែមករា ឆ្នាំ២០២៥ នៅទីស្តីការក្រសួងរៀបចំដែនដី នគរូបនីយកម្ម និងសំណង់ លោក សាយ សំអាល់ ឧបនាយករដ្ឋមន្រ្តី​ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់​ និងជាប្រធានគណៈកម្មាធិការជាតិគ្រប់គ្រង​ និងអភិវឌ្ឍតំបន់ឆ្នេរសមុទ្រកម្ពុជា (គ.អ.ឆ.ក.) បានដឹកនាំកិច្ចប្រជុំជំរុញការ​សាងសង់រមណីយដ្ឋានឆ្នេរខ្សាច់កម្សាន្ត​សាធារណៈកម្រិតខ្ពស់ “ឆ្នេរតេជោសន្តិភាពកែប” ស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប។

កិច្ចប្រជុំនេះ​ មានការ​ចូលរួមពីមន្រ្តីពាក់ព័ន្ធ រួមទាំង​លោក ខេង សុមេធ មេបញ្ជាកាកងវិស្វកម្មតេជោសៀមរាប,​ ក្រុមការងារសាងសង់គម្រោង “ឆ្នេរតេជោសន្តិភាព”​, អគ្គលេខាធិការរង គ.អ.ឆ.ក.,​ អភិបាលនៃគណ:អភិបាលខេត្តកែប, ប្រធានផ្នែក, អនុប្រធានផ្នែក និងមន្រ្តីជំនាញ នៃអគ្គលេខាធិការដ្ឋាន​ គ.អ.ឆ.ក.​ ព្រមទាំងម្ចាស់ក្បាលដីនៅក្នុងគម្រោង។

គម្រោងអភិវឌ្ឍន៍រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់នៅ​ខេត្ត​កែបមានប្រវែង ២ ៧០០ ម៉ែត្រ ចាប់ពីផ្សារ​ក្ដាមទៅដល់ព្រៃកោងកាង ស្ថិតនៅភូមិថ្មី សង្កាត់ព្រៃធំ ក្រុងកែប ខេត្តកែប។ ក្នុងនោះមាន​​ការ​សាងសង់​ឆ្នេរខ្សាច់កម្សាន្តសាធារណៈកម្រិតខ្ពស់តាមបណ្ដោយឆ្នេរមានទទឹងយ៉ាងតិចប្រវែង ៣០។ ក្នុង​គម្រោង​ក៏​មានការ​​សាងសង់​សួនច្បារ​សាធារណៈ មានដាំដើមឈើនៅលើដីចំណីឆ្នេរមានទទឹងប្រវែង ៥០ ម៉ែត្រ។

គម្រោងអភិវឌ្ឍ «ឆ្នេរតេជោសន្តិភាពកែប» ធ្វើ​ឡើង​ក្រោមទម្រង់នៃកិច្ចសន្យាអភិវឌ្ឍន៍រវាងរដ្ឋ និងឯកជន ក្នុងគោលដៅកែលម្អ និងបង្កើតឆ្នេរខ្សាច់កម្សាន្តសាធារណៈ សម្រាប់ភ្ញៀវទេសចរជាតិនិងអន្តរជាតិ។

គម្រោងអភិវឌ្ឍនេះ មានការស្ថាបនា​​វិថីនិងអនុវិថីចូលឆ្នេរសមុទ្រចំនួន ៥ ខ្សែ និង​រួមមានការ​រៀបចំ​ផ្លូវថ្មើរជើង ផ្លូវថ្មើរជើងសម្រាប់ជនមានពិការភ្នែក ផ្លូវជិះកង់ និងរង្វង់មូលគយគន់ទេសភាពចំនួន ២ កន្លែង។ រង្វង់មូលទី១ មានអង្កត់ផ្ចិតប្រវែង ៩៩ ម៉ែត្រស្ថិតនៅចុងវិថីចូលឆ្នេរសមុទ្រទី១ ដែលគ្រោងតម្កល់នូវរូបចម្លាក់លោកយាយជំទាវម៉ៅក្នុងទម្រង់មេទ័ពជាញជ័យ​។ រីឯរង្វង់មូលទី ២ មានអង្កត់ផ្ចិតប្រវែង ៩៩ ម៉ែត្រ ស្ថិតនៅចុងវិថីចូលឆ្នេរសមុទ្រទី២ គ្រោងរក្សាទុកជាលម្អសាធារណៈសម្រាប់ប្រារព្ធពិធីបុណ្យនិងពិព័រណ៍នានា។

រាជរដ្ឋាភិបាល មាន​ផែនការ​អភិវឌ្ឍន៍ទេសចរណ៍ខេត្តកែប (ឆ្នាំ២០២៣-២០៣៥) ​ដោយបានកំណត់ចក្ខុវិស័យប្រែក្លាយខេត្តកែបជាទេសចរណ៍ធម្មជាតិ និងសមុទ្រសម្រាកកម្សាន្តបែបប្រណិត​កម្រិតខ្ពស់​៕