ព័ត៌មានអន្ដរជាតិ

វៀតណាមគ្រោងខ្ចីចិន សម្រាប់គម្រោងផ្លូវរថភ្លើង ៨,៣ ប៊ីលានដុល្លារ ភ្ជាប់ប្រទេសទាំង២

បានផុស

១ year មុន

នៅ

ថ្ងៃសុក្រ ១៤ កុម្ភៈ ២០២៥

ដោយ

រដ្ឋមន្ត្រីក្រសួងដឹកជញ្ជូនវៀតណាម បានឱ្យដឹងកាលពីថ្ងៃព្រហស្បតិ៍ថា វៀតណាមគ្រោងនឹងខ្ចីប្រាក់ពីរដ្ឋាភិបាលចិន ដើម្បីប្រើប្រាស់សម្រាប់គម្រោងសាងសង់ផ្លូវរថភ្លើងថ្មីតម្លៃ ៨,៣ ប៊ីលានដុល្លារ ដែលតភ្ជាប់រវាងប្រទេសទាំង២។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

លោករដ្ឋមន្ត្រី Nguyen Hong Minh បានប្រាប់សភាថា៖ «ប្រព័ន្ធផ្លូវរថភ្លើងបច្ចុប្បន្នរបស់វៀតណាម គឺហួសសម័យ ហើយប្រទេសត្រូវការប្រព័ន្ធផ្លូវរថភ្លើងថ្មី ដើម្បីគាំទ្រដល់ការអភិវឌ្ឍសេដ្ឋកិច្ចរបស់ខ្លួន»។ គម្រោងផ្លូវរថភ្លើងថ្មី តភ្ជាប់ពីទីក្រុងព្រំដែន Lao Cai កាត់តាមរដ្ឋធានី ហាណូយ ឆ្ពោះទៅកាន់ទីក្រុងកំពង់ផែរ Haiphong និងត្រូវសាងសង់ឡើងដើម្បីដឹកអ្នកដំណើរ និងទំនិញ។

បើតាមលោក Minh គម្រោងនេះគ្រោងនឹងចាប់ផ្ដើមសាងសង់នៅឆ្នាំនេះ និងបញ្ចប់នៅឆ្នាំ ២០៣០។ ចំពោះកម្ចីពីចិន លោកមិនបានបញ្ជាក់ជាលម្អិតនោះទេ។

គួរគូសបញ្ជាក់ថា វៀតណាមមានគម្រោងកសាងឡើងវិញនូវប្រព័ន្ធផ្លូវរថភ្លើងចាស់ៗរបស់ខ្លួន ហើយកន្លងមកបានទាក់ទងទៅចិន សម្រាប់ការផ្តល់មូលនិធិ និងការប្រើប្រាស់បច្ចេកវិទ្យា។

កាលពីខែវិច្ឆិកា ឆ្នាំមុន សមាជិកសភាវៀតណាមបានអនុម័តសេចក្ដីសម្រេចចិត្តដើម្បីដែលគាំទ្រគម្រោងផ្លូវរថភ្លើងល្បឿនលឿនតម្លៃ ៦៧ ប៊ីលានដុល្លារ ប្រវែង ១ ៥៤១ គីឡូម៉ែត្រ ដែលតភ្ជាប់ពីក្រុងហាណូយ ទៅក្រុងហូជីមិញ និងគ្រោងដាក់ដំណើរការនៅឆ្នាំ ២០៣៥៕